Jchanbetik stalelal li Joele
1. ¿Kʼuxi xuʼ jchanbetik ti bikʼit laj yakʼ sba Joel kʼalal ta jcholtik mantale?
1 ¿Buchʼu van li j-alkʼop Joele? Jaʼ noʼox chal sba ti jaʼ «xnichʼon Petuele» (Joel 1:1). Li j-alkʼop ti bikʼit yakʼoj sbae jaʼ mas tsots skʼoplal laj yaʼi li mantal laj yal Jeovae maʼuk li yabtel ti jaʼ j-alkʼope. Jaʼ jech li ta jkʼakʼaliltik eke, kʼalal ta jcholtik mantale maʼuk ta jkʼantik ti xkichʼtik ojtikinel o ti xkichʼtik ichʼel ta mukʼ ta skoj li kʼusitik ta jpastike, jaʼ mas lek ti jaʼ xkakʼtik ta ichʼel ta mukʼ Jeova xchiʼuk li Vivliae (1 Cor. 9:16; 2 Cor. 3:5). Jech xtok, kʼalal ta jcholtik mantale jaʼ tstsatsubtas koʼontontik. ¿Kʼuxi tstsatsubtas spatobil koʼontontik avi li kʼusi laj yal j-alkʼop Joele?
2. ¿Kʼusi van tstij koʼontontik spasel ti poʼot xa xtal li lajebale?
2 «Nopaj xa talel scʼacʼalil yorail ti Diose.» (Joel 1:15, Ch.) Akʼo mi oy xa ta smilal jabil ti laj yichʼ tsʼibaele, li ta jkʼakʼaliltike yakal chkʼot ta pasel taje. Ti yantik sok batel li kʼusitik ta balumile, ti mu kʼusi skʼanik li krixchanoetike xchiʼuk ti chlabanvanik ti bu ta jcholtik mantale jaʼ svinajeb ti poʼot xa xichʼ lajesel li chopol balumil liʼe (2 Tim. 3:1-5; 2 Ped. 3:3, 4). Kʼalal chkiltik ti poʼot xa xtal li lajebale, oy me ep srasonal kuʼuntik sventa jaʼ baʼyel xkakʼ ta jkuxlejaltik li cholmantale (2 Ped. 3:11, 12).
3. ¿Kʼu yuʼun mas xa toj tsots skʼoplal jcholtik mantal ti poʼot xa xtal li tsatsal vokolile?
3 Li Jeovae jaʼ «jpojvanej jnacʼvanej» yuʼun li steklumale (Joel 3:16). Kʼalal ta xlik nikuk xi li ta versikuloe, jaʼ chalbe skʼoplal li yorail chchapanvan Jeova li ta tsatsal vokolile. Tspat me koʼontontik ti jnaʼojtik ti tskolta tukʼil yajtuneltak mi kʼot yorail taje (Apoc. 7:9, 14). Mi jaʼ chkakʼ ta koʼontontik li cholmantale xchiʼuk ti kʼuyelan chchabiutik li Jeovae jaʼ tstsatsubtas xchʼunel koʼontontik xchiʼuk chkuch kuʼuntik mi kʼot yorail li tsatsal vokolile.
4. ¿Kʼu yuʼun xijmuyubaj noʼox xchiʼuk lek tsots koʼontontik chkuch kuʼuntik li kʼusi chtal ta jelavele?
4 Akʼo mi muʼyuk lek chalbeik skʼoplal jlom krixchanoetik li kʼusi laj yal Joele, li voʼotik ti steklumalutik Diose tspat koʼontontik (Joel 2:32). Jaʼ yuʼun, tsotsuk me koʼontontik xkuch kuʼuntik li kʼusi chtal ta jelavele xchiʼuk oyuk me ta koʼontontik xcholel li lekil aʼyej sventa Ajvalilal yuʼun Diose. Taje jech ta jchʼuntik li kʼusi tsʼibabil ta Joel 2:23 ti xi chale: «Cuxetuc avoʼntonic tseʼinanic noʼox ta sventa li Mucʼul Dios avuʼunique».