Oy stsatsal li Skʼop Diose
1. ¿Kʼusi sbi li mukʼta tsobajel ta jun kʼakʼal ti chlik ta septiembre yuʼun 2013?
1 Muʼyuk kʼusi tukʼ tspas li krixchano ta skoj ti jpasmulile, pe li Vivliae oy stsatsal sventa tsjel li jnopbentike xchiʼuk ti jaʼuk jpastik li kʼusi lek chil Jeovae. ¿Kʼu to yepal sjuʼel li Skʼop Diose? ¿Kʼuxi xuʼ x-abtej ta jkuxlejaltik? ¿Kʼuxi xuʼ jtunestik lek sventa jkoltatik li yantike? Mi la jchantik ta mukʼta tsobajel ta jun kʼakʼal ti chlik ta septiembre yuʼun 2013 taje, jchʼunojtik lek ti tstsatsubtasutik ta mantale. Li sbi mukʼta tsobajele jaʼ: «Li scʼop Diose [...] oy stsatsal», te lokʼem ta Hebreos 4:12.
2. ¿Kʼusitik chichʼ takʼel li ta mukʼta tsobajele?
2 Sabo stakʼobil li sjakʼobiltak liʼe. Kʼalal yakal ch-echʼ li mantale tsʼibabo stakʼobil li sjakʼobiltak liʼe:
• ¿Kʼu yuʼun skʼan jpat koʼontontik li ta Skʼop Diose? (Sal. 29:4.)
• ¿Kʼu yelan chkil ta jkuxlejaltik ti oy stsatsal li Skʼop Diose? (Sal. 34:8.)
• ¿Kʼuxi xuʼ jtunestik ta cholmantal li stsatsal Skʼop Diose? (2 Tim. 3:16, 17.)
• ¿Kʼusi xuʼ jpastik sventa mu xijlaj ta loʼlael yuʼun li sbalumil Satanase? (1 Juan 5:19.)
• Ti kerem o tsebote, ¿kʼusi xuʼ xapas sventa lekuk kʼusi xkʼot ta pasel avuʼun li ta mantale? (Jer. 17:7.)
• ¿Kʼuxi xuʼ lek tsotsutik akʼo mi kʼunutik noʼox? (2 Cor. 12:10.)
• ¿Kʼusi to skʼan jpastik sventa jel jtalelaltik akʼo mi jal toʼox oy kʼusi chopol la jpastik? (Efes. 4:23.)
3. ¿Kʼusi yan stakʼ jpastik sventa jtabetik sbalil li mukʼta tsobajel ti maʼuk noʼox skʼan jchikintatike?
3 ¡Toj ep sbalil ta jtabetik mi chbat jchikintatik li mantaletik ti tsotsik skʼoplal tajeke! Jech xtok, li ta mukʼta tsobajel ta jun kʼakʼal, ta chib kʼakʼal xchiʼuk ta oxib kʼakʼale xuʼ te xkojtikintik xchiʼuk ti jkʼupintik xchiʼinel ta loʼil ermanoetik ta yantik tsobobbaile (Sal. 133:1-3; 2 Cor. 6:11-13). Jaʼ yuʼun, jchʼakbetik yorail sventa jkʼopontik li kamigotaktik xa onoʼoxe xchiʼuk ti xkʼot ta kamigotik li yantik xtoke. Mi jvulaʼal li buchʼu tsjelubtas mantal ti jaʼ li jkʼelvanej ta distrito o takbil tal junuk ermano ta Betel li ta mukʼta tsobajele, chʼakbo yorail xtok sventa xavalbe ti lek chʼambiluk xaʼi sba xchiʼuk yajnile. Jech oxal chaʼa, ¡oy lek srasonal kuʼuntik sventa oyuk xa tajek ta koʼontontik li mukʼta tsobajel ta jun kʼakʼale!