Jchabi li jnopbentike

1. ¿Kʼusi sbi li mukʼta tsobajel ta chib kʼakʼal ti chlik ta septiembre yuʼun 2012, xchiʼuk kʼuxi tskoltautik?

¹ Li Jesuse la xchanubtas yajtsʼaklomtak sventa skʼan ta sjunul yoʼontonik, ta skotol xkuxlejalik xchiʼuk ta sjunul snopbenik li Jeovae (Mat. 22:37, 38, Ch). Li mukʼta tsobajeletik li jabil liʼe chapanbil sventa xlekub mas li kʼusitik ta jnoptike, li kʼuyelan chkaʼi jbatike xchiʼuk li kʼusi ta jkʼantike. Jech kʼuchaʼal laj xa onoʼox yichʼ alele li sbi mukʼta tsobajel ta oxib kʼakʼale jaʼ: «Jchabi li koʼontontike». Li mukʼta tsobajel ta jun kʼakʼal ti chlik ta septiembre yuʼun 2012 kʼalal ta agosto yuʼun 2013, jaʼ sbi «Jchabi li jol koʼontontike», li mukʼta tsobajeletik ta chib kʼakʼal ti chlik chtal ue jaʼ sbi «Jchabi li jnopbentike», taje te lokʼem ta Mateo 22:37. Li mukʼta tsobajel ta chib kʼakʼale tskoltautik ta skʼelel kʼuyelan oy li jnopbentike, taje jaʼ sventa lekuk xilutik li Jeovae.

2. ¿Kʼusitik chichʼ takʼel li ta mukʼta tsobajele?

² Li kʼusitik chichʼ chanele. Kʼalal mi laj xaʼox li mukʼta tsobajel ta chib kʼakʼale, xuʼ van ta jkʼan ta jvules ta joltik li kʼusitik tsots skʼoplal la jchantike. Jaʼ yuʼun, jaʼ van lek ti jtsaktik ta vun stakʼobiltak li sjakʼobiltak liʼe:

• ¿Kʼusi skʼan jpastik sventa mu jchanbetik li snopben krixchanoetike?

• ¿Kʼuxi xuʼ jkoltatik li krixchanoetik ti oyik ta ikʼal osile?

• ¿Kʼu yelan skʼan jnopbentik ti jechuke?

• ¿Kʼusi sbalil ta jtatik mi ta jnopilantik lek li kʼusitik ta jchantike?

• ¿Kʼuxi xuʼ xkakʼtik stukʼibtas jnopbentik li Jeovae?

• ¿Kʼusi xuʼ spas li ajnilale, li malalile, li totil meʼil xchiʼuk alab nichʼnabil sventa xmuyubajik noʼox li ta yutsʼ yalalike?

• ¿Kʼuxi xuʼ jnaʼtik mi chapalutik xa sventa li skʼakʼalil Jeovae?

• ¿Kʼusi skʼan xal ti ta jtojobtas jnopbentik yoʼ chapalutik ta spasel li kʼusi leke?

• ¿Kʼusi sbalil tstaik li buchʼutik chakʼ ta xkuxlejalik li kʼusitik chchanike?

3. ¿Kʼu yuʼun tsots skʼoplal ti xijbat xchibal kʼakʼal li ta mukʼta tsobajele, ti jtsʼet chikintatik leke xchiʼuk ti xkakʼ ta jkuxlejaltik li kʼusi ta jchantike?

³ Li Satanase tskʼan tsokes li jnopbentike xchiʼuk chakʼ tajek persa ti jechuk xkʼot ta pasele (2 Cor. 11:3). Jaʼ yuʼun, skʼan jchabitik xchiʼuk jnaʼtik spajtsanel li jnopbentike, ti jchanbetik li snopben Cristoe xchiʼuk jpʼajtik li yip chopol balumile (1 Cor. 2:16). Akʼo jpastik persa ti teuk oyutik ta xchibal kʼakʼal li ta mukʼta tsobajele xchiʼuk jtsʼetan lek jchikintik. Kʼalal chkakʼ ta jkuxlejaltik li mantaletik te chkaʼitike tskoltautik sventa stsatsubtas li jnopbentike xchiʼuk ti ta sjunuluk xa koʼontontik ta jcholbetik skʼoplal li Ajvalilal yuʼun Diose (1 Ped. 1:13).