La Biblia: historia exacta, profecía confiable

¿Kʼusitik chakʼ ta ilel ti jech kʼotemik ta pasel ta melel li kʼusi chal Vivliae? ¿Kʼusitik albil kʼop kʼotemik xa ta pasel ti jaʼ chakʼ spatobil koʼontontik ti chkʼot ta pasel li yan ti mu to bu kʼotemik ta pasele? Li sjakʼobiltak taje chichʼ takʼel li ta DVD La Biblia: libro de hechos y profecías, xiʼe, jaʼ li ta yoxibal pelikula ti jaʼ sbi La Biblia: historia exacta, profecía confiable. Ta jtijkutik avoʼonton xa kʼel li pelikulae, mi laje takʼo li sjakʼobiltak liʼe:

1) ¿Buchʼu yakʼoj ta naʼel li kʼusi chal Vivlia ti xuʼ jpat-o koʼontontike? (Dan. 2:28.) 2) ¿Mi melel li kʼusi chal Vivlia ta sventa ti kʼuyelan toʼox li voʼneal Egiptoe, xchiʼuk kʼuxi kʼot ta pasel li albil kʼop chal ta Isaías 19:3, 4? 3) ¿Kʼuxi staojik ta ilel li buchʼutik ta xchanbeik skʼoplal li kʼusitik voʼne mukajtik ta lum ti jech li kʼusi chal Vivlia ta sventa ti kʼuyelan li j-asiriaetike xchiʼuk li ajvaliletik yuʼunike, xchiʼuk ti kʼuyelan laj li slumalike? (Nah. 3:1, 7, 13.) 4) ¿Kʼusi albil kʼopetik ta sventa Babilonia jech kʼotemik ta pasel ta melel? (Jer. 20:4; 50:38; 51:30.) 5) ¿Kʼuxi kʼot ta pasel ta melel jun albil kʼop ta sventa li Medopersiae? (Isa. 44:28.) 6) ¿Kʼuxi kʼot ta pasel li kʼusi chal Daniel 7:6 xchiʼuk 8:5, 8 ta sventa li Greciae? 7) ¿Kʼuxi kʼot ta pasel Daniel 7:7 kʼalal pas ta mukʼta tsatsal lum li Romae? 8) ¿Buchʼutik ajvaliletik o cesaretik chichʼ albel skʼoplal li ta Vivliae? 9) ¿Kʼusi kʼot ta pasel ta stojolal yajtsʼaklomtak Cristo kʼalal jaʼo ch-ajvalilaj li Nerone? 10) ¿Kʼuxi kʼot ta pasel li kʼusi chal Apocalipsis 13:11 xchiʼuk 17:10? 11) ¿Buchʼu jaʼ skʼoplal li xvaxakibal ajvalile? 12) ¿Kʼusitik chakʼ ta ilel ta video ti jech ta melel li kʼusi chal li Eclesiastés 8:9? 13) ¿Kʼusitik albil kʼop oy ta avoʼonton cha kʼel chkʼot ta pasel? 14) ¿Kʼuxi van xuʼ cha tunes li video sventa chavakʼbe yil yan krixchanoetik ti likem tal ta stojolal Dios li Vivliae?