¿Mi chapalik li avalab anichʼnabe?
1. ¿Kʼu yuʼun skʼan chapalikuk li avalab anichʼnabike?
1 Jutuk xa skʼan xlik chanun li jabil liʼe. Melel onoʼox ti oy kʼusi chlajik-o ta sujel xchiʼuk chil svokolik li kerem-tsebetik ti jaʼik yajtsʼaklomtak Cristoe, pe jech noxtok, jaʼ te xuʼ xlik yalik «li cʼusi melele» (Juan 18:37). ¿Mi chapalik li avalab anichʼnabe?
2. ¿Kʼusi skʼan snaʼik sventa lek chapalikuk li avalab anichʼnabike?
2 ¿Mi snaʼoj lek li kʼusitik snitojbe sba skʼoplal ta sventa li skʼinal vandera o li jeche kʼinetik tspasik krixchanoetik li avalab anichʼnabe? ¿Mi xaʼibeik smelolal ti kʼu yuʼun mu stakʼ jpastike? ¿Mi chapalik van sventa snaʼuk kʼuyelan chtakʼavik kʼalal chichʼik sujel sventa chchanunajik ta universidade? ¿Mi snaʼik kʼusi xuʼ spasik kʼalal chichʼik sujel ti akʼo xojtikinik junuk kerem o tseb, ti tsujatik ta yuchʼel pox o ti tstunesik drogae? ¿Mi jaʼ noʼox chalik ti mu stakʼ spasik ta skoj li srelijionike o mi snaʼik lek kʼuxi xuʼ xchapbeik skʼoplal li kʼusi xchʼunojike? (1 Ped. 3:15.)
3. ¿Kʼuxi xuʼ xchapan yalab xnichʼnabik li totil-meʼiletik li ta Akʼobal sventa Yichʼel ta Mukʼ Jeova ta Kutsʼ Kalaltike?
3 Tunesik lek li Akʼobal sventa Yichʼel ta Mukʼ Jeova ta Kutsʼ Kalaltike. Xuʼ van jaʼo xalbeik skʼoplal li svokol tsnuptanik kʼalal yakal chchanunajike. Mas me tsots yoʼonton li avalab anichʼnabik mi chavakʼik persa baʼyel cha chapanik ti kʼalal skʼan toʼox xlik chanune. Ta sventa taje, ¿kʼu yuʼun mu xa chʼakbeik jun chibuk li Akʼobal sventa Yichʼel ta Mukʼ Jeova ta Kutsʼ Kalaltike? Xuʼ xa jakʼbeik li kʼusi mas chil-o svokolik kʼalal mi sutik ta chanun li avalab anichʼnabike. Jech xtok, xuʼ van jaʼ xa loʼiltaik li kʼusi avalojbeik xa onoʼox skʼoplal li jabiletik echʼe yuʼun xuʼ van mas xa xaʼibeik smelolal (Sal. 119:95). Xuʼ van xachanik xchiʼuk avalab anichʼnabik kʼuyelan xuʼ xtakʼavik, vaʼun xuʼ voʼoxuk xapasik ta jchanubtasvanej yilel o ti voʼoxuk chabeiltasik li jchanunetik sventa snaʼik kʼusi xuʼ xchanike (orientadores) o ti jaʼ xa xchiʼiloxuk ta chanun yilele. Chanubtasik ta stunesel Vivlia kʼalal oy kʼusi tstakʼike xchiʼuk ta stunesel li abtejebaletik jech kʼuchaʼal li livro Razonamiento xchiʼuk li volumenetik Los jóvenes preguntan. Oy jun ermanae nopem xaʼi chchan xchiʼuk yalab sventa snaʼikuk kʼuxi xuʼ xchiʼinik ta loʼil li achʼ smaestroike xchiʼuk ti xakʼ sbaik ta ojtikinel kʼuchaʼal yajrextikotak Jeova ta slikeb noʼox chanun ta jujun jabile. (Kʼelo Li Jkʼel osil ta toyole, ta 15 yuʼun disiembre ta 2010, pajina 3 kʼalal ta 5.)
4. ¿Kʼusi skʼan spasik li pʼijil totil-meʼiletike?
4 Li kerem-tsebetik avie mas to toj «tsots vocol» tsnuptanik ta skoj ti oyutik ta slajebal kʼakʼale (2 Tim. 3:1). Pe jaʼuk li pʼijil totil-meʼiletike tspasik bu kʼalal xuʼ yuʼunik sventa chchapan li yalab xnichʼnabike (Pro. 22:3). Jaʼ yuʼun chaʼa, koltaik me li avalab anichʼnabik sventa lekuk chapalik mi lik chanun li jabil liʼe.