¿Kʼuxi xuʼ xakʼupin xchiʼuk ti xatabe sbalil kʼalal chachan Avivliae?

Li Josuee yakal chchan li balbal svun sventa Mantale; muʼyuk lom sna li Raab kʼalal jin li smuroaltak Jerikoe; tstoy muyel skʼob Josue kʼalal tspas orasione

LI Josuee toj tsots li abtelal akʼbat sbain yuʼun li Jeovae, yuʼun skʼan sbeiltas batel ta Albil Balumil li j-israeletike. Akʼo mi tsnuptan epal vokoliletik, pe jamal albat yuʼun Jeova ti tspas onoʼox yuʼune. Jech xtok, albat ti skʼan oyuk stsatsal yoʼonton xchiʼuk ti mu xiʼe. Xi to albat xtoke: «Cʼotuc me ta pasel avuʼun li jmantaltaque [...]. Nopilano ta cʼacʼal ta acʼubal yuʼun jech chcʼot ta pasel avuʼun li cʼusitic te tsʼibabile». Xi to albate: «Jech lec chbat avuʼun buyuc noʼox chaxanov, xchiʼuc lec chbat avuʼun scotol cʼusi chapas» (Jos. 1:7, 8).

Li avi eke, ta jnuptantik tsatsal vokoliletik ta skoj ti ta slajebal xa kʼakʼal kuxulutike (2 Tim. 3:1). Pe yoʼ lekuk xbat li jkuxlejaltike, skʼan jchʼuntik li smantaltak Jeova jech kʼuchaʼal la spas li Josuee. Kʼalal ta jchanilantik li Jvivliatike, jaʼ tskoltautik yoʼ xkakʼ ta jkuxlejaltik li beiltaseletik kʼalal mi oy la jnuptantik prevae.

Pe ti melel xkaltike, ep buchʼutik mu jnaʼ xijchanunaj xchiʼuk junantike mu jkʼupintik. Pe ta skoj ti toj tsots skʼoplal skʼan xijchanunaje, xuʼ jkʼeltik li mantal ta revista liʼe ti xi sbie: «Paso preva liʼe». Teye xuʼ xata epal beiltaseletik sventa xakʼupin xchiʼuk yoʼ xatabe sbalil kʼalal chachan li Avivliae.

Xi la skʼejinta jun jtsʼibajom yuʼun salmoe: «Tuqʼuibtasun batel lec ta spasel li amantaltaque, yuʼun jaʼ te ta jta o xcuxetel coʼnton» (Sal. 119:35). Xuʼ xakʼupin ek li xchanel Vivliae, mi la avojtikin batel mas li kʼusi chale, ep kʼusitik chata ti kʼupilik tajek sbae.

Melel onoʼox ti muʼyuk chabeiltas batel jun jteklum jech kʼuchaʼal la spas li Josuee. Pe oy van jeltos avokoltak ti skʼan xatsale. Jaʼ yuʼun, skʼan xachan Avivlia xchiʼuk ti xakuxlebin li kʼusi chal yoʼ xatabe sbalil jech kʼuchaʼal la spas li Josuee. Mi jech chapase, lek chbat akuxlejal xchiʼuk lek kʼusi chkʼot ta nopel avuʼun.

PASO PREVA LIʼE

Paso baʼyel orasion kʼalal chlik achan Avivliae. Skotol li kʼusitik chal li Vivliae jaʼ snopbentak li Dios ti skotol xuʼ yuʼune xchiʼuk jaʼ laj yakʼ ta tsʼibael stuk sventa jlekilaltik. Jaʼ yuʼun kʼalal mu to xlik achan Avivliae kʼanbo koltael Dios yoʼ skoltaot ta yaʼibel smelolal, sventa mu xchʼay ta ajol xchiʼuk yoʼ xavakʼ ta akuxlejale (Esd. 7:10).
Oyuk kʼusitik xa jakʼbe aba. Kʼalal yakal chachan batel Avivlia o li yan vunetike, xiuk xajakʼbe abae: «¿Kʼusi chchanubtasun ta sventa Jeova li kʼusi la jchane? ¿Kʼuxi te nitil skʼoplal xchiʼuk li kʼusi chal sliklej li Vivliae? ¿Kʼuxi xuʼ jtunes li kʼusi yakal ta jchan yoʼ jkolta li yantike?».
Nopbo skʼoplal li kʼusitik chachane. Kʼalal oy kʼusi yakalot ta xchanele, pajan xchiʼuk xiuk xa jakʼbe abae: «¿Kʼu yelan chkaʼi jba yuʼun li kʼusi chalbe skʼoplale? ¿Kʼu yuʼun ti jech chkaʼi jba yuʼune? ¿Kʼuxi te stsakojbe sba skʼoplal xchiʼuk li kʼusitik echʼem ta jkuxlejale, ti kʼu yelan jkuxlejal li avie xchiʼuk ta sventa li kʼusi xuʼ jnuptan ta jelavele? ¿Kʼuxi xuʼ xkakʼ ta jkuxlejal li tojobtasel xchiʼuk li beiltaseletik liʼe?» (Job 23:5; Sal. 49:3). Nopbo skʼoplal xtok mi xchapbe avuʼun smelolal kʼu yuʼun chalbutik Jeova ti xkiktatik jtosuk jtalelaltik xchiʼuk kʼusi vokolil xuʼ jnuptantik mi muʼyuk la jchʼuntike (Deut. 32:28, 29).
Tuneso anopben kʼalal chachan li loʼiletik ta Vivliae. ¿Mi xnop avuʼun kʼalal laj yichʼ chonel batel yuʼun sbankiltak li Jose ta stojolal li j-ismaeletike? (Gén. 37:18-28). ¿Mi xavil kʼusi yakal tspasik? ¿Mi xavaʼi kʼusi yakal chkʼot ta pasel? ¿Mi xavaʼibe smuil li kʼusitike? Nopo noʼox ti te xa oyote xchiʼuk xi xajakʼbe abae: «¿Kʼusi yakal tsnopik? ¿Kʼu yelan chaʼi sbaik?». Kʼalal jech chapase, te xa oyot chavaʼi aba xchiʼuk mas chatabe sbalil li kʼusi yakalot ta xchanele.
Tuneso li abtejebaletik ti pasbil sventa xasabe mas skʼoplal kʼalal chanunaje. Ojtikino li koltaeletik oy ta akʼop li ta jpajinatik ta Internet xchiʼuk li vunetik ti pasbilik imprimire. Mu xaxiʼ ta skʼanbel koltael yantik sventa lek xachan stunesele. Jech kʼuchaʼal li Índice de las publicaciones Watch Tower xchiʼuk li Saʼobil sventa xchanik mas li stestigotak Jeovae tsjambe smelolal epal tekstoetik ta Vivlia xchiʼuk yan kʼusitik. Jech xtok, li ta foyeto Koltael sventa xchanel Skʼop Diose chalbe skʼoplal kʼu yelan li osiletik ta skʼakʼalil Vivliae, ti kʼu yelan xcholet kʼotanuk ta pasel li loʼiletike, ti kʼu toʼox yelan tspʼisik li kʼusitik oy yuʼunike xchiʼuk yan kʼusitik.
Vuleso ta ajol li kʼusitik mas tsots skʼoplale. Taje jaʼ tskoltaot yoʼ teuk ta ajol li kʼusi laj achane. Jech xtok, mas toj lek mi la loʼiltabe yantik li kʼusi laj achane. Jakʼbo aba: «¿Mi xuʼ jtunes ta cholmantal li kʼusi la jchane?». Li kʼusitik laj xa kalbetik skʼoplale jaʼ tskoltaot yoʼ xkom ta ajol li kʼusitik tsots skʼoplal chachane, vaʼun xuʼ xatunes yoʼ xa kolta li yantike.