Jvokʼ ti bu oy sjakʼobile
◼ Li yajrextikotak Jeovae, ¿mi stakʼ spukik batel li gravasionetik o skopiail li mantaletik chichʼ jelubtasel ta tsobajele?
Li mantaletik chjelav ta tsobajeletike tspatbutik koʼontontik xchiʼuk tstsatsubtasutik (Hech. 15:32). Jaʼ yuʼun, stalel onoʼox ti ta jkʼan chkakʼbetik yaʼi li buchʼutik muʼyuk xaʼiik li mantaletik tspat oʼontonale. Ta skoj li kʼusitik achʼik chlokʼane, li mantaletik ta xjelave xuʼ xichʼ pasel gravar xchiʼuk xichʼ noʼox pukel ta anil. Oy buchʼutik skʼejojanik mantaletik ti spasojik gravare, akʼo mi voʼneik xa, ta slekil yoʼontonik ta xakʼik ta chʼamunel o ta spasik gravar sventa xaʼi li yamigotakike. Yantike stikʼojik ta Internet xchiʼuk te yakʼojik mantaletik ta Vivlia ti xuʼ syalesik li buchʼutik skʼanike.
Melel onoʼox ti muʼyuk chopol kʼalal chichʼ pasel gravar li mantaletik ta Vivlia sventa kuʼuntike o sventa li kutsʼ kalaltike. Jech xtok li moletik ta tsobobbaile xuʼ skʼanbeik junuk ermano ti akʼo spas gravar sventa li ermanoetik ti ip chaʼiike xchiʼuk ti mu xuʼ yuʼun xbatik li ta tsobajeletike. Pe, oy lek srasonal ti mu jpuktik batel ta yantik li kopiaetik o gravasionetik ta sventa li mantaletik ta Vivliae.
Ta skoj ti chichʼ tsakel ta venta kʼusitik jaʼ noʼox sventa li buchʼutik te ta jun tsobobbail kʼalal chichʼ jelubtasel li mantaletik ta Vivliae xuʼ yan-o xichʼ aʼibel smelolal jlomuk li mantaletik kʼalal xpuket chbat ta yantike, yuʼun mu jnaʼtik kʼusi laj stsakik ta venta kʼalal laj yichʼ jelubtasel li mantal taje. Jech xtok, tsots ta naʼel buchʼu xchiʼuk bakʼin la sjelubtas sventa jnaʼtik mi xuʼ jpat koʼontontik ti muʼyuk jelem-o li smelolale xchiʼuk ti melel li kʼusitik albil tee (Luc. 1:1-4). Yan xtoke, kʼalal chichʼ pukel batel ta yantik li mantaletik ta Vivlia xchiʼuk li gravasionetike xuʼ van skʼanik-o ichʼel ta mukʼ li buchʼutik la sjelubtasike o voʼotik jech chkichʼtik ta mukʼ ti mu jechuk smelolale (1 Cor. 3:5-7).
Li j-abtel ti tukʼ yoʼonton, ti lek pʼije tsots ch-abtej sventa chakʼ veʼlil ta mantal «cʼalal ta sta [yoraile]» (Luc. 12:42, Ch). Li veʼlil ta mantal taje te tsakal skʼoplal xchiʼuk li mantaletik ch-echʼ li ta stsobajel yajrextikotak Jeovae xchiʼuk li ta gravasionetik ti xuʼ jyalestik ta Internet ta www.jw.org. Xuʼ jpat lek koʼontontik ti j-abtel ti tukʼ yoʼonton, ti lek pʼij xchiʼuk li Jtsop Jbeiltasvanej yuʼune ta xakʼbutik li kʼusi chtun kuʼuntik sventa tsotsuk-o li xchʼunel koʼontontike (Hech. 16:4, 5).