¿Kʼusi tskoltautik sventa oyuk-o ta koʼontontik li chol mantale?
1. ¿Kʼusi koltaat-o Jesús sventa mas tsots skʼoplal xil li chol mantale?
1 Li Jesuse te ikʼub osil yuʼun ta xpoxtael jchameletik xchiʼuk ta slokʼesbel pukuj ta yoʼonton li krixchanoetike. Ta yokʼomal kʼalal taat yuʼun li yajtsʼaklomtake, xi albate: «Scotol cristianoetic ta stʼunicot». Jech laj yalik, yuʼun tskʼanik ti akʼo spas yan skʼelobiltak juʼelale. Akʼo mi jech albat, li Jesuse jaʼ laj yakʼ ta yoʼonton spasel li kʼusi mas tsots skʼoplale, jaʼ li chol mantale. Jaʼ yuʼun xi la stakʼe: «Jaʼ lec batic ta lumetic liʼ noʼoxe. Yuʼun chbat jcholbe yaʼyic ec li Lequil Aʼyeje. Yuʼun jaʼ ta sventa ti talemune». ¿Kʼusi koltaat-o Jesús sventa mas tsots skʼoplal xil li chol mantale? Jaʼ ti sob lokʼ spas orasion xchiʼuk oy kʼusitik tsnopilane (Mar. 1:32-39). Sventa oyuk-o ta koʼontontik li chol mantale, ¿kʼuxi tskoltautik li snopilanbel skʼoplal jtosuk kʼusie?
2. ¿Kʼusitik xuʼ jnopbetik skʼoplal ti tskoltautik sventa oyuk-o ta koʼontontik li chol mantale?
2 Kʼusi ti skʼan jnopilantike. Li Jesuse «toj abul sbaic laj yil [li krixchanoetike]. Yuʼun jatsa bu tanpuquic jech chac cʼu chaʼal chijetic ti muʼyuc xchabiele» (Mat. 9:36). Li voʼotik eke xuʼ jnoptik kʼu to yepal krixchanoetik skʼan xaʼiik li lekil aʼyeje. Xuʼ jnopilantik xtok ti nopol xa oyutik ta slajebal kʼakʼale (1 Cor. 7:29). Jech xtok, xuʼ jnopbetik skʼoplal li spasbentak xchiʼuk stalelaltak li Jeovae, li matanal jtaojtik ti jaʼ yajRextikoutike xchiʼuk ta sventa li sbaliltak kʼusi jchanojtik ta sKʼop Dios ti mu to xojtikinik li krixchanoetik bu ta jcholtik mantale (Sal. 77:11-13; Isa. 43:10-12; Mat. 13:52).
3. ¿Bakʼin ti xuʼ jnopilantike?
3 Bakʼin xuʼ jnopilantik. Xuʼ jpastik kʼuchaʼal la spas li Jesuse, ta jujun sob kʼalal muʼyuk kʼusi chchʼay koʼontontike. Yantike mas lek chaʼiik tsnopilanik kʼalal jutuk xaʼox skʼan xvayike (Gen. 24:63, NM). Xuʼ jtabetik yorail akʼo mi mu noʼox xi jxokob yilel. Jlome jaʼo tspasik kʼalal tikʼilik batel ta karoe. Yantik xtoke jaʼo kʼalal chveʼik ta jujun sob kʼalal lek noʼox tsʼijile. Ep xtoke, jaʼ lek chaʼiik kʼalal skʼan toʼox xlokʼik ta chol mantale, akʼo mi uni jlikel noʼox, yuʼun jaʼ chkoltaatik sventa jamal xkʼopojik xchiʼuk ti sjunul yoʼontonik xcholik li mantale.
4. ¿Kʼu yuʼun tsots skʼoplal skʼan jnopilantik?
4 Mi ta jpastik orasion kʼalal ta jnopilanbetik skʼoplal jtosuk kʼusie, mas me tstij koʼontontik chi jtun ta stojolal Jeova, tskoltautik sventa mas tsots skʼoplal xkiltik li yichʼel ta mukʼ Diose xchiʼuk tstsatsubtasutik yoʼ oyuk-o ta koʼontontik xcholel li mantale. Mi la stabe sbalil snopilanel li Bankilal yajTunel Diose, jaʼ xkaltik li Jesuse, mas to me xuʼ jtabetik sbalil li voʼotike.