Jtsʼetan jchikintik sventa jchantik
1. ¿Kʼu yuʼun mas tsots chkaʼitik ti jtsʼetan lek jchikintik li ta mukʼta tsobajeletik ta oxib kʼakʼale?
1 Poʼot xa xlik echʼuk li mukʼta tsobajeletik ta oxib kʼakʼal ta 2013. Ep buchʼutik abtejik sventa xichʼ chapanel li kʼusitik chtun yuʼunik ta mantal li krixchanoetik ta spʼejel Balumile. ¿Mi chapalot xa sventa xabat yoxibal kʼakʼal? Li ta mukʼta tsobajeletik ti ep tajek ta jtsob jbatike oy noʼox kʼusi chchʼay koʼontontik, jaʼ yuʼun skʼan ti mas jtsʼetan jchikintike. Ta skoj ti mas jalik ti jaʼ mu sta li tsobajeletike, skʼan mas jal jtsʼetan lek jchikintik. Oy bakʼintik xtoke, lubemutik noʼox ta skoj ti bu to li jlik tale o ta skoj yan kʼusitik. ¿Kʼusi van xuʼ skoltautik yoʼ jtsʼetan-o lek jchikintik sventa jchantike? (Deut. 31:12.)
2. ¿Kʼuxi xuʼ xlik noʼox achapan avoʼonton ta sventa li mukʼta tsobajele?
2 Kʼalal skʼan toʼox li mukʼta tsobajele. Li ta jpajinatik ta Internet ta www.jw.org/es te chata li kʼusitik ch-echʼ ta mukʼta tsobajele, li sbitak mantaletike xchiʼuk jun o chib tekstoetik ti jaʼ mas chalbe skʼoplale. Mi oy avuʼun li Internete tskoltaot me sventa xachapan avoʼonton ta sventa mukʼta tsobajel mi baʼyel chakʼel li kʼusitik ch-echʼe (Esd. 7:10, TNM). Li ta Akʼobal sventa Yichʼel ta Mukʼ Jeova ta Kutsʼ Kalaltike xuʼ van jaʼo xavalbe skʼoplal sventa oyuk xa ta yoʼonton snaʼel kʼusi ch-echʼ li avutsʼ avalale.
3. ¿Kʼusi xuʼ skoltaot sventa xatsʼet chikinta lek li kʼusi ch-echʼe?
3 Kʼalal yakal ch-echʼ li mukʼta tsobajele. Mi xuʼ chavile, jaʼo xabat ta vanyo kʼalal skʼan toʼox xlik li tsobajele. Jech xtok, tupʼo aselular sventa mu xchʼay avoʼonton mi oy buchʼu tstakbot tal mensaje o tskʼoponot tale xchiʼuk mu stij avoʼonton xatak batel mensaje ek kʼalal yakal ch-echʼ mantale. Mi persa tsanal avuʼune skʼan me xakʼel kʼu xavut sventa mu xchʼaybe yoʼonton yantik mi la skʼoponikot tale. Mi chatunes jun tableta electrónica tee, kʼelo me ti mu xchʼaybe yoʼonton yantike. Kʼalal yakal ch-echʼ mantale mu me kʼusi xalajes, mi jaʼuk kʼusi xavuchʼ (Ecl. 3:1). Jaʼ tukʼ xakʼel li buchʼu chetʼes mantale xchiʼuk kʼelo batel li tekstoetik eke. Lek me xtok ti xatsʼiba ta vun li kʼusi mas tsots skʼoplale.
4. ¿Kʼusi xuʼ spasik totil meʼiletik ta stojolal yalab xnichʼnabik sventa stsʼet chikintaik yoʼ xchanik eke?
4 Jech xtok, skʼan me stsʼet chikinta sventa xchanik li ololetik eke. Xi chal Proverbios 29:15: «Li querem ti te noʼox qʼuelbile jaʼ noʼox chacʼ ta qʼuexlal li smeʼe». Jaʼ yuʼun, li totil meʼiletike jaʼ lek ti xchiʼinik ta chotlej yalab xnichʼnabik sventa skʼelik ti yakal tstsʼet chikintaik mantale, ti maʼuk noʼox chloʼilajik, tstakik mensajeetik o chanavik ta buyuk noʼoxe. Akʼo mi bikʼitik to xuʼ me xchanik ti skʼan lek julavemike xchiʼuk ti skʼan stsʼijiike, manchuk mi mu xaʼibeik smelolal skotol li kʼusi chjelave.
5. ¿Kʼu yuʼun lek ti jchaʼkʼeltik li kʼusi echʼ ta mukʼta tsobajele xchiʼuk kʼuxi xuʼ jpastik?
5 Kʼalal mi echʼ xaʼox li mukʼta tsobajele. Mu toj ikʼ osil xavay xchiʼuk kuxo me lek. Chʼako jayibuk minuto xchiʼuk avutsʼ avalal sventa xavalbeik skʼoplal li kʼusi la achanik ta jujun kʼakʼale, jech mu ta aniluk chchʼay ta ajolik. Mi chabat ta veʼebal xchiʼuk avamigotake, loʼiltaik li kʼusi mas lek laj avaʼiike. Xuʼ jaʼ xatunes li kʼusi la atsʼibae. Ta mas tsʼakale, xuʼ xavalbeik skʼoplal li ta yichʼel ta mukʼ Jeova ta kutsʼ kalaltik ti kʼuxi xuʼ xavakʼ ta akuxlejalik li kʼusi laj yichʼ alele. Jech xtok, xuʼ xachʼakik jayibuk minuto ta jujun xemana sventa xachanik jutukuk li achʼ vunetike.
6. ¿Mi oy sbalil ti jaʼ noʼox chijbat ta mukʼta tsobajele?
6 Akʼo mi ep veʼliletik, pe mi muʼyuk ta jlajestik leke muʼyuk me sbalil. Jaʼ me jech ek ta sventa li mantaletik ti chkichʼtik ta mukʼta tsobajel ta oxib kʼakʼale. Jaʼ yuʼun, kakʼtik persa ti xijbat yoxibal kʼakʼal sventa jtabetik sbalile, sventa jtsʼet chikintatik lek xchiʼuk ti jchan xkakʼ ta jkuxlejaltik li kʼusi la jchantike.