¿Mi lek noʼox ta mantal li asate?
1. ¿Kʼusi skʼan xal ti «lec» noʼox ta mantal li jsatike?
1 Li kʼusi chil jsatike xuʼ jech chlik jpas li ta jtalelaltike. Jaʼ yuʼun jtunel tajek li kʼusi laj yal Jesuse: «Me lec li asatique lec sac osil chil scotol li abecʼtalique» (Mat. 6:22). Kʼalal «lec» noʼox ta mantal li jsatike jtos noʼox kʼusi skʼeloj batel: jaʼ li spasbel kʼusi tskʼan yoʼonton Diose. Jaʼ xkaltik, chkakʼ baʼyel ta jkuxlejaltik li Ajvalilal yuʼun Diose, maʼuk chbat ta koʼontontik ta saʼel o spasel kʼusitik ti mu masuk tsots skʼoplal liʼ ta balumil ti xuʼ jaʼ tsmakutik ta xcholel li mantale.
2. ¿Kʼusi xuʼ sjel li jnopbentike, xchiʼuk kʼusi xuʼ skoltautik?
2 Skʼan jkʼel kʼu kelantik. Li jnopbentik ta sventa li kʼusitik chtun kuʼuntike xuʼ xjel ta skoj li kʼusitik chalbeik skʼoplal ta radio, television o ta yan kʼusitik o ta skoj ti ta jkʼan oyuk kuʼuntik ek li kʼusitik oy yuʼun yantike. Jech oxal, kʼalal skʼan toʼox xlik jpastik o jmantik junuk kʼusi ti toj ep jkʼakʼaltik, ep takʼin o ep kipaltik chichʼe, pʼijutik me ti «baʼyuc ta [jnoptik] cʼu yepal [...] ta xlaj» kuʼuntike. Sventa taje skʼan xi jakʼbe jbatike: ¿Mi tskoltaun sventa xi tun mas ta stojolal Jeova o mi jaʼ van chi smakun? (Luc. 14:28; Fili. 1:9-11.) Jech xtok, pʼijutik me mi nopolik noʼox ta jkʼeltik mi xuʼ jutukajestik li kʼusitik oy ta jkuxlejaltik sventa xuʼ xi jlokʼ mas li ta chol mantale (2 Cor. 13:5; Efe. 5:10).
3. ¿Kʼusi xuʼ jchantik ta sventa kʼuyelan la sjutukajes kʼusitik ta xkuxlejal li jun ermanae?
3 Kʼalal lik tunuk ta prekursor regular jun ermanae, la snop ti sjunul kʼakʼal ch-abtej-oe, manchuk mi xuʼ sta yabtel ta oʼlol kʼakʼal noʼox ti bu xuʼ sta-o lek stojol li kʼusitik chtun yuʼune. Manchuk mi jech, xi laj yal ta tsʼakale: «Muʼyuk buchʼu xuʼ yuʼun mi tsaʼ chib yajvale. Jaʼ yuʼun la jtuchʼ ta koʼonton li kʼusitik lek chkile, jaʼ bat ta koʼonton li kʼusitik noʼox chtun kuʼun ta melele. Laj kakʼ venta ti chlaj noʼox skʼoplal xchiʼuk ch-echʼ noʼox ta koʼontontik skʼupinel li kʼusitik sventa balumile xchiʼuk ti chi slajesun komel tajeke». Li stuke la sjutukajes li kʼusitik ta xkuxlejale xchiʼuk la saʼ yan yabtel sventa xuʼ xtun-o batel ta prekursoral.
4. ¿Kʼu yuʼun toj tsots skʼoplal ti lekuk noʼox ta mantal jsatik li avie?
4 Ta skoj ti nopol xa oyutik ta slajebal kʼakʼale mas me toj tsots skʼoplal ti lekuk noʼox ta mantal li jsatike. Li jujun kʼakʼal chjelave jaʼ svinajeb ti mas xa nopol oyutik ta slajeb li kʼusitik chkʼotanuk ta pasele xchiʼuk ti poʼot xa xtal li achʼ balumile (1 Cor. 7:29, 31). Mi te-o chkakʼ batel jsatik ta chol mantale xuʼ van xi «[j]col li voʼot[ik]e xchiʼuc li bochʼotic ta xaʼibot[ike]» (1 Tim. 4:16).