Kʼalal tsmukul satiot li anup achiʼile

Xi chal María ta España: «Chicham xa laj kaʼi kʼalal laj yalbun jmalal ti chbat yikʼ jun ants ti mas to tsebe. Toj chopol li kʼusi la spase. Jkʼuxubinoj toʼox tajek...».

Xi chal Bil ta España: «Ta anil noʼox laj yiktaun li kajnile. Li vaʼ orae, xkoʼolaj ti chicham xa laj kaʼie. Te laj skʼoplal skotol li kʼusitik toʼox jnopoj ta jpaskutike xchiʼuk li kʼusi ta jkʼankutike. Bakʼintike, jun xa koʼonton yaʼel, pe ta anil noʼox ta jvul koʼonton yan velta».

CHAKʼBE tajek svokol snup xchiʼil li buchʼu chmukul sativane. Junantike chakʼik ta perton snup xchiʼilik mi la sutes yoʼontone, vaʼun chakʼik persa sventa lekuk xil sbaik yan velta.a Pe akʼo mi chchʼak sbaik o mi muʼyuk, chil-o svokol li buchʼu chichʼ mukul satiele. ¿Kʼusi xuʼ skoltaot mi lajem tajek avoʼontone?

TEKSTOETIK TA VIVLIA TI XUʼ SKOLTAOTE

Akʼo mi kʼux tajek chaʼiik li buchʼutik mukul satiatik yuʼun snup xchiʼilike, te staoj spatobil yoʼontonik li ta Vivliae. Laj yakʼik venta ti muʼyuk iktabilik yuʼun li Diose xchiʼuk snaʼoj ti kʼu to xkʼuxul chaʼiike (Malakias 2:13-16).

«Kʼalal mu xa jnaʼ kʼusi ta jpas yuʼun li vokolile, voʼot la apatbun koʼonton xchiʼuk la apasbun ta jun koʼonton» (Salmo 94:19).

Xi chvul ta sjol li Bile: «Kʼalal la jchan li teksto liʼe, xkoʼolaj ti yakal tsmeyun Jeova ta sjunul yoʼonton laj kaʼie, jech kʼuchaʼal tspas jun jkʼanvanej totile».

«Tukʼ chavakʼ aba ta stojolal li buchʼu tukʼ chakʼ sbae» (Salmo 18:25).

Xi chal Carmen ti oy jayibuk u laj yichʼ mukul satiel yuʼun smalale: «La smukul satiun li jmalale, pe jnaʼoj lek ti mu jechuk tspas li Jeovae, muʼyuk chiktaun li Stuke».

«Mu me kʼusi xavul-o avoʼontonik jsetʼuk, jaʼ lek albeik Dios ta orasion li kʼusi chavul-o avoʼontonike, ta sjunul avoʼontonik xakʼanik vokol [...]; vaʼun li jun oʼontonal yuʼun Dios ti toj echʼ xa noʼox lek ti jaʼ mu sta li snopben krixchanoetike chchabi avoʼontonik» (Filipenses 4:6, 7).

Xi chal li Sashae: «Ep ta velta la jchanilan li teksto liʼe. Kʼalal mas la jpas orasione, laj kaʼi ti la spasbun ta jun koʼonton li Diose».

Li buchʼutik laj xa kalbetik skʼoplale laj onoʼox van snopik ti muʼyuk xa kʼusi stakʼ spasike, pe la spat yoʼontonik ta stojolal Jeova xchiʼuk jaʼ koltaatik yuʼun li Vivliae. Xi chal kaʼitik li Bile: «Li xchʼunel koʼontone jaʼ laj yakʼbe sbalil li jkuxlejal kʼalal mu xa kʼusi stakʼ pasel laj kaʼie. Akʼo mi xkoʼolaj ti lixanav kʼuk sjalil laj kaʼi ‹ta stenlejaltik ti ikʼ tajeke›, muʼyuk bu xiktaun-o li Jeovae» (Salmo 23:4).

a Mi chakʼan chanabe to mas yaʼyejal ta sventa li yakʼel perton kʼalal oy buchʼu tsmukul sati snup xchiʼile, kʼelo li mantaletik lokʼ li ta revista ¡Despertad! 22 yuʼun avril ta 1999 ta pajina 3, 5 xchiʼuk 9.

Li kʼusi spasojik li junantik krixchanoetike

Nopbo skʼoplal li tekstoetik ta Vivlia ti tspat oʼontonale

Xi to chal li Bile: «La jchan li slivroal Jobe xchiʼuk ta tsʼakale la jchan li slivroal Salmose, vaʼun la jbon li versikuloetik ti xuʼ skoltaune. Laj kakʼ venta ti oy junantik yajtuneltak Dios ti jaʼ jech la svul yoʼontonik xchiʼuk tsots laj yil svokolik jech kʼuchaʼal chkaʼi jbae».

Paso li kʼusi lek chavaʼi spasele

Xuʼ skoltautik li lekil musikaetike. Xi chvul ta sjol li Carmene: «Kʼalal mu x-och jvayele, tskoltaun tajek kʼalal chkaʼi musikae». Junantike jaʼ chkoltaatik sventa junuk yoʼonton xaʼi sbaik kʼalal tsbonik kʼusitike, tspasik divujar, tslokʼesik foto xchiʼuk tsjalik o tstsʼisik kʼusitike. Mi ta jpastik li kʼusi ta jkʼupintike, tskoltautik sventa mu jvul tajek koʼontontik xchiʼuk ti junuk noʼox koʼontontike.

Alo ti kʼu yelan chavaʼi abae

Xi chvul ta sjol li Daniele: «Muʼyuk toʼox nopem xkaʼi yalbel yantik ti kʼu yelan chkaʼi jbae, pe skotol kʼakʼal la jkʼopon li jlekil amigotake. La jkʼoponik batel sventa xkalbeik ti kʼu yelan chkaʼi jbae o ta jtsʼibabeik batel ta karta. Taje toj ep la skoltaun». Xi to chal ek li Sashae: «Ep tajek la jtabe sbalil ti la skoltaikun li kutsʼ kalale. Skotol ora la skoltaun tajek li jmeʼe, yuʼun la xchikintabun kʼalal jaʼo ta jkʼan buchʼu ta jchiʼin ta loʼile. Jech xtok, li jtote la spatbun tajek koʼonton xchiʼuk laj yaʼibe smelolal ti kʼu yelan chkaʼi jbae».

Pasilano orasion

Xi chal li Carmene: «Skotol ora la jpas orasion. Laj kaʼi ti nopol oy ta jtojolal li Diose, ti chchikinta li kʼusi chkalbee xchiʼuk ti tskoltaune. Linopaj mas ta stojolal Dios kʼalal la jnuptan jvokole».