Lek tsʼakal jcholtik batel li lekil aʼyeje
1. ¿Kʼusi slekil kʼelobil laj yiktabutik li Pabloe?
1 «Acʼo me vuʼuc avuʼun li avabtel avichʼoje.» (2 Tim. 4:5.) Ta skoj ti jech onoʼox nopem xaʼi spasel jtakbol Pablo taje, jaʼ yuʼun jech laj yalbe li Timoteoe. Yuʼun tetik van ta sjabilal 47 kʼalal ta 56 ta jkʼakʼaliltike oxib velta bat ta misioneroal li Pabloe. Jech xtok, li ta slivroal Hechose ep ta velta chalbe skʼoplal ti jtakbol Pabloe lek tsʼakal la xchol li lekil aʼyeje (Hech. 23:11; 28:23). ¿Kʼuxi xuʼ jech jpastik li avi eke?
2. ¿Kʼuxi xuʼ lek tsʼakal ta jcholtik mantal kʼalal chijbat ta naetike?
2 Ta naetik. Oy krixchanoetike muʼyuk yabinojik-o li mantale, pe sventa jtatik ta cholbel mantale skʼan van jelbetik li yorail kʼuyelan ta jcholtik mantale. Jech xtok, mi chijlokʼutik ta cholmantal li ta sabado xchiʼuk domingoe xuʼ van jtatik ta cholbel mantal li joliletik ta utsʼ alalile. Skʼan xkakʼtik persa sventa jchiʼintik ta loʼil li yajval naetike, pe mi muʼyuk te ta snaike toj tunel ti jtsaktik ta vune, taje jaʼ sventa xbat jvulaʼantik ta yan kʼakʼal. Pe mi mu jtatik li yajval nae xuʼ van jkʼopontik ta telefono o xkiktabetik jlikuk karta.
3. ¿Kʼusi xuʼ xapas sventa xachol mantal ta butikuk noʼox o li bu oy ep krixchanoetike?
3 Ta butikuk noʼox o li bu oy ep krixchanoetike. Li stestigotak Jeovae chkakʼtik ta ojtikinel ta stojolal skotol krixchanoetik ti tskʼan chchikintaik li melel «bijubtasele». Bateltike ta jcholtik mantal «ta xoraltic», jaʼ xkaltik ta kayeetik, o «ta chʼivit» (Prov. 1:20, 21). Jaʼ jech chkakʼtik persa spasel xtok kʼalal oy kʼusitik ta jpastik jujun kʼakʼale. Mi jech ta jpastik taje xuʼ xkaltik ti «[kakʼojbetik] yipal xcholel scʼop Dios» xchiʼuk ti yakal ta jpastik li kʼusi oy ta jbatik ti chkaltik ta jamale (Hech. 10:42; 17:17; 18:5; 20:20, 21, 24).
4. ¿Kʼuxi tskoltautik li orasione xchiʼuk ti jnopbetik skʼoplal sventa lek tsʼakal jcholtik mantale?
4 Xuʼ van mu jkʼan jcholtik mantal ta skoj ti mu noʼox xijkʼopoj chkaʼi jbatike o ta skoj ti oy kʼusi mu spas kuʼuntike, pe li Jeova lek xaʼibe smelolal ti kʼuyelan chkaʼi jbatike (Sal. 103:14). Kʼalal jech chkʼot ta jtojolaltike jkʼanbetik Jeova sventa xakʼbutik jtsatsaltik ta xcholel li mantale (Hech. 4:29, 31). Yan kʼusi xuʼ skoltautike jaʼ ti jnoptik ti tsots skʼoplal li cholmantal ta jpastik kʼalal ta jchan ta jtuktik li Vivliae (Filip. 3:8). Mi jech ta jpastike mas oy sbalil chkiltik li cholmantale xchiʼuk jaʼ tstij koʼontontik sventa xijmuyubaj noʼox chkaltik batel.
5. ¿Kʼusi xuʼ jpastik sventa jkolta jbatik yoʼ jech xkʼot ta pasel li albilkʼop ta slivroal Joele?
5 Li ta slivroal Joele chal ti yoʼ to mu xvul li xibal sba smukʼta kʼakʼalil Jeovae, li steklumale oy ta yoʼontonik xcholel li lekil aʼyej ti mu kʼusi xuʼ xpajesatik-oe (Joel 2:2, 7-9). Jaʼ yuʼun, lek tsʼakal jcholtik li lekil aʼyej ti muʼyuk xa jech chichʼ pasel yan veltae.