«¡Voʼote xuʼ lek xa tun ta prekursoral!»
1. ¿Kʼu toʼox yelan chaʼi sba jun ermana ti chtun ta prekursorale?
1 «Muʼyuk yan abtelal jech yakʼojbun muyubajel xchiʼuk epal bendisionetik ta mantal.» Xi laj yal Kathe B. Palm, li stuke oy jaylajunebuk jabil tun ta prekursoral ta yosilal Chile, ta Sudamérica. Ta skoj li kʼuyelan xkuxlejal li buchʼutik ch-abtejik ta tsʼakal orae, yikʼaluk van oy buchʼu xi yalojbote: «¡Voʼote xuʼ lek xa tun ta prekursoral!».
2. Alo kʼu yuʼun chakʼ xkuxetel oʼontonal li abtelaletik sventa mantale.
2 Kuxlejal ti chakʼ jun oʼontonale. Li Jesuse, ti jaʼ xuʼ jchanbetike, jaʼ sveʼel laj yaʼi spasbel li kʼusi tskʼan yoʼonton sTote, yuʼun jaʼ te tsta yipal (Juan 4:34). Jaʼ yuʼun laj yalbe yajtsʼaklomtak ti jaʼ noʼox te chichʼ tael melel muyubajel mi jaʼ chbat ta koʼontontik spasel li abtelaletik sventa yichʼobil ta mukʼ Jeovae. Xkuxet noʼox koʼontontik mi jaʼ ta jpastik li kʼusitik lek chil Jeovae. Ta melel, kʼalal mas ta jchʼak jkʼakʼaltik, kipaltik xchiʼuk kʼusitik oy kuʼuntik ta skoltael li krixchanoetike mas me xi jmuyubaj (Hech. 20:31, 35).
3. ¿Kʼusi muyubajel ta jtatik mi mas ta jchʼakbetik yorail li chol mantale?
3 Mi te xi jtijet noʼox ta chol mantale, mas me xuʼ jlikestik xchiʼuk xkakʼtik chanubtasel ta Vivlia, ti jaʼ chakʼbutik mas muyubajele. Akʼo mi mu skʼanik mantal chavil yileluk li yajval naetike, pe mi lik achan lek xcholel mantale xuʼ labal sba chavil ti oy buchʼutik ep lek chaʼiik li bu cha chol mantale. Mi jun xaʼox jabil o mas cha tun ta prekursorale, ta xavichʼ lek chanubtasel li ta Chanob vun sventa Abtelal ta Prekursore, ti xuʼ skoltaot lek li ta chol mantale (2 Tim. 2:15). Mi kuch avuʼune, te chavakʼ venta ti xuʼ lek xakʼ sat li bekʼ tsʼunobal cha tsʼune (Ecl. 11:6).
4. ¿Kʼusi skʼan snopik li kerem-tsebetik ti tstsuts xa yuʼunik chanune?
4 Nopo avaʼiik lek kerem-tsebetik. Mi poʼot xa stsuts avuʼun li chanune, ¿mi la anop xa kʼusi cha pas ta tsʼakal? Li avie mu xa xokob van lek chavaʼi ta skoj li atareatake. ¿Pe bu xa van cha tunes li akʼakʼal mi la lokʼ ta chanune? ¿Kʼu yuʼun mu xa pas orasion sventa xa kʼel mi xuʼ xa och ta prekursor regular, ti maʼuk xbat ta avoʼonton li mukʼ ta chanune? Li kʼuyelan cha chan batel xcholbel mantal li krixchanoetik ti jeltos bu chʼiemik tale, stsalel li kʼusi cha smakote, kʼalal cha chan ti oyuk lek yorail avuʼun li kʼusitik cha pase xchiʼuk ti cha chan batel lek chanubtasvaneje, xuʼ xa tabe sbalil ta sjunul akuxlejal.
5. ¿Kʼuxi xuʼ stijik oʼontonal li totil-meʼiletik xchiʼuk li tsobobbail ta sventa li prekursorale?
5 Totil-meʼiletik, ¿mi yakal cha tijbeik yoʼonton avalab anichʼnabik sventa xlik tunikuk li ta yabtel Dios ta tsʼakal orae? Li kʼusi nopem xavaʼi cha loʼiltaike xchiʼuk li kʼusi lek chavakʼik ta ilel ta akuxlejalike jaʼ me xuʼ xkoltaatik sventa xakʼ baʼyel ta xkuxlejalik li Ajvalilal yuʼun Diose (Mat. 6:33). Ray, ti och ta prekursor kʼalal tsuts yuʼun chanune, xi chvul ta sjole: «Li jmeʼe snaʼoj onoʼox ti mas jun koʼontontik kʼalal chi jtun ta prekursorale». Jech xtok li ermanoetike xuʼ stijik oʼontonal ta sventa li prekursoral ta skoj ti lek chkʼopojik xchiʼuk ti chkoltavanik ta sventa li abtelal taje. José, ti likem ta Españae, xi chale: «Li ermanoetik ta jtsobobbaile toj lek onoʼox chilik li prekursorale, jaʼ ti kʼusi mas lek xuʼ stamik batel ta xkuxlejalik li kerem-tsebetike. Li kʼusitik chalike, li koltaele xchiʼuk ta skoj ti skʼanojik tajek li prekursorale, jaʼ la stij koʼonton sventa xi och li ta prekursore».
6. ¿Kʼusi xuʼ xa pas mi muʼyuk to ta avoʼonton li prekursorale?
6 Kʼuxi ta tsalel li kʼusi tsmakutike. «Pe muʼyuk oy ta koʼonton chi och ta prekursor», xuʼ van oy buchʼu jech chal. Mi jech cha nop taje, xuʼ xi xavalbe Jeova li kʼuyelan chavaʼi abae: «Mu jnaʼ mi xuʼ kuʼun li prekursorale, pe oy ta koʼonton ta jpas li kʼusi lek chavile» (Sal. 62:8; Pro. 23:26). Vaʼun saʼo beiltasel li ta sKʼope xchiʼuk li ta s-organisasione. Ep prekursor regularetike la spasik preva baʼyel li prekursor auksiliare, xmuyubaj tajek laj yaʼi sbaik, vaʼun la skʼelik kʼuxi xuʼ xtunik li ta spasbel yabtel Dios ta tsʼakal orae (Sal. 34:8).
7. ¿Kʼusi xuʼ xa pas mi mu stsʼaki chavaʼi li 70 ora ta jujun ue?
7 Yan kʼusi xuʼ smakutik xtoke jaʼ ti mu stsʼaki chkaʼitik jujun u li 70 orae. ¿Kʼu yuʼun mu xa chiʼin ta loʼil yan prekursoretik ti jech xkuxlejalik kʼuchaʼal voʼote? (Pro. 15:22.) Vaʼun tsʼibao ta vun li kʼutik yelan xuʼ xa abteje. Yikʼaluk van xavakʼ venta ti xchʼak noʼox akʼakʼal ta chol mantal mi jaʼ muʼyuk xa cha pas li kʼusitik mu masuk tsotsik skʼoplale (Efe. 5:15, 16).
8. ¿Kʼu yuʼun lek ti jkʼeltik kʼuyelan bakʼintik li jkuxlejaltike?
8 Kʼelo kʼuyelan li akuxlejale. Chjelilan li kuxlejale, jaʼ yuʼun lek ti jkʼeltik kʼuyelan bakʼintik li jkuxlejaltike. Jech kʼuchaʼal liʼe, ¿mi cha nop xa cha pas juvilar? Randy ti laj yikta yabtel kʼalal skʼan toʼox xkʼot yorail xuʼ spas juvilare, xi chale: «Li kʼusi kʼot ta nopel kuʼune jaʼ la skoltaun sventa xi och ta prekursoral xchiʼuk li kajnile, vaʼun li batkutik ti bu chtun mas jcholmantaletike. Toj ep bendision jtaoj... pe jtos li kʼusi mas tsots skʼoplale jaʼ ti sak li jol koʼontone».
9. ¿Kʼusi skʼan skʼelik li nupultsʼakaletike?
9 Jlom nupultsʼakaletike, baʼyel tskʼelik kʼuyelan li xkuxlejalike, vaʼun chakʼik venta ti mu persa sjunuluk kʼakʼal x-abtej xchaʼvoʼalike. Pe taje jaʼ skʼan xal ti skʼan sjutukajes kʼusitik ta xkuxlejalik li utsʼ-alalile, pe ep sbalil mi jech la spasike. Jaʼtik toe, sventa mas xokol xchol mantal li yajnil Johne laj yikta li yabtel ti sjunul kʼakʼal toʼox ch-abteje. Li Johne xi chale: «Toj lek chkaʼi ti sjunul kʼakʼal tspasbe yabtel Dios li kajnile».
10. ¿Kʼusi chtijbat-o yoʼontonik li yajtsʼaklomtak Cristo sventa snop chtunik ta prekursorale?
10 Yakʼel ta ilel kʼanelal xchiʼuk xchʼunel oʼontonal. Li abtelal mas tsots skʼoplal skʼan jpastike jaʼ li chol mantale, yuʼun jech yaloj li Jeovae. Li kʼusitik chkʼotanuk ta pasele nopol xa tajek skʼan xlaj xchiʼuk jaʼ noʼox chkolik li buchʼutik tskʼanbeik vokol Jeovae (Rom. 10:13). Mi ta sjunul koʼontontik jkʼanojtike xchiʼuk mi ta jtojbetik ta vokol li kʼusitik spasoj ta jtojolaltike, jaʼ me tstij koʼontontik sventa sjunul koʼontontik jcholtik li mantal ti laj yal komel li xNichʼone (Mat. 28:19, 20; 1 Juan 5:3). Jech xtok, mi jchʼunojtik ta melel ti kuxulutik ta slajeb kʼakʼale jaʼ me tstij koʼontontik sventa jcholtik li mantal bu kʼalal xuʼ kuʼuntik yoʼ to oy yoraile, ti maʼuk chbat tajek ta koʼontontik li kʼusitik oy ta balumile (1 Cor. 7:29-31).
11. ¿Kʼu yelan skʼan xkiltik kʼalal oy buchʼu chalbutik ti xuʼ lek xi tun ta prekursorale?
11 Kʼalal chi j-och ta prekursor regulare maʼuk noʼox ta jchʼamtik li kʼusi tskʼanbutik li s-organisasion Diose, moʼoj, yuʼun jaʼ svinajeb ti ta jkʼan chkichʼtik ta mukʼ li Diose. Jaʼ yuʼun, mi oy buchʼu xi laj yalbote: «¡Voʼote xuʼ lek xa tun ta prekursoral!» mi xie, naʼo ti yuʼun xuʼ avuʼune. Paso orasion xchiʼuk kʼelo mi xuʼ avuʼun sventa xa chiʼin ta abtel li buchʼutik jaʼ batem ta yoʼontonik spasel li abtelal chakʼ muyubajel taje.
[Tsʼib ti mukʼtik sletraile ta pajina 4]
Totil-meʼiletik, ¿mi yakal cha tijbeik yoʼonton avalab anichʼnabik sventa xlik tunikuk li ta yabtel Dios ta tsʼakal orae?
[Tsʼib ti mukʼtik sletraile ta pajina 5]
Li abtelal mas tsots skʼoplal skʼan jpastike jaʼ li chol mantale, yuʼun jech yaloj li Jeovae.