Revistaetik sventa skotol krixchanoetik
1. ¿Kʼuxi chchanbe Pablo li j-abtel ti tukʼ yoʼonton, ti lek pʼije?
1 Sventa xkʼot ta yoʼonton lekil aʼyej yuʼun skotol krixchanoetik li Pabloe, jaʼ jech la spas ti kʼuyelan tskʼan krixchanoetike, jaʼ jech ek li j-abtel ti tukʼ yoʼonton, ti lek pʼije tstunes li revistaetik sventa xkʼot ta yoʼonton mantal li krixchanoetik ti jeltos xkuxlejalik xchiʼuk ti jeltos snopbenike (1 Cor. 9:22, 23). Sventa lek jtunestik li ¡Despertad! xchiʼuk Li Jkʼel osil ta toyole, skʼan jnaʼtik buchʼu sventa pasbil.
2. Li revista ¡Despertad!, ¿buchʼu sventa pasbil?
2 ¡Despertad! Jaʼ sventa li buchʼutik jechik kʼuchaʼal li «Atenas viniquetic» ti laj yalbe mantal Pabloe (Hech. 17:22). Li viniketik taje muʼyuk yichʼojik chanubtasel ta sventa li Cristoe xchiʼuk jutuk tajek li kʼusi snaʼik ta sventa Vivliae. Li revista ¡Despertad! eke jaʼ sventa li buchʼutik mu snaʼik kʼusi chal Vivliae. Jaʼ skʼoplalik li buchʼutik mu snaʼik ta sventa li Cristoe o solel mu xchʼunik ta sventa li relijione o mu snaʼik ti ep sbalil li kʼusi chal Vivliae. Li kʼusi sventa yichʼoj pasel li revista liʼe jaʼ ti xakʼik venta ti oy jun melel Dios li buchʼutik tskʼelike. Jech noxtok, jaʼ sventa tstsatsaj-o xchʼunel oʼontonal ta sKʼop Dios xchiʼuk chakʼ ta ilel ti mu xkoʼolajik xchiʼuk yan relijionetik li yajrextikotak Jeovae.
3. ¿Buchʼutik sventa yichʼoj pasel li revistaetik Li Jkʼel osil ta toyole?
3 Li Jkʼel osil ta toyole. Li revista sventa skotol krixchanoetike jaʼ sventa li buchʼutik xchʼunojik Dios xchiʼuk ti xchʼunojbeik li sKʼope, jech kʼuchaʼal ti xi laj yalanbe krixchanoetik li Pabloe: «Voʼoxuc [...] ti axiʼtaojic ti Diose» (Hech. 13:14-16). Jaʼik krixchanoetik ti xojtikinik jutuk li kʼusi chal Vivliae, pe ti mu xaʼibeik lek smelolale. Li revista sventa chichʼ chanel Li Jkʼel osil ta toyole jaʼ noʼox sventa li yajrextikotak Jeovae. Li Pabloe snaʼoj lek ti buchʼutik chchanik li skarta la stsʼibae xojtikinik lek li kʼusi chal sKʼop Diose xchiʼuk ti xojtikinik lek li kʼusi melele (1 Cor. 1:1, 2). Jech noxtok, li revista chichʼ chanel ta tsobobbaile laj yichʼ pasel sventa li buchʼutik chkʼotik xa onoʼox li ta jtsobajeltike xchiʼuk ti xojtikinik li jpʼelantik kʼopetik chichʼ tunesel ta s-organisasion Jeovae.
4. ¿Kʼu yuʼun skʼan xkakʼtik persa ti jkʼeltik lek ta jujulik li revistaetik ti chkakʼtik ta cholmantale?
4 Akʼo mi xchibal chkakʼtik ta cholmantal li revistaetike jun noʼox li mas chkalbetik skʼoplale. Jaʼ yuʼun skʼan xkakʼtik persa ti jkʼeltik lek ta jujulik li revistaetike. Mi jech ta jpastike xuʼ me jaʼ xkalbetik li kʼusi mas lek chaʼiik li krixchanoetik sventa xchikintabutike.