Jvokʼ ti bu oy sjakʼobile

◼ ¿Buchʼu xuʼ xkakʼbetik li vunetike?

Jaʼ xuʼ xkakʼbetik li buchʼutik oy ta yoʼontonike. Mi chkiltik ti oy ta yoʼonton mantal ta melel li krixchanoetike xuʼ xkakʼbetik komel chaʼlik revista, jlikuk foyeto, livro, o yan vunetik. Jech ta jpastik manchuk mi chkakʼtik venta ti jutuk o muʼyuk chakʼ matanal takʼin ta sventa li abtelal ta spʼejel Balumile (Job 34:19; Apo. 22:17). Jech xtok, muʼyuk onoʼox chkakʼbetik vunetik li buchʼutik muʼyuk sbalil chilike (Mat. 7:6).

¿Kʼuxi chkakʼtik venta mi oy ta yoʼonton mantal li yajval nae? Ti kʼuxi xuʼ xvinaje, jaʼ ti lek chloʼilaje, ti chchikinta li kʼusi chkaltike, ti tstakʼ li kʼusi ta jakʼbetike xchiʼuk ti chal li kʼusi tsnope. Mi tstsʼakli batel li bu yakalutik skʼelel ta Vivliae chakʼ ta ilel ti chichʼ ta mukʼ li Skʼop Diose. Jtunel me xtok ti jakʼbetik mi tskʼel li vun chkakʼbetike. Skʼan oyuk jpʼijiltik sventa jnaʼtik mi oy ta yoʼonton mantal li krixchanoe. Jech kʼuchaʼal liʼe, kʼalal ta jcholtik mantal ta kayeetike, mu sta-o ti chkakʼbetik vun skotol xa noʼox li buchʼutik te chanavike. Mi mu jnaʼtik mi oy ta yoʼonton mantal li krixchanoe jaʼ lek kakʼbetik junuk tratado o yan bikʼtal vun.

Jech noxtok, ti kʼuyepal chkichʼtik batel li vunetike jaʼ ti kʼuyepal chtun kuʼuntik ta cholmantale, maʼuk ti kʼuyepal xuʼ kuʼuntik yakʼel li matanal takʼine. Li matanal takʼine maʼuk stojol li vunetike, jaʼ sventa ta jkolta jbatik ta skotol li abtelaletik ta spʼejel Balumile. Manchuk mi oy o mi muʼyuk jtakʼintik, ti mi oy sbalil chkiltike jaʼ tstij koʼontontik ta yakʼel bu kʼalal xuʼ kuʼuntik yoʼ jpukbetik batel skʼoplal li Ajvalilal yuʼun Diose (Mar. 12:41-44; 2 Cor. 9:7). Taje jaʼ tstij koʼontontik ti jaʼ noʼox chkichʼtik batel ti kʼuyepal chtun kuʼuntik ta cholmantale xchiʼuk ti mu xkixtolantik li kʼusitik oy sventa jpasbetik li yabtel Diose.

[Tsʼib ti mukʼtik sletraile ta pajina 2]

Skʼan oyuk jpʼijiltik sventa jnaʼtik mi oy ta yoʼonton mantal li krixchanoe