Jchanbetik stalelal li j-alkʼop Jonase
1. ¿Kʼusitik lekik stalelaltak laj yakʼ ta ilel li Jonase?
1 ¿Kʼusi chtal ta anopben kʼalal chanopbe skʼoplal li j-alkʼop Jonase? Jtos li kʼusi xuʼ xtal ta joltike jaʼ ti xiʼe o ti muʼyuk xkʼuxubaj ta yoʼonton li yantike. Akʼo mi jech, jamal laj yakʼ ta ilel ti bikʼit laj yakʼ sbae, ti tsots yoʼontone xchiʼuk ti laj yakʼ svokol ta skoltael yantike. ¿Kʼuxi xuʼ jchanbetik slekil talelaltak li Jonase? (Sant. 5:10.)
2. ¿Kʼuxi xuʼ jchanbetik ti bikʼit laj yakʼ sba li Jonase?
2 Bikʼit laj yakʼ sba. Ta slikebale jatav, jot-o be la stam batel, ti maʼuk li bu albat chbat xchol mantale. Mu labaluk sba chkaʼitik taje, yuʼun nabil lek ti ep kʼusitik toj chopol tspasik li j-asiriaetike xchiʼuk «jmal-chʼichʼ jteclum» yichʼoj ojtikinel li Nínive eke (Nah. 3:1-3, Ch). Pe li Jeovae la stukʼibtas, bikʼit laj yakʼ sba li Jonase, yuʼun la xchʼam tukʼibtasel kʼalal albat yan velta ti akʼo bat xchol mantal tee (Prov. 24:32; Jon. 3:1-3). Akʼo mi muʼyuk la xchʼun mantal ta slikebal, laj onoʼox spas li kʼusi tskʼan yoʼonton Diose (Mat. 21:28-31). Jech ek li avie, ¿mi ta sjunul van koʼontontik ta jcholtik mantal akʼo mi kichʼojtik tukʼibtasel o mi tsots ta cholel mantal li bu takbilutik batele?
3. ¿Kʼu yuʼun skʼan lek tsots koʼontontik xchiʼuk ti chkakʼ jvokoltik ta skoltael yantik kʼalal ta jcholtik mantale?
3 Lek tsots yoʼonton xchiʼuk laj yakʼ svokol ta skoltael yantik. Kʼalal laj yakʼ venta ti laj yakʼbe ta vokol xkuxlejal buchʼutik te ch-abtejik ta varko ta skoj ti chopol li kʼusi la spase, lokʼ ta yoʼonton tskoltaan akʼo mi xcham (Jon. 1:3, 4, 12). Ta mas tsʼakale, la xchʼun ti chbat ta Ninivee, och ta yutil to li jteklume xchiʼuk lik skʼel lek ti bu xuʼ xlik yal li kʼusi snopoj tspas Jeovae. Taje maʼuk chakʼ ta ilel ti jaʼ jun vinik ti chiʼe, yuʼun laj yakʼ iluk ti lek tsots yoʼontone (Jon. 3:3, 4). ¿Kʼusi xuʼ jchantik yuʼun? Jaʼ ti tsots skʼoplal li yip koʼontontik chakʼ Dios sventa jcholtik mantale, akʼo mi ep buchʼutik chkontrainvanik (Hech. 4:29, 31). Xchiʼuk skʼan xkakʼ jvokoltik ta skoltael yantik kʼalal ta jchʼak jkʼakʼaltik xchiʼuk li kʼusitik oy kuʼuntik sventa jcholtik li mantale (Hech. 20:24).
4. ¿Kʼu yuʼun lek ti jchʼakbetik yorail sventa jnoptik ti kʼusi xuʼ jchantik yuʼun li yaj-alkʼoptak Jeovae?
4 Ta jujukoj mi jkʼelbetik sloʼilal junuk yaj-alkʼop Jeovae jnoptik ti voʼotik jech chkʼot ta jtojolaltike, yuʼun mi jech ta jpastike ta jtabetik sbalil. Xi jakʼbe jbatike: «¿Kʼusi van la jpas jechuke? ¿Kʼuxi xuʼ xkakʼ ta jkuxlejal li slekil talelaltake?» (Heb. 6:11, 12). Li ta Kabteltik sventa Dios[e] chlik lokʼuk tal yan mantaletik ti chchapbe skʼoplal yan kʼusitik xuʼ jchantik yuʼun yaj-alkʼoptak li Jeovae.