«¡Muʼyuk onoʼox bu te oy ta sna!»
Ta melel xuʼ van oy jech kalojtik kʼalal mu jtatik ta sna li buchʼu chbat jchaʼvulaʼantik ti lek laj yaʼi mantale. Akʼo mi chkakʼtik persa, pe bakʼintike mu jtatik ta atʼesel o maltael li tsʼunobil ta mantal ti oy la jtsʼuntik komele (1 Cor. 3:6). ¿Kʼusi van stakʼ jpastik? Jlom jcholmantaletik ti lek xtojobike ta stsʼibabeik batel jlik karta o ta stsʼibabeik jlikuk uni vun sventa chchʼikbeik komel ta stiʼ sna. Oy yan jcholmantaletik xtoke, ta skoj ti snaʼojik ti vokol xuʼ te staik ta sna li krixchanoe, tskʼanbeik snumeroal stelefono. Xitik chalbeik li krixchanoe: «¿Mi xuʼ jtakbot talel junuk mensaje?». Xuʼ jtsak ta j-informetik ti la jchaʼvulaʼantik li ta jujukoj ta jtsʼibabetik karta, ta jtakbetik batel koreo, mensaje, la jtsʼibabeik komel jlikuk uni vun o la jkʼopontik batel ta telefono. Vaʼun, xuʼ jech xkakʼtik chʼiuk ta yoʼontonik li mantale, manchuk mi muʼyuk onoʼox bu te oy ta snaik.