Li Skʼop Diose jtunel sventa xijchanubtasvan

1. ¿Kʼusi sbi li mukʼta tsobajel ta chib kʼakʼal ti chlik ta septiembre yuʼun 2013 xchiʼuk kʼusi chichʼ takʼel te?

¹ Ta sjunul li vinajelbalumile jaʼ noʼox stuk mas lek «jchanubtasvanej» li Jeovae (Is. 30:20, 21). ¿Kʼuxi xchanubtasojutik li Jeovae? Yakʼojbutik jlik livro ti jaʼ mas leke, ti jaʼ xkom to li yantik livroetike, jaʼ li Skʼop yakʼoj ta naʼele, li Vivliae. ¿Kʼuxi tskoltautik ta jkuxlejaltik, ta jnopbentik, ta koʼontontik xchiʼuk ta mantal li chanubtasel chakʼ Diose? Li ta mukʼta tsobajel ta chib kʼakʼal ti chlik ta septiembre ta 2013, te chichʼ takʼel taje. Li sbi mukʼta tsobajele jaʼ, «Li Skʼop Diose jtunel sventa xijchanubtasvan» xchiʼuk te lokʼem ta 2 Timoteo 3:16.

2. ¿Kʼusitik chichʼ takʼel li ta mukʼta tsobajele?

² Saʼo li kʼusitik tsots skʼoplale. Li kʼusitik tsotsik skʼoplal ch-echʼ ta mantale, ta xichʼ takʼel li sjakʼobiltak liʼe:

• ¿Kʼuxi tskoltautik ta jkuxlejaltik li chanubtasel chakʼbutik Diose? (Is. 48:17, 18.)

• ¿Kʼusi xuʼ jmalatik mi chkakʼtik persa oy kʼusi ta jel ta jkuxlejaltik sventa chijtun ta stojolal li Jeovae? (Mal. 3:10.)

• ¿Kʼu yelan jtalelaltik skʼan xkakʼtik ta ilel kʼalal oy kʼusi chakʼik ta chanel ti yan ta aʼiele? (Heb. 13:9, Ch.)

• ¿Kʼuxi xuʼ jchanbetik ti «cʼu xʼelan ichanubtasvan» li Jesuse? (Mat. 7:28, 29.)

• ¿Kʼu yuʼun skʼan baʼyel xchanubtas sba stuk li buchʼu chchanubtasvan ta tsobobbaile? (Rom. 2:21.)

• ¿Kʼuxi ti jtunel li Skʼop Diose? (2 Tim. 3:16.)

• ¿Kʼuxi tstaik ta makiel krixchanoetik ti chichʼ nikesel li lumetike? (Hageo 2:6, 7.)

• Spatoj yoʼonton Jeova ti oy kʼusi ta jpastike, ¿kʼusi taje? (Efes. 5:1.)

• ¿Kʼu yuʼun skʼan xkakʼtik persa ti jechuk-o xchanubtasutik li Jeovae? (Luc. 13:24.)

3. ¿Kʼu yuʼun toj tsots skʼoplal ti xijbat ta mukʼta tsobajele xchiʼuk ti jchikintatik lek kʼalal yakal ch-echʼ li mantale?

³ Kʼalal muʼyuk toʼox tsʼibabil li bu lokʼem tal sbi li mukʼta tsobajele, jaʼ xkaltik, li ta slikebal kapitulo 3 ta 2 Timoteoe, laj yal Pablo ti ch-epaj vokolil li ta slajebal kʼakʼale. Xi la stsʼibae: «Li bochʼotic toj chopolique xchiʼuc li jloʼlavanejetique, yoʼ to echʼem ta soquic o batel» (2 Tim. 3:13). Sventa mu xijlaj ta loʼlaele, toj tsots skʼoplal ti jchikintatik xchiʼuk xkakʼ ta jkuxlejaltik li chanubtasel chakʼbutik li Diose. Jaʼ yuʼun, skʼan jchikintatik lek li mantaletik ch-echʼe, yuʼun jech chapanbil ti kʼuyelan chtun tajek kuʼuntik li avie.