«Tsobo tal scotol li achiʼiltaque»
1. ¿Kʼuxi xkoʼolaj li mukʼta tsobajeletik xchiʼuk li tsobajel echʼ yuʼunik li j-israeletik kʼalal mu toʼox jaluk slokʼelik ta Egiptoe?
1 Kʼalal mu toʼox jaluk slokʼelik ta Egipto li j-israeletike, xi albat yuʼun Jeova li Moisese: «Tsobo tal scotol li [achiʼiltak]» liʼ ta vits Sinaie. ¿Kʼu yuʼun? Sventa xchanik kʼu yelan skʼan xichʼik ta mukʼ li Diose xchiʼuk ti xakʼbeik xchan yalab xnichʼnabik li smantaltake (Deut. 4:10-13). Ta melel, toj tsots skʼoplal laj yaʼiik, yuʼun tsatsubtasbat xchʼunel yoʼontonik. Jaʼ jech li voʼotik eke, poʼot xa jtsob jbatik ta jun mukʼta tsobajel ta oxib kʼakʼal o ta internasional sventa xchanubtasutik li Jeovae. ¿Kʼusi skʼan jpastik sventa jtabetik lek sbalil?
2. ¿Kʼusi skʼan jpastik sventa jchapan xa noʼox jbatik ta sventa li mukʼta tsobajele?
2 Skʼan jchapan jbatik. Albatik yuʼun Jeova ti akʼo «xchapan sbaic» li j-israeletik ta sventa li tsobajel ta vits Sinaie (Éx. 19:10, 11). Jaʼ jech li avi eke, skʼan me jchapan jbatik sventa xijbat li ta mukʼta tsobajele, maʼuk noʼox me skʼan xchapan sbaik li buchʼutik oy sparteike. Jech kʼuchaʼal liʼe, ep buchʼutik skʼan skʼanbeik permiso spatronik. Yikʼaluk van xkoʼolaj akuxlejalik xchiʼuk li Nehemiase, yuʼun te ch-abtej ta yakʼbel yaʼlel tsʼusub jun ajvalil ti Artajerjes sbie. La skʼanbe permiso, yuʼun tskʼan chbat ta Jerusalén ta svaʼanbel smuroaltak, pe snaʼoj ti xuʼ mu lekuk xaʼi ajvalil li kʼusi chalbee. Jaʼ yuʼun la spas jun orasion xchiʼuk la snop lek kʼusi chal, vaʼun tsots yoʼonton laj yalbe li ajvalile. ¡Akʼbat permiso! Maʼuk noʼox taje, yuʼun akʼbat jlomuk li kʼusitik chtun ta svaʼanel li muroe (Neh. 2:1-9). Maʼuk noʼox me skʼan xakʼan permiso, yuʼun skʼan xanop xtok kʼuxi chabat xchiʼuk bu chavay. Ta sjunul me yoʼonton chkoltavan moletik ta sabel skaroalik o svayebik li buchʼutik tskʼanike. Jchapan lek jbatik sventa sob xijkʼot jujun kʼakʼal xchiʼuk masuk to lek «jtsʼetan jniʼ jchiquintic ta yaʼyiel» li mantale (Heb. 2:1, Ch).
3. ¿Kʼusi tskoltautik yoʼ jchapan lek koʼontontik ta sventa li mukʼta tsobajele?
3 Sventa lek chapalutik ta yaʼiel xchiʼuk ta xchanel li mantale, skʼan me jchapantik lek li koʼontontik xtoke (Esd. 7:10, TNM). Jal toʼox skʼan mukʼta tsobajel te chichʼ akʼel ta jpajinatik ta Internet ta jw.org/es li kʼusitik ch-echʼe, te chalbe sbi li mantaletike xchiʼuk jun o chibuk stekstoaltak. Toj lek me ti jkʼelbetik skʼoplal li ta Akʼobal sventa Yichʼel ta Mukʼ Jeova ta Kutsʼ Kalaltik kʼalal junchib xaʼox xemana skʼan li jmukʼta tsobajeltike. Jlom ermanoetike tspasbeik imprimir sprogramail mukʼta tsobajel sventa stsʼibaik li mantaletik ch-echʼe.
4. ¿Kʼuxi xuʼ jtunestik li mukʼta tsobajel sventa jchanubtas li kalab jnichʼnabtike?
4 Chanubtaso avalab anichʼnabik. Jtos srasonal ti kʼu yuʼun la stsob sbaik ta vits Sinaí li j-israeletike jaʼ ti xakʼbeik xchan yalab xnichʼnabik li smantaltak Jeovae (Deut. 4:10). Jaʼ jech tskoltautik li mukʼta tsobajel eke, ti jchanubtas li kalab jnichʼnabtike. Skʼan me jchiʼintik ta chotlej li kalab jnichʼnabtike xchiʼuk ti jkoltatik sventa stsʼetan lek xchikinike. Kalbetik skʼoplal xchiʼuk kutsʼ kalaltik li kʼusi la jchantik ta mukʼta tsobajel kʼalal mi echʼ jujun kʼakʼale, o mi moʼoje, jaʼo xkaltik mi la jpastik li yichʼel ta mukʼ Jeova ta kutsʼ kalaltike.
5. ¿Kʼuxi tskoltautik li mukʼta tsobajel ti nopol xae?
5 Li mukʼta tsobajel echʼ yuʼunik ta voʼne li j-israeletike jaʼ koltaatik-o sventa epuk sbalil xilik ti oyik ta steklumal Diose (Deut. 4:7, 8). Jaʼ jech tskoltautik ek li jmukʼta tsobajeltik ti nopol xae, yuʼun jaʼ jech chapanbil. Oxib kʼakʼal muʼyuk chkil jvokoltik li ta sbalumil Satanás ti xkoʼolaj kʼuchaʼal takixokol balumile, yuʼun chbat jtsatsubtas jbatik tal ta mantal xchiʼuk chbat jkʼupintik ti xkoʼolaj xa kʼuchaʼal te oyutik ta jun paraiso yaʼeluk xchiʼuk li kermanotaktike (Is. 35:7-9). Ta skoj ti poʼot xa skʼakʼalil li Jeovae skʼan me epuk sbalil xkiltik li tsobajel taje, yuʼun jaʼ te ta jtsatsubtasbe jba koʼontontik ta jujuntal (Heb. 10:24, 25).