Kʼalal oy buchʼu chcham avuʼune

Xi chal Vanessa ta Australia: «Li jbankil o jxiʼmele ta anil noʼox cham, muʼyuk xa ox kʼusi stakʼ jpas sventa jkolta. Kʼalal echʼem xa ox junchib ue, xkoʼolaj ti oy buchʼu tspajbun kuchilu ta koʼonton kʼalal chvul ta jol ti kʼu toʼox yelane. Bakʼintike, ta jech noʼox chkap jol. ¿Kʼu yuʼun ti chame? Chopol chkaʼi jba xtok ti muʼyuk jal la jchiʼine».

MI OY buchʼu chamem avuʼune, xuʼ van jaʼ jech kʼux chavaʼi, atuk chavaʼi aba o mu xa kʼusi spas avuʼun chavaʼi. O xuʼ van ta jech noʼox chkap ajol, oy amul chavaʼi aba xchiʼuk jech noʼox chaxiʼ. Ta skoj taje, xuʼ van chanop ti muʼyuk xa sbalil ti kuxulote.

Teuk me ta ajol ti maʼuk skʼan xal ti muʼyuk tsots avoʼonton kʼalal chavokʼita li buchʼu chamem avuʼune, moʼoj, yuʼun jaʼ jech chavakʼ ta ilel ti akʼanoj tajeke. Pe ¿kʼusi xuʼ skoltaot sventa mu xavul tajek avoʼontone?

LI KʼUSITIK SPASOJ JLOM KRIXCHANOETIKE

Akʼo mi muʼyuk xa kʼusi spat avoʼonton yaʼeluk, xuʼ skoltaot li tojobtaseletik ta jkʼeltik batele.

JAʼ MAS LEK TI XA-OKʼE

Mu skotoluk krixchanoetik koʼol kʼu yelan chaʼibeik xkʼuxul kʼalal oy buchʼu chcham yuʼunike xchiʼuk mu koʼoluk ti kʼu sjalil tsvul tajek yoʼontonike. Akʼo mi jech, xuʼ me skoltaot kʼalal cha-okʼe. Li Vanessa ti laj xa kalbetik skʼoplale xi chale: «Naka okʼel ta jpas. Yuʼun jaʼ to jech xkuxet chkaʼi». Li Sofía ti anil noʼox cham li xvixe xi chale: «Toj kʼux chkaʼi kʼalal chvul ta jole xchiʼuk chkat-o tajek koʼonton, xkoʼolaj jech xkʼuxul kʼalal chchaʼjatik li jyayijemaltik ti chpojovin sventa xpoxtaike. Akʼo mi toj echʼ noʼox kʼux, pe jaʼ sventa xkol li jyayijemaltike».

ALO TI KʼU YELAN CHAVAʼI ABAE XCHIʼUK LI KʼUSI CHANOPE

Stalel onoʼox ti oy bakʼintik chakʼan atuk oyote, pe mu me xuʼ avuʼun stsʼikel batel atuk li xkʼuxul chavaʼi ti oy buchʼu cham avuʼune. Kʼalal 17 toʼox sjabilal li Jarede, jaʼo cham li stote. Xi chvul ta sjole: «Bakʼintike, muʼyuk van smelolal ti kʼu yelan chikʼopoje, pe toj ep la skoltaun kʼalal la jloʼiltabe yantik ti kʼu yelan chkaʼi jbae». Li Janice ti laj xa onoʼox kalbetik talel skʼoplal li ta baʼyel mantale staojbe sbalil ek ti yalojbe yantik ti kʼu yelan chaʼi sbae. Xi chale: «Toj echʼ noʼox la skoltaun. Laj kakʼ venta ti oyikun ta yoʼontonike xchiʼuk mu xa toj masuk jtuk laj kaʼi jba».

CHʼAMO KOLTAEL

Xi chal jun doktorae: «Li buchʼutik chakʼik ti akʼo xkoltaatik yuʼun li yamigotakik xchiʼuk yutsʼ yalalike jaʼ me mas kʼun chaʼiik stsalel ti kʼu yelan chaʼi sbaik ta tsʼakale». Albo avamigotak li kʼusi stakʼ spasik sventa skoltaoxuke. Tskʼan onoʼox tskoltaoxuk, pe mu van snaʼik kʼuxi tspasik (Proverbios 17:17).

NOPAJAN MAS TA STOJOLAL LI DIOSE

Xi chal li Tinae: «Kʼalal cham ta anil jmalal ta skoj li kansere, muʼyuk xa buchʼu jpat-o koʼonton laj kaʼi, vaʼun jaʼ xa lik kalbe skotol li Diose. Kʼalal chijulave, la jkʼanbe ti akʼo yakʼbun kipal sventa lekuk x-echʼ kuʼun li kʼakʼale. Jeltos kʼu yelan la skoltaun li Diose...». Kʼalal 22 toʼox sjabilal li Tarshae, jaʼo cham li smeʼe. Xi chvul ta sjole: «Jaʼ la spatbun tajek koʼonton kʼalal la jchan jujun kʼakʼal li Vivliae, yuʼun oy kʼusitik lek chakʼ jnop».

NOPBO SKʼOPLAL LI CHAʼKUXESELE

Xi to chal li Tinae: «Ta slikebale, mu noʼox spatbun koʼonton laj kaʼi li chaʼkuxesele. Yuʼun ta jkʼan ti te jchiʼinojuk li jmalale xchiʼuk tskʼanik ti xkoltaatik yuʼun stotik li kalabtake. Pe kʼalal echʼem xa ox chanib jabile, solel mas la jtikʼ ta koʼonton li spatobil oʼontonal taje. Vaʼun, jaʼ la skoltaun tal sventa xkakʼbe-o yipal. Kʼalal ta jnop ti chkil jbakutik yan veltae, chakʼbun jmuyubajel xchiʼuk jun oʼontonal».

Mu van ta aniluk ti jun xa avoʼonton chavaʼi abae, pe xuʼ skoltaot li kʼusi chal Vanessae. Xi chale: «Xuʼ van chanop ti mu x-echʼ avuʼune, pe ta kʼunkʼun mas xa lek chavaʼi aba».

Teuk me ta ajol liʼe: akʼo mi chanaʼ tajek li buchʼu cham avuʼune, mu me xanop ti muʼyuk sbalil ti kuxulote. Li Diose tskoltaot sventa xakʼupin akuxlejal xchiʼuk li avamigotake xchiʼuk ti xatabe sbalil li akuxlejale. Jutuk xa me skʼan xchaʼkuxes animaetik li Diose. Li Stuke tskʼan ti xavil yan velta li avutsʼ avalale xchiʼuk ti muʼyukuk xa kʼusi kʼux chavaʼi ta sbatel osile.

Tekstoetik ta Vivlia ti xuʼ skoltaote

Li Diose snaʼoj ti kʼu yelan chavaʼi abae

Jun jtsʼibajom ta Vivlia xi laj yalbe li Diose: «Chʼamo li yaʼlel jsat ta yav voʼ avuʼun ti pasbil ta nukule. ¿Mi mu teuk tsʼibabil li ta alivroe?» (Salmo 56:8).

Albo Dios ti kʼu yelan chavaʼi abae

«Chkalbe skotol jvokol [...]. Kajval Jeova,a xivokolet ta atojolal sventa xakoltaun» (Salmo 142:2, 5).

Oy spatobil avoʼonton

«Chchaʼkuxiik» (Echos 24:15).

Li Diose yaloj ta jamal ti ta xchaʼkuxes li buchʼutik chamemike xchiʼuk oy tajek ta yoʼonton tspasb (Job 14:14, 15, tsʼib ta yok vun).

a Li ta Vivliae chal ti jaʼ Jeova sbi li Diose.

b Mi chakʼan chanabe to mas yaʼyejal ta sventa li chaʼkuxesele, kʼelo li xchanobil 30 li ta livro Kʼupino akuxlejal ti pasbil yuʼun stestigotak Jeovae. Xuʼ xayales ta www.jw.org.