¿Mi oy tunemot ta prekursor regular?
1. ¿Kʼusi kʼupil sba matanal staoj epal jcholmantaletik, pe kʼusi persa spasojik li jlome?
1 Li jabiletik echʼem tale ta smilal xa noʼox jcholmantaletik skʼupinojik li abtelal ta tsʼakal ora sventa chcholbeik skʼoplal xchiʼuk ti chchanubtasvanik ta sventa li lekil aʼyeje (Hech. 5:42). Akʼo mi jech, oy jeltos srasonaltak ti yiktaojik prekursoral li jlome. ¿Mi oy toʼox la tun ta prekursor regular li ta voʼnee? ¿Mi akʼeloj xa mi xuʼ xa chaʼlikes yan velta?
2. ¿Kʼu yuʼun skʼan skʼel kʼuyelan xkuxlejalik avi li buchʼutik tunik toʼox ta prekursorale?
2 Chjel li kʼusitik ta jkuxlejaltike. Xuʼ van mu xa jechuk avokol ti kʼuyelan toʼox kʼalal la avikta li prekursorale. Jech kʼuchaʼal liʼe, mi jaʼ la avikta-o prekursoral ta skoj ti mu stsʼaki toʼox avuʼun li 90 ora ta jujun ue, ¿mi xuʼ xa chaʼlikʼes ti kʼajomal xa 70 ora ta tikʼele? ¿Mi mu xa bu mas tsmakot avabtel o kʼusitik abainoj ta avutsʼ avalal jech kʼuchaʼal kʼalal la avikta toʼoxe? Jun ermana ti laj yikta prekursoral ta skoj ti ipaje, la xchaʼlikes kʼalal 89 jabil xaʼox yichʼoje. Yuʼun mas xa ta jun jabil ti muʼyuk xkʼot ta ospitale xchiʼuk ti muʼyuk xa mas x-ipaje.
3. ¿Kʼu yelan xuʼ xkoltavan utsʼ-alalil sventa oy buchʼu junukal chtun yuʼunik ta prekursoral?
3 Xuʼ van jaʼ jun avutsʼ avalal ti buchʼu tun toʼox ta prekursorale, pe ti laj yikta ta skoj ti lik xchabi junuk avutsʼ avalalike, jech kʼuchaʼal atot ameʼik ti mol meʼelik xae (1 Tim. 5:4, 8). Mi jech taje, ¿mi oy van buchʼu yan xuʼ skolta li buchʼu laj yikta li prekursorale? ¿Kʼu yuʼun mu xa loʼiltaik taje? (Pro. 15:22.) Kʼalal tskolta sbaik li ta jun utsʼ-alalil sventa oy buchʼu junukal chtun yuʼunik ta prekursorale xuʼ xmuyubajik, yuʼun toj ep sbalil tstaik skotolik.
4. ¿Kʼusi xuʼ xa pas mi mu xuʼ xlik tunan yan velta ta prekursor li avie?
4 Mi mu xuʼ xlik tunan yan velta ta prekursor li avie, mu me xchibaj avoʼonton. Yuʼun ta skoj ti oy ta avoʼonton spasel jeche, lek chil li Jeovae (2 Cor. 8:12). Li kʼusitik la achan toʼox ta prekursorale xuʼ jech xa tunes kʼalal cha lokʼ ta chol mantale. Jaʼ lek kʼopono Jeova sventa taje xchiʼuk kʼelilano kʼusi xuʼ xa pas ta akuxlejal sventa xavepajes li chol mantal cha pase (1 Juan 5:14). Xuʼ van ta mas tsʼakal li Jeovae xa sjambot li «tiʼna, sventa lec xuʼ ep [cha] abteje» xchiʼuk jech cha chaʼkʼupin li prekursorale (1 Cor. 16:9).