¿Mi chapalun van sventa ta jchol mantal?
1. ¿Kʼu yuʼun mu stakʼ ti mu xi jtojob chkaʼi jbatik ta chol mantale?
1 Mi oy jech ajakʼojbe aba taje, ¡mu xa vat avoʼonton! Li kʼusi tskoltautik sventa xi jtojob ta chol mantale, maʼuk mi ep chanunajemotike o ti yuʼun jech xa onoʼox li jvokʼe. Vuleso ta ajol ti junantik baʼyel yajtsʼaklom Cristoe «muʼyuc chanubtasbilic, xchiʼuc [...] muʼyuc yabteli[k]», xi albat skʼoplalik, akʼo mi jech, lek tojobik ta xcholel li lekil aʼyeje. ¿Kʼu yuʼun? Yuʼun oy tajek ta yoʼontonik chchanbeik li Jesuse (Hech. 4:13; 1 Ped. 2:21).
2. Alo junantik kʼuyelan chanubtasvan li Jesuse.
2 Kʼuyelan chanubtasvan li Jesuse. Li Jesuse kʼun noʼox chchanubtasvan, lek jtunel xchiʼuk kʼun noʼox ta aʼibel smelolal. Li slikeb sloʼile, li lokʼol kʼopetik xchiʼuk li sjakʼobiltak tstunese lek kʼun ta aʼibel smelolal (Mat. 6:26). Jech xtok oy ta yoʼonton li krixchanoetike (Mat. 14:14). Maʼuk noʼox taje, yuʼun muʼyuk xchibet ikʼopoj xchiʼuk muʼyuk bu xiʼ, yuʼun snaʼoj ti chkoltaat yuʼun Jeovae, ti jaʼ li buchʼu take tal ta spasel li yabtele (Luc. 4:18).
3. ¿Kʼuxi chi skoltautik Jeova sventa jpas li kabteltik ta chol mantale?
3 Li Jeovae chi skoltautik. Li sKʼope xchiʼuk li s-organisasion li Mukʼul Jchanubtasvanej kuʼuntike jaʼ chi xchapanutik ta sventa li kʼusi chtun kuʼuntik yoʼ lek xchol batel kuʼuntik li lekil aʼyeje (Isa. 54:13). Li Jeovae laj yakʼ ta tsʼibael komel kʼuyelan chanubtasvan li Jesuse, ti xuʼ jchantik xchiʼuk ti xuʼ jpastik batele. Chakʼbutik li xchʼul espiritue xchiʼuk chi xchanubtasutik li ta tsobajeletike (Juan 14:26). Sventa xi jtojob ta chanubtasvaneje, yakʼojbutik xtok jcholmantaletik ti lek chanemike.
4. ¿Kʼusi srasonal oy kuʼuntik sventa chapaluk xkaʼi jbatik ta xcholel li lekil aʼyeje?
4 Jech un chaʼa, chʼabal srasonal ti mu xuʼ kuʼuntik chkaʼi jbatike, yuʼun «scotol li cʼusi ta jpas[tike] maʼuc yuʼun toj lec xuʼ cuʼun [jtuktik]. Jaʼ Dios chiscoltau[tik] ta spasel scotol» (2 Cor. 3:5). Mi ta jkʼanbetik koltael Jeova xchiʼuk lek ta jtunestik skotol li kʼusitik ta slekil yoʼonton yakʼojbutike, «chijbijub [...], [xchiʼuk] jech lec chapalutic ta spasel scotol lequil abtel» (2 Tim. 3:17).