¿Kʼusi xuʼ xapas sventa xachan Avivlia jujun kʼakʼal?

Ta skoj ti ep noʼox kʼusi chapase, ¿mi vokol chavaʼi ti oyuk lek yorail avuʼun sventa xachan jujun kʼakʼal li Avivliae? (Jos. 1:8). Mi jaʼ jeche, xuʼ xapas jtosuk liʼe:

• Tikʼo a-alarma jujun kʼakʼal. Akʼo a-alarma ta aselular sventa xvul ta ajol ti jaʼ xa yorail chachan Avivliae.

• Te xakajan Avivlia ti bu xata ta kʼelele. Mi ta vun chakʼel Avivliae, teuk xakajan ti bu xata ta kʼelel jujun kʼakʼale (Deut. 11:18).

• Chikintao li Vivlia ta audioe. Kʼalal yakal cha-abteje, xuʼ xachikinta li audioetike. Li Tara ti oy oxvoʼ yalabe, ti jaʼ prekursorae xchiʼuk ti ch-abtej ta akʼobaltike, xi chale: «Kʼalal jaʼo ta jpas li kʼusitik skʼan pasel ta jnae, ta jchikinta li Vivlia ta audioe, taje jaʼ tskoltaun sventa mu xkikta jba ta xchanel li Jvivliae».

• Mu xavikta aba xchanel junuk kʼakʼal. Mi oy kʼusi la smakot xchiʼuk ti muʼyuk xakʼ yorail la achan Avivlia ti jayib ora anopoje, chano junchibuk versikulo kʼalal skʼan toʼox xbat vayane. Akʼo mi juteb xachan, ta me xatabe sbalil (1 Ped. 2:2).