Voʼob smelolal kʼuyelan ta tael buchʼu xuʼ jchanubtastik ta Vivlia
1. ¿Kʼusi xuʼ jpastik mi muʼyuk to bu jtaojtik junuk krixchano ti tskʼan chchan Vivliae, xchiʼuk kʼu yuʼun?
1 ¿Mi tsots chavaʼi stael buchʼu xuʼ xachanubtas ta Vivlia? Mu me xalubtsaj, saʼilano-o. Li Jeovae chakʼbe bendision li buchʼu chakʼ persa ta spasel li kʼusi tskʼane (Gál. 6:9). Li avie, chavichʼ albel voʼob kʼusitik xuʼ xapas sventa tskoltaot.
2. ¿Kʼusi jtosukal xuʼ jpastik sventa jlikestik junuk chanubtasel ta Vivlia?
2 Tukʼ xavalbe mi skʼan xchan Vivlia. Epal krixchanoetike snaʼojik ti chkakʼtik komel li ¡Despertad! xchiʼuk Li Jkʼel osil ta toyole, pe mu snaʼik mi chkakʼtik chanubtasel ta Vivlia xtok. Ta yan velta mi lalokʼ ta cholmantal ta naetike, ¿kʼu yuʼun mu tukʼuk xavalbe ti mi skʼan xchʼam junuk chanubtasel ta Vivlia li yajval nae? Albo ek li krixchanoetik ti chavulaʼane. Mi laj yalbot ti moʼoje, xuʼ xavichʼolanbe batel vunetik xchiʼuk xuʼ xavulaʼan-o. Oy xaʼox jayibuk jabil chichʼbe batel revistaetik jun nupultsʼakal li jun ermanoe. Jun veltae bat yakʼbe li bu mas achʼik toe, vaʼun kʼalal chbat xaʼoxe xi la sjakʼbee: «¿Mi mu xakʼan xachanik Vivlia li voʼoxuke?». Labal to laj yaʼi ti «tana» xiike, li avi une yichʼojik xa voʼ xchaʼvoʼalik.
3. ¿Kʼu yuʼun skʼan mu xanop ti yakal xa chchanik Vivlia li buchʼutik chkʼotik ta Salon sventa Tsobobbaile?
3 Chiʼino ta loʼil li buchʼutik chkʼotik ta Salon sventa Tsobobbaile. Mu me xanop ti yakal xa chchanik Vivlia li krixchanoetik ta skoj noʼox ti chkʼotik ta tsobajeletike. Xi laj yal jun ermanoe: «Mas ta oʼlol li buchʼutik ta jchanubtas ta Vivliae te laj taanan ta tsobajel. Jun ants ti mu snaʼ xloʼilaj leke voʼlajuneb xaʼox jabil chkʼotilan ta Salon sventa Tsobobbail xchiʼuk stsebetak, ti yichʼojik xaʼox voʼe. Jaʼo chkʼotilan kʼalal chlik xaʼox tajek li tsobajeletike xchiʼuk chbat noʼox ta ora mi laj li tsobajele. Jun kʼakʼale, albat yuʼun jun ermana mi tskʼan chchan Vivlia li antse. Vaʼun la xchʼam xchiʼuk laj yichʼ voʼ ta mas jelavel. Xi la stsʼiba li ermanae: «¡Toj chopol chkaʼi ti la jmala voʼlajuneb jabil sventa chkalbe mi tskʼan chchan li Vivliae!».
4. ¿Kʼusi xuʼ jpastik sventa jtatik buchʼutik tskʼanik chanubtasel ta Vivlia?
4 Jakʼo mi oy buchʼu tskʼan koltael. Jun ermanae chbat xchiʼin yan jcholmantaletik sventa chbat yakʼik chanubtasel ta Vivlia. Kʼalal laj xaʼox xchanike, tsjakʼbe li jchanun —ti baʼyel chalbe li jchanubtasvaneje— mi oy buchʼu xojtikin ti tskʼan van chanubtasel ta Vivliae. Yan ti kʼusi xuʼ jpastike jaʼ ti jakʼbetik mi oy buchʼu xojtikin ti oy ta yoʼonton skʼan jlikuk livro li buchʼutik yakal ta jvulaʼantik xchiʼuk ti xchʼamojik xa li livro Chchanubtasvane. Jech xtok, yikʼaluk van oy jcholmantaletik xchiʼuk prekursoretik ti mu xuʼ yuʼunik xchanubtasel junuk krixchano ti oy ta yoʼonton chchan Vivliae. ¿Kʼu yuʼun mu xavalbe ti xuʼ xachanubtase?
5. ¿Kʼu yuʼun lek ti jakʼbetik li malalil o ajnilal ti maʼuk yajtsʼaklom Cristo mi skʼan xchan Vivliae?
5 Chiʼino ta loʼil li malalil o ajnilal ti maʼuk yajtsʼaklom Cristoe. ¿Mi oy jcholmantaletik ta atsobobbail ti maʼuk jchʼunolajel li snup xchiʼile? Jlome mu skʼan xcholbatik mantal yuʼun li snup xchiʼilike, pe jaʼ chchʼamik kʼalal yan buchʼu chchanubtasat ta Vivlia ti maʼuk yutsʼ yalale. Kʼalal jech taje, jaʼ lek ti baʼyel xichʼ jakʼbel li snup xchiʼil ti jaʼ jchʼunolajel sventa jnaʼtik kʼuxi xchiʼuk bakʼin xuʼ jchiʼintik ta loʼile.
6. ¿Kʼu yuʼun tsots skʼoplal ti jpastik orasion sventa jtatik buchʼu skʼan xchan Vivliae?
6 Kʼanbo koltael li Jeovae. Mu xaval ti maʼuk jtunel li orasione (Sant. 5:16). Li Jeovae chal ti tskoltautike jaʼ noʼox venta mi jech ta jpastik kʼuchaʼal chal stuke (1 Juan 5:14). Jun ermano ti mu noʼox xokob tajek chaʼie la skʼanbe Jeova ti akʼo xkoltaat ta stael buchʼu xuʼ xchanubtas ta Vivlia. Li yajnile laj yat yoʼonton ta skoj ti xuʼ van mu xokob ta skoltael li buchʼu chchanubtas ta Vivliae mas to mi oy ep svokoltake. Jaʼ yuʼun laj yalbe Jeova li kʼusi tsvul-o yoʼontone. Li orasion la spas xchaʼvoʼalike laj yichʼik takʼbel kʼalal chib xemana ta mas jelavel albat yuʼun jun prekursora li ta tsobobbail ti la sta jun vinik ti tskʼan chanubtasel ta Vivliae, vaʼun laj yalbe li ermano ti akʼo xbat xchanubtas ta Vivliae. Li yajnile xi la stsʼibae: «Li buchʼutik chal ti mu xuʼ yuʼunik yakʼel chanubtasel ta Vivliae, chkalbeik ti akʼo spasik orasione xchiʼuk ti jamal xalik li kʼusi tskʼanike. Muʼyuk bu la jnopkutik ti jun tajek koʼonton chkaʼi jbakutik ta skoj taje». Mi mu xalubtsaje, ta me xata junuk buchʼu skʼan chanubtasel ta Vivlia xchiʼuk ta me xata jun oʼontonal ti chakolta ta stael «li sbelal cuxlejale» (Mat. 7:13, 14).