Jvokʼ ti bu oy sjakʼobile

◼ ¿Kʼusi beiltasel ta Vivlia skʼan jtsaktik ta venta kʼalal ta jtunestik selular ta tsobajel xchiʼuk ta cholmantale?

«Scotol oy scʼacʼalil.» (Ecl. 3:1.) Li ta selularetike xuʼ jtaktik mensajeetik xchiʼuk xuʼ jkʼopontik krixchanoetik ta kʼusiuk noʼox ora. Akʼo mi jech, li yajtsʼaklomutik Cristoe oy onoʼox bakʼintik ti mu stakʼ xchʼay koʼontontik li jselulartike. Jech kʼuchaʼal liʼe, li ta tsobajeletike jaʼ sventa chkichʼtik ta mukʼ Jeova, chkichʼtik chanubtasel ta mantal xchiʼuk ta jpatbe jba koʼontontik ta jujuntal (Deut. 31:12; Sal. 22:22; Rom. 1:11, 12). ¿Mi xuʼ van jtupʼtik li jselulartike xchiʼuk ti jaʼ to jkʼel jmensajetik mi lijlokʼ xaʼox ta salone? Mi mu stakʼ jtupʼtik ta skoj ti xuʼ van oy kʼusi xkʼot ta pasel ti tsots skʼoplale, skʼan me jkʼel kʼu xkutik sventa mu jchʼaybetik yoʼonton li yantike.

Skʼan me jpastik skotol «ta sventa li Lequil Aʼyeje» (1 Cor. 9:23). Bateltike jtunel sventa cholmantal li selulare. Jech kʼuchaʼal liʼe, li buchʼu sbainoj li grupoe xuʼ stunes sventa skʼopon batel li buchʼutik ta jot-o to yakal xcholik mantal li ta yosilal cholmantale. Jech xtok, xuʼ van tskʼan baʼyel tskʼopon yajchanuntak o li buchʼutik chchaʼvulaʼanan kʼalal skʼan toʼox xbat skʼel li jun jcholmantale, mas to mi nom to bu nakalike. Akʼo mi jech, skʼan me jkʼeltik ti mu xchʼay koʼontontik li jselulartik kʼalal yakal chkalbetik mantal jun krixchanoe (2 Cor. 6:3). Jech xtok, mi skʼan jmalatik yan jcholmantaletike mu lekuk ti jaʼo chijkʼopoj o ti ta jtakbetik batel mensaje junuk kamigotike. Jaʼ lek kakʼ ta koʼontontik li cholmantale xchiʼuk teuk jsatik bu oy li yan jcholmantaletike.

Jtsaktik ta venta li yantike (1 Cor. 10:24; Filip. 2:4). Mu me stakʼ jnoptik ti mu ventauk mi mu xijkʼot ta yorail li ta tsobajel sventa cholmantal ta skoj ti xuʼ jkʼopontik batel o ti jtaktik junuk mensaje sventa jakʼtik bu chichʼ cholel mantale. Yuʼun kʼalal echʼem ora chijkʼote skʼan chaʼkʼelel kʼuxi chkom li grupoe. Melel onoʼox ti bateltike oy kʼusi xuʼ smakutik ti mu yolbajuk jech ta jpastik ti echʼem ora chijkʼote. Pe mi chkakʼtik persa ta yorail noʼox chijkʼote chkakʼtik ta ilel ti ta jtsaktik ta venta li Jeovae, li ermano ti chbeiltasvane xchiʼuk li kermanotaktike.