¿Mi yakalun spasel ti bu kʼalal xuʼ kuʼune?

1. ¿Kʼusi xuʼ xat-o yoʼonton li jun tukʼil yajtsʼaklom Cristoe?

¹ ¿Mi oy jech ajakʼojbe aba junuk velta taje? Ta skoj ti yantik xa cha malube, ti chamele o ta skoj ti ep kʼusitik abainoj xa ta avutsʼ avalale, xuʼ van oy xchibaj avoʼonton bakʼintik ta skoj ti jutuk xa cha chol mantale. Jun ermana ti oy oxvoʼ yalabe laj yal ti chat yoʼonton bakʼintik ta skoj ti chʼabal xa lek yorail yuʼun chol mantale, ti jaʼ xa noʼox chbat mas skʼakʼal xchiʼuk yipal ta xchabiel li yutsʼ yalale. ¿Kʼusi tskoltautik sventa oyuk noʼox smelolal xkiltik li kʼusitik ta jpastik xchiʼuk li chol mantale?

2. ¿Kʼusi smalaoj ta jpastik li Jeovae?

² Li kʼusi smalaoj ta jpastik li Jeovae. Melel onoʼox ti oy ta koʼontontik ep xi j-abtej ta sventa li Jeovae. Pe bateltike manchuk mi oy ta koʼontontik spasel, pe mu xa xuʼ kuʼuntik mas. Ti oy ta koʼontontik spasel mase, jaʼ svinajeb ti mu junuk koʼontontik li kʼuyepal yakalutik spasele. Teuk ta joltik ti xojtikin bu kʼalal xuʼ kuʼuntik li Jeovae, ti mu smalaojuk jpastik ti bu mu xa xuʼ kuʼuntike (Sal. 103:13, 14). Vaʼun chaʼa, ¿kʼusi smalaoj ta jpastik? Jaʼ ti sjunuluk koʼontontik xi jtun ta stojolale, ti jpastik persa bu kʼalal xuʼ kuʼuntike (Col. 3:23).

3. ¿Kʼuxi xuʼ jkʼeltik ti kʼu kelantik ta chol mantale?

³ ¿Kʼusi tskoltautik skʼelel li bu kʼalal xuʼ kuʼuntik spasel ta melele? Xuʼ jkʼanbetik koltael Jeova sventa jkʼeltik lek kʼuyelan li jkuxlejaltike (Sal. 26:2). Jech xtok, xuʼ skoltautik junuk kamigotik ti yij ta mantale, ti lek xkil jba jchiʼuktike, ti xojtikinutik lek xchiʼuk ti mu snaʼ xiʼ chalbutik li bu skʼan to xi j-abteje (Pro. 27:9). Teuk ta ajol xtok ti chjelilan li kʼusitik chkʼotanuk ta pasele, jaʼ yuʼun lek ti nopolik noʼox jkʼel kʼuyelan li jkuxlejaltike (Efe. 5:10).

4. ¿Kʼu yelan skʼan xkiltik kʼalal chkichʼtik vulesbel ta joltik mantaletik ta Vivlia sventa li chol mantale?

⁴ Kʼuyelan skʼan xkiltik li kʼusi chkichʼtik vulesbel ta joltike. Kʼalal oy tsalbail ta anilajele, li buchʼutik te chkʼelvanike tsots xa ch-avanik sventa tstsatsubtasbeik yoʼonton li buchʼu tskʼanik tspas kanale. Li kʼusi oy ta yoʼontonike jaʼ ti tskʼanik akʼo xkʼot ti bu albilik li j-anilajeletike, maʼuk sventa xlubtsajik ta be. Jaʼ jech ek, kʼalal chkichʼtik vulesbel ta joltik xchiʼuk chkichʼtik albel mantaletik ta Vivlia ta tsobobbail xchiʼuk ta vunetik ti skʼan jcholtik-o batel li skʼop Diose, jaʼ sventa tstij koʼontontik maʼuk yuʼun chkichʼtik albel ti muʼyuk chkakʼbetik yipal bu kʼalal xuʼ kuʼuntike (2 Tim. 4:2). Mi la jpastik persa bu kʼalal xuʼ kuʼuntike, xuʼ jpat koʼontontik ti tstsak ta venta Jeova ti chi jkʼuxubinvane xchiʼuk li kabteltik ta stojolale (Heb. 6:10).