Junuk noʼox koʼontontik yuʼun li kabteltike
1. ¿Kʼuxi xuʼ xijchibaj li ta cholmantale?
1 Li krixchanoetike pasatik yuʼun Dios sventa xuʼ «scʼupin lec yaʼay li stojol [yabtelike]» (Ecl. 2:24). Jaʼ yuʼun, ta skoj ti muʼyuk chkilbetik sbalil li cholmantal ta jpastike, xuʼ van xchibajes koʼontontik xchiʼuk mu xa jkʼupintik. ¿Kʼuxi xuʼ xijmuyubaj noʼox?
2. ¿Kʼusi skʼan jtsaktik ta venta kʼalal ta jcholtik mantale?
2 Teuk me ta joltik li kʼusi spas noʼox kuʼuntike. Akʼo mi jutuk li buchʼutik laj yaʼiik li mantal laj yal Jesuse, muʼyuk buchʼu xuʼ xal ti muʼyuk kʼusi lek kʼot ta pasel yuʼun kʼalal la xchol mantale (Juan 17:4). Li ta lokʼolkʼop laj yal Jesús ta sventa li jtsʼunolajele, laj onoʼox yal ti oy ep buchʼutik muʼyuk chchʼi ta yoʼontonik li mantal ta sventa li Ajvalilal yuʼun Diose (Mat. 13:3-8, 18-22). Pe jkʼeltik kʼusi chkʼot ta pasel ta skoj ti tsots chij-abtej li ta cholmantale.
3. ¿Kʼuxi ti chakʼ sat kabteltik akʼo mi mu xchʼamik li krixchanoetike?
3 Kʼuxi ti chakʼ sat li kabteltike. Li ta lokʼolkʼop laj yal Jesús ta sventa li jtsʼunolajele chal ti buchʼutik chchʼamik li mantal ta sventa Ajvalilal yuʼun Diose chakʼik ta ilel li «sat» yabtelike (Mat. 13:23). Kʼalal chchʼi talel steʼel xchiʼuk chyijub li trigoe maʼuk steʼel chlokʼ talel yan velta, moʼoj, yuʼun chakʼ achʼ sbekʼ. Jaʼ jech ek kʼalal chlik satinuk yabtel li jun yajtsʼaklom Cristoe, maʼuk skʼan xal ti yuʼun tspas ta yajtsʼaklomtak Cristo li krixchanoetike, moʼoj, li kʼusi skʼan spase jaʼ ti skʼan spuk-o batel li sbekʼ mantale, jaʼ xkaltik, ti chichʼ alilanel batel li lekil aʼyej ta sventa li Ajvalilal yuʼun Diose. Li kʼusi «lec» ta jtatik ta skoj taje, jaʼ chakʼbutik jun oʼontonal, mu ventauk kʼuyelan chchʼamik li krixchanoetike. Kʼalal ta jcholtik mantale, jaʼ jech ta jkolta jbatik sventa xichʼ ichʼel ta mukʼ sbi li Jeovae (Is. 43:10-12; Mat. 6:9). Jaʼ jun muyubajel ti ta jchiʼintik ta abtel li Diose (1 Cor. 3:9). Jech xtok, li Jeovae toj lek chil kʼalal smoton chkʼot kuʼuntik li kʼusitik «chlocʼ ta queti[ke]» (Heb. 13:15, 16).
4. ¿Kʼuxi xuʼ chakʼ sat kabteltik akʼo mi mu xkiltik?
4 Jvules ta joltik ti mu skotoluk velta chkilbetik sbalil li tsatsal abtel ta jpastike. Xuʼ van junantik li buchʼu laj yaʼibeik Jesuse muʼyuk bu xkʼotik ta yajtsʼaklom kʼalal liʼ toʼox oy ta Balumile. Jaʼ jech ek, li sbekʼ kʼusi melel ta sventa Ajvalilal yuʼun Diose xuʼ van mu xvinaj ta anil ti chakʼ yibel ta yoʼonton jun krixchano xchiʼuk ti chchʼie, xuʼ van xkʼot ta yajrextiko Jeova ta mas jelavel, akʼo mi mu xkiltik. Jamal ta aʼyel ti oy kʼusi lek chkʼot ta pasel yuʼun li cholmantale. Jech oxal chaʼa, satinkutik lek xchiʼuk kakʼtik ta ilel ti jaʼutik yajtsʼaklom Cristoe (Juan 15:8).