Kʼuxi xuʼ jtunestik li gravasionetike
1. Li avie oy kuʼuntik vunetik ti pasbil imprimire, pe ¿kʼusi to yan oy kuʼuntik ti toj jtunelike?
1 Koliyal li jpajinatik ta Internet jw.org, ep buchʼutik staojbeik sbalil kʼalal tskʼelik li mantaletik ti chkʼot ta oʼontonale xchiʼuk ti melelike (Ecl. 12:10). Pe, ¿mi oy xa achikintaoj li gravasionetike? Jutuk mu skotoluk li vunetik ti oy ta jpajinatike, pasbil gravar xtok. ¿Kʼuxi xuʼ jtabetik sbalil?
2. ¿Kʼuxi xuʼ jtunestik li gravasionetik kʼalal ta jchan Jvivlia jtuktik xchiʼuk li ta kutsʼ kalaltike?
2 Sventa xachan Avivlia atuk xchiʼuk avutsʼ avalal. Jtos ti kʼuxi xuʼ jtunestik lek li jujun kʼakʼal chjelav kuʼuntike jaʼ ti jchikintatik li gravasionetik kʼalal oy bu chijbat o kʼalal oy kʼusi ta jpastike, jech kʼuchaʼal Vivlia, revista o yan vunetik (Efes. 5:15, 16). Li kʼusitik yan xuʼ jpastik li ta yichʼel ta mukʼ Jeova ta kutsʼ kalaltike jaʼ ti jchikintatik ta gravasion xtok li vun ti yakal ta jkʼeltik sventa jtsʼaklitik batele. Kʼalal ta jchan Jvivlia jtuktike, li gravasionetike tskoltautik sventa jchantik lek skʼelel vun o mi yakal ta jchantik junuk batsʼikʼope xuʼ me skoltautik.
3. Li krixchanoetik ta jtatik ta cholmantale, ¿buchʼutik ti mas chtun yuʼunik li gravasionetike?
3 Ta cholmantal. Ep li buchʼutik ta jtatik ta cholmantale chalik ti muʼyuk xokolik sventa skʼelik li vunetike, pe yikʼaluk van oy ta yoʼontonik chchikintaik junuk gravasion. Li jlom xtoke yan-o skʼopik, pe yikʼaluk van oy ta yoʼontonik chchikintaik li mantal mi oy ta skʼop stukike (Ech. 2:6-8). Li ta junantik lume toj tsots skʼoplal ti stsʼetan lek xchikinike. Jun skʼelobile, li buchʼutik chkʼopojik ta hmong kʼope nopem xaʼiik chalbeik komel sloʼil xkuxlejalik li yalab xnichʼnabike, vaʼun xuʼ jech xvul lek ta sjolik li kʼusi laj yichʼik albel komele. Oy epal lumetik ta Africae ti tskʼupinik tajek xchikintael loʼiletik sventa oy kʼusi xuʼ xchanik.
4. ¿Kʼusitik baʼyel skʼan jakʼbe jbatik mi ta jtunestik gravasion li ta cholmantale?
4 Ti bu ta jcholtik mantale, ¿mi lek ti jtijbetik uni jlikeluk gravasion li krixchanoetik sventa xchikinta ta skʼop stukike? ¿Mi oy buchʼu xavojtikin ti chtun yuʼun jlikuk vun ti pasbil gravar sventa jtakbetik batel ta koreoe? Kʼalal chkakʼbetik jlikuk vun li krixchano ti lek chaʼi mantale, ¿mi lek van ti jyalestik ta disko li vun ti pasbil gravar sventa jmoj xkakʼbetik komele? Kʼalal chkakʼtik sliklej li livroetik, foyetoetik, revistaetik o tratadoetik ti pasbil gravare, xuʼ me jtsak ta j-informetik. Li gravasionetike maʼuk noʼox me sventa jtunes jtuktik kʼalal ta jchan Jvivliatike, yuʼun chtun xtok sventa jtsʼunbetik-o ta yoʼonton mantal li krixchanoetike (1 Kor. 3:6).