Kʼupino xcholel li lekil aʼyejetike

¿Mi oy bakʼintik ti mu xakʼan xalokʼ ta cholmantale? Maʼuk atuk noʼox, jech chkaʼi jbakutik ek. Yikʼaluk van jaʼ ta skoj ti mu skʼan mantal li krixchanoetike, ti muʼyuk lek tstakʼike, o yikʼaluk van jaʼ ta skoj ti vokol chkaʼitik skʼoponel li buchʼutik mu xkojtikintike. Li kʼusitik chkʼot ta pasel taje xuʼ jvul-o koʼontontik yuʼun. Pe jaʼ chijtun ta stojolal li Dios ti xmuyubaje, jaʼ yuʼun tskʼan ti xijmuyubaj noʼox kʼalal ta jpasbetik yabtele (Sl 100:2; 1Ti 1:11). ¿Kʼusi oxib srasonal oy kuʼuntik sventa jkʼupintik li cholmantale?

Li baʼyele jaʼ ti chkaltik batel jun spatobil oʼontonale. Akʼo mi tsvul tajek yoʼonton li krixchanoetike, xuʼ van xmuyubajik kuʼuntik kʼalal chkalbetik skʼoplal li «cʼusi jaʼ sventa jlequilaltique» (Is 52:7). Xuʼ xijmuyubajutik yuʼun li lekil aʼyejetik ta sventa li Ajvalilal yuʼun Dios eke. Kʼalal jutuk xa skʼan xalokʼ ta cholmantale, nopbo skʼoplal li bendisionetik chakʼ talel ta balumil li Ajvalilal yuʼun Diose.

Li xchibale kʼalal ta jcholtik mantale ta stabeik sbalil ti sakuk noʼox li sbekʼtalike xchiʼuk ti lekuk xil sbaik xchiʼuk li Diose. Yuʼun xuʼ xiktaik li kʼusitik chopol toʼox tspasike xchiʼuk xuʼ van staik li kuxlejal sbatel osile (Is 48:17, 18; Ro 1:16). Jnoptik noʼox ti jaʼ kabteltik skoltael li krixchanoetik ti chil svokolike, akʼo mi oy buchʼu mu xchʼam li koltaele, maʼuk chijlubtsaj-o saʼel li buchʼutik tskʼan chkolike (Mt 10:11-14).

Li yoxibale jaʼ li kʼusi mas tsots skʼoplale: kʼalal ta jcholtik mantale jaʼ ch-ichʼat-o ta mukʼ li Jeovae. Toj ep sbalil chil li kʼusi ta jpastike (Is 43:10; Evr 6:10). Li kʼusi mas to leke, jaʼ ti chakʼbutik ta slekil yoʼonton li xchʼul espiritu sventa xchol kuʼuntik li mantale. Jaʼ yuʼun, jkʼanbetik vokol ti xakʼbutik li xchʼul espiritu sventa jtatik li muyubajele (Gal 5:22). Kʼalal chkakʼ tskoltautik li Jeovae, xuʼ stsal kuʼuntik li xiʼele xchiʼuk xuʼ tsots koʼontontik kʼalal ta jcholtik mantale (Ech 4:31). Vaʼun, mi chchʼam o moʼoj li krixchanoetike, jkʼupintik ti kʼu yepal xuʼ kuʼuntik spasele (Eze 3:3).

MI LAJ AKʼELIK LI VIDEO CHAʼTA-O YAN VELTA LI MUYUBAJEL KʼALAL CHA CHANUNAJ XCHIʼUK CHANOPBE SMELOLALE, TAKʼIK LI SJAKʼOBILTAK LIʼE:

• ¿Kʼu yuʼun skʼan jmakʼlin jbatik lek ta mantal akʼo mi ep ta jcholtik mantal li ta jujun ue?

• ¿Kʼuxi xuʼ jchanbetik stalelal li Mariae?

• ¿Bakʼin chachʼakbe yorail sventa chanopbe skʼoplal kʼusi chal li Vivliae?

• ¿Kʼusi ti mas chakʼupin yalbel skʼoplal kʼalal chachol mantale?