Kʼalal tstsakot tsatsal chamele

Xi chal Linda ti 71 sjabilale: «Kʼalal la stabeikun kanser ta jpulmon xchiʼuk ta jbikile, xkoʼolaj ti laj yalbeikun ti chicham xae. Pe kʼalal likʼot ta jnae, xi la jnope: ‹Muʼyuk jnopoj ti jech chalbeikune, pe skʼan jkʼel kʼuxi xuʼ xkuch kuʼun batel li chamele›».

Xi chal Elise ti 49 sjabilale: «La stsakun jtos tsatsal chamel ta jot xokon jsat ti solel kʼux tajeke. Bakʼintike, kʼalal kʼux tajek chkaʼie, ta jvul-o tajek koʼonton. Ep ta velta jtuk laj kaʼi jba xchiʼuk tal ta jol ti jaʼ mas lek ti jmil jbae».

Te xchiʼuk yutsʼ yalal jun vinik ti oy ta siya de ruedae

MI OY junuk avutsʼ avalal o mi voʼot ti stsakojot tsatsal chamel ti muʼyuk xa xpoxile, xavaʼibe smelolal ti kʼu to xkʼuxul taje. Maʼuk noʼox ti kʼux tajeke, yuʼun chkʼunibik-o ta skoj ti chat yoʼontonike. Mas to chiʼik-o xchiʼuk tsvul-o tajek yoʼontonik ti skʼan xbatilanik ta doktore, ti mu xtoj yuʼun li xpoxilike o ti vokol ta taele xchiʼuk ti xuʼ x-ipajik-o li poxiletike. Li tsatsal vul oʼonton ti xuʼ xij-ipaj-oe mas to tslubtsanutik.

¿Kʼusi xuʼ skoltaot mi jech kʼot ta atojolale? Epal krixchanoetike te staoj stsatsal yoʼontonik li ta orasione xchiʼuk li ta tekstoetik ta Vivlia ti tspat tajek oʼontonale. Li buchʼutik xuʼ spat koʼontontik xtoke jaʼ li kutsʼ kalaltik xchiʼuk li kamigotaktik ti skʼanojutik tajek xchiʼuk ti tskʼan tskoltautike.

LI KʼUSI SPASOJIK LI JUNANTIK KRIXCHANOETIKE

Xi chtojobtasvan Robert ti 58 sjabilale: «Sventa xkuch batel avuʼun li achamele, pato avoʼonton ta stojolal li Diose, vaʼun tskoltaot. Kʼopono li Jeovae, albo ti kʼu yelan chavaʼi abae xchiʼuk kʼanbo xchʼul espiritu. Kʼanbo ti akʼo skoltaot sventa junuk noʼox avoʼonton xilik li avutsʼ avalale».

Xi to chal li Roberte: «Tskoltaot tajek kʼalal tspatik avoʼonton li avutsʼ avalale xchiʼuk ti teuk xchiʼinojoxuke. Oy junantik kutsʼ kalal ti skotol kʼakʼal tskʼoponikun talel sventa tsjakʼik mi lek oyune. Jech xtok, tspatbeikun tal koʼonton li kamigotak ta yantik lume. Taje jaʼ skoltaojun sventa junuk noʼox koʼonton xchiʼuk ti mu xilubtsaje».

¿Mi oy junuk avamigo ti ip chaʼie xchiʼuk ti oy ta avoʼonton chbat akʼele? Kʼelo avil li kʼusi chal Lindae: «Li buchʼu ip chaʼie tskʼan ti lekuk noʼox li xkuxlejale xchiʼuk mu van skʼan ti jaʼ sloʼilta skotol ora li xchamele. Jaʼ yuʼun, oyuk kʼusi yan xaloʼiltaik».

Ta skoj ti tskoltaot li Diose, ti tspat avoʼonton li Vivliae, ti skʼanojoxuk li avutsʼ avalal xchiʼuk li avamigotake, chavakʼ venta ti oy tajek sbalil li akuxlejal akʼo mi tsots ipote.

Tekstoetik ta Vivlia ti xuʼ skoltaote

Kʼanbo koltael li Diose

«Oy kʼusi la jkʼanbe li Jeovae, vaʼun la stakʼbun. Jaʼ la skoltaun lokʼel ta sventa li kʼusitik ta xixiʼoe. Voʼon ti bikʼit kakʼoj jbae la jta ta kʼoponel li Jeovae, vaʼun la xchikintabun» (Salmo 34:4, 6).

Xi chal li Lindae: «Muʼyuk bu ta jkʼanbe vokol Dios ti akʼo xpoxtaune. Jaʼ ta jkʼanbe ti akʼo yakʼbun stsatsal koʼontone xchiʼuk ti stsʼikuk batel kuʼun li jchamele».

Chanilano Vivlia sventa stsatsub li avoʼontone

«Mi junuk jnaklej ta balumil xi chale: ‹Toj ipun›» (Isaias 33:24).

Nopbo skʼoplal li kʼusi yaloj tspas Dios ta jelavele. Yuʼun jaʼ tstsatsubtas li spatobil avoʼontone xchiʼuk jaʼ tskoltaot sventa xkuch batel avuʼun.

Kʼanbo koltael avutsʼ avalal xchiʼuk avamigotak

«Li melel amigoile skotol ora chakʼ ta ilel ti chkʼanvane xchiʼuk jaʼ jchiʼiltik ta vokʼel chkʼot kʼalal oy jvokoltike» (Proverbios 17:17).

Xi chal li Elise: «Mu xanamaj. Akʼo skoltaoxuk li avamigotake. Bakʼintike, atuk van chavaʼi aba xchiʼuk chanop ti mu xchikintabot li Diose, pe mu me xanamaj».