Kʼotuk ta pasel ti kʼusi tskʼan yoʼonton Diose
1. ¿Kʼusi sbi li Mukʼta Tsobajel ta jun kʼakʼale, xchiʼuk kʼu yuʼun tsots skʼoplal ti xkaʼibetik smelolal taje?
1 Li voʼotike laj kichʼtik pasel ta skoj ti jech tskʼan yoʼonton li Jeovae (Apo. 4:11). Pe sventa oyuk sbalil ta melel li jkuxlejaltike, skʼan jchantik li kʼusi tskʼan yoʼonton Diose xchiʼuk ti jechuk jpastike. Yaʼeluke kʼun noʼox ta pasel, pe mu jechuk, yuʼun skʼan jtsaltik «li cʼusitic lec chaʼay jbecʼtaltique, xchiʼuc li cʼusitic ta jnop jtuctique» o «jech chac cʼu chaʼal tspasic li bochʼotic mu xichʼic ta mucʼ Diose», jaʼ xkaltik, li balumile (Efe. 2:3; 1 Ped. 4:3; 2 Ped. 2:10). Ti manchuk tskoltautik li Diose, xuʼ van xijpʼaj ta «scʼob li pucuj [...] sventa [jpasbetik li] cʼusi tscʼane» (2 Tim. 2:26). Li Mukʼta Tsobajel ta jun kʼakʼal li ta sjabilal kabteltik chlik ta septiembre yuʼun 2011 kʼalal ta agosto yuʼun 2012, tskoltautik ti jechuk jpastik jech kʼuchaʼal li yoxibal kʼusi chichʼ kʼanel li ta orasion ti padrenuestro sbie (Mat. 6:9, 10). Li sbi mukʼta tsobajele jaʼ: «Kʼotuk ta pasel ti kʼusi tskʼan yoʼonton Diose».
2. ¿Kʼusi sjakʼobiltak chichʼ takʼel li ta Mukʼta Tsobajel ta jun kʼakʼale?
2 Kʼusi sjakʼobiltak chichʼ takʼel. Chikintao lek li mantaletik ch-echʼ yalik li ermanoetik ta mukʼta tsobajel sventa xanabe stakʼobil li sjakʼobiltak liʼe: ¿Kʼusi to tsots skʼoplal skʼan jpastik, ti maʼuk noʼox skʼan jchikintatik li Skʼop Diose? ¿Kʼuxi xuʼ jnaʼtik li kʼusi tskʼan yoʼonton Dios ta jtojolaltike? ¿Kʼu yuʼun skʼan ta sjunul koʼontontik jkoltatik skotol li krixchanoetike? ¿Kʼusi xuʼ jpastik sventa oyuk noʼox sbalil li jkuxlejaltike xchiʼuk ti xkuxetuk noʼox koʼontontike? Kerem tsebetik, ¿kʼusi skʼan xavakʼbeik yil li Jeovae? ¿Kʼusi sbalil ta jtatik mi ta jpastik li kʼusi tskʼan yoʼonton Diose? ¿Kʼu yuʼun skʼan xa noʼox ti jtsatsubtastik xchiʼuk ti jpatbetik yoʼonton li kermanotaktike?
3. ¿Kʼuxi xuʼ jtabetik lek sbalil li Mukʼta Tsobajel ta jun kʼakʼale?
3 Akʼo persa sventa xabat li ta mukʼta tsobajele xchiʼuk chikintao lek li kʼusi ch-echʼe. Yuʼun li jvulaʼal avuʼunike xuʼ van jaʼ li buchʼu te ch-abtej ta Betele o jun jkʼelvanej ta sirkuito. Chkalbotkutik ti akʼo xachiʼin ta loʼil li ermano xchiʼuk yajnil mi nupuneme, pe jaʼo kʼalal skʼan toʼox xlik xchiʼuk mi laj xaʼox li kʼusi ch-echʼ ta mukʼta tsobajele. Sventa mu «xchʼay» ta ajol li kʼusi laj avaʼie, albeik skʼoplal xchiʼuk avutsʼ avalal li kʼusi echʼ ta mukʼta tsobajel mi kʼotemoxuk xaʼox ta anaike. Jmoj xanopik kʼuxi xuʼ tsʼakal lek xapasik li kʼusi tskʼan yoʼonton Diose (Sant. 1:25).
4. ¿Kʼu yuʼun skʼan jaʼuk mas tsots skʼoplal xkaʼi ta jkuxlejaltik spasel li kʼusi tskʼan yoʼonton Diose?
4 Li buchʼutik jaʼ noʼox tspasik li kʼusi tskʼan yoʼonton stukike xchiʼuk ti mu skʼan spasik li kʼusi tskʼan yoʼonton Diose, poʼot xa xichʼik lajesel yuʼun Jeova (1 Juan 2:17). Jaʼ yuʼun, ¡xijmuyubaj ta jtojbetik ta vokol Jeova li kʼusi ch-echʼ ta mukʼta tsobajel ti jtunel tajek kuʼuntike! Ta melel, jaʼ me tskoltautik sventa jaʼuk mas tsots skʼoplal xkaʼi ta jkuxlejaltik spasel li kʼusi tskʼan yoʼonton Diose.