Sventa xichʼik koltael li jcholmantaletike

1. ¿Kʼusi achʼ koltael lik ta 1938, xchiʼuk kʼusi sventa?

¹ Li s-organisasion Jeovae la slikes asambleas de zona (mukʼta tsobajeletik sventa sona) ta 1938, ti jaʼ sbi mukʼta tsobajel ta chib kʼakʼal avie, ti jaʼ laj yichʼik ikʼel li jujutsop tsobobbailetike. ¿Kʼusi sventa taje? Li Informador (ti jaʼ sbi Kabteltik sventa Dios avie) yuʼun enero ta 1939 (ta inglés) xi laj yale: «Li mukʼta tsobajeletik taje jaʼ te snitoj sba li kʼusi tstunes s-Organisasion Jeova sventa chichʼ pasel li abtelaletik sventa Ajvalilal yuʼune. Li mantaletik ch-echʼ tee jtunel yuʼun skotolik li buchʼutik tskʼan lek chbat ta pasel yuʼun li yabtelike». Li ta 1938 kʼajomal toʼox oy 58,000 jcholmantaletik, li ta 2009 mas xa ta vukub miyon, epajem talel ta skoj li tsobajeletik taje, taje lek xvinaj ti lek tunem yuʼun jcholmantaletik sventa «lek chbat ta pasel yuʼun li yabtelike».

2. ¿Kʼusi mantaletik chjelav li ta mukʼta tsobajel ta chib kʼakʼal li ta kabteltik chlik ta septiembre yuʼun 2010 kʼalal ta agosto yuʼun 2011?

² Li sbi mukʼta tsobajel chtal jabile. Ta sjunul koʼontontik yakalutik smalael li kʼusitik ch-echʼ li ta mukʼta tsobajel chlik ta septiembree xchiʼuk li spatobil koʼontontik ta jtatik te xchiʼuk li yantik yajtsʼaklomtak Cristoe. Li sbie te chlokʼ ta Juan 15:19: «Li voʼoxuque muʼyucoxuc xa ta sventa banamil». ¿Kʼusitik chalbe smelolal li mantaletike? Li ta sabadoe te chalbe smelolal kʼuxi chchabiutik li spasbel yabtel Dios ta tsʼakal orae. Jech xtok, ch-echʼ oxib mantaletik ti xcholet batel ti bu chalbe smelolal ti toj tsots skʼoplal ti akʼo mu sokesutik «li mucʼta chone», «li meʼ jmulavil antse» xchiʼuk «li jchonolajeletik, li jmanolajeletike». Li ta domingoe ch-echʼ to yan mantaletik ti xcholet batel ti bu chalbutik ti jaʼ akʼo jkʼantik li Jeovae, maʼuk li balumile. Li yan mantaletik chjelave chalbe skʼoplal ti skʼan mu xchʼay xkaʼitik ti jyanlumutike xchiʼuk ti skʼan tsotsukutik sventa jtsaltik li balumile.

3. ¿Kʼusitik sbalil xuʼ jtatik mi chi jbat li ta mukʼta tsobajel ta chib kʼakʼale?

³ Jun ermana ti kʼunibem jutuk ta chol mantale, ay ta jun mukʼta tsobajel ta chib kʼakʼal, ta skoj li mantaletik jelav tee, te laj yakʼ venta kʼuyelan li xkuxlejale xchiʼuk laj yakʼ ta yoʼonton ti skʼan «xlokʼilan ta chol mantale xchiʼuk ti muʼyuk tsaʼ kʼusi tspoj-o sbae». Ta melel, li kʼusitik ch-echʼ ta mukʼta tsobajel ta chib kʼakʼal li ta kabteltik chlik ta septiembre yuʼun 2010 kʼalal ta agosto yuʼun 2011 ta skoltautik jkotoltik sventa xkakʼtik ta ilel ti jkʼanojtik li Jeovae, maʼuk li balumile (1 Juan 2:15-17). Akʼo persa ti xa bat li ta mukʼta tsobajele xchiʼuk ti xa chikinta skotol li mantaletik chjelav sventa skoltael li jcholmantaletike.