Jvokʼ ti bu oy sjakʼobile

◼ Kʼalal oy buchʼu chichʼ yaʼi voʼe, ¿kʼu xaʼox van sjalil skʼan chkʼotilan ta tsobajel xchiʼuk likem ta xcholel mantal sventa xuʼ xichʼ voʼe?

Li yichʼel voʼe jaʼ li kʼusi mas toj tsots skʼoplal tspas ta xkuxlejal jun krixchanoe. Jaʼ yuʼun, baʼyel skʼan xaʼibe lek smelolal kʼusitik chkʼanbat yuʼun Dios li buchʼu tskʼan chichʼ voʼe. Jech xtok, yakʼoj xa van ta ilel ti oy lek ta yoʼonton chakʼ ta xkuxlejal li kʼusitik tskʼan Diose.

Ch-albatik ti mu xiktaik tsobajel li yajtsʼaklom Cristoe, jaʼ yuʼun, li buchʼu oy ta yoʼonton chichʼ voʼe skʼan ti yakʼojuk xa ta ilel ek ti chakʼ persa chkʼotilan ta tsobajele (Heb. 10:24, 25). Xuʼ van nopajtik noʼox chakʼ sloʼil xtok li ta tsobajele. Stsakoj xa van sbi li ta Chanob vun sventa Kabteltik yuʼun Dios xtoke, akʼo mi mu persauk jech chichʼ pasel sventa li ichʼvoʼe.

Li yajtsʼaklomtak Cristoe oy ta sbaik yalel lekil aʼyej xchiʼuk ti spasik ta yajtsʼaklom Cristo li krixchanoetike, jaʼ yuʼun li buchʼu tskʼan chichʼ voʼ eke skʼan me nopajtik noʼox xlokʼ ta cholmantal kʼalal muʼyuk to yichʼoj voʼe (Mat. 24:14; 28:19, 20). ¿Jayib xaʼox van u skʼan ochem ta jcholmantal li buchʼu tskʼan chichʼ voʼe? Skʼan van ti yakʼojuk xa ta ilel ti ta sjunul yoʼonton nopajtik noʼox chlokʼ xchol mantal li ta jujun ue (Sal. 78:37). Akʼo mi jech, mu persauk ti jal xa tajek yakal chchol mantal sventa xichʼ voʼe, xuʼ van bakʼintike ta jayib noʼox u. ¿Kʼu van yepal skʼan stikʼ yora ta yalobil cholmantal sventa xuʼ xichʼ voʼe? Ta sventa taje muʼyuk mi junuk mantal ti persa skʼan jech xichʼ pasele. Skʼan xrasonajik xchiʼuk stsakik ta venta ti jelel xkuxlejal jujun jcholmantal li moletik ta tsobobbaile (Luc. 21:1-4).

Kʼalal te tsobolik xchiʼuk buchʼu tskʼan chichʼ voʼ li moletik ta tsobobbail (o li yajkoltaobba moletik kʼalal juteb moletik li ta tsobobbaile) skʼan me svules ta sjolik ti jelel li jujun krixchanoe xchiʼuk skʼan me stunes spʼijilik sventa tsnopik mi sta-o ti xichʼ voʼe. Tskʼan van tskʼelik mi oy ta yoʼonton ta melel ti chkʼot ta jun stestigo Jeovae, mi chakʼ ta ilel ti jaʼ jun matanal chaʼi ti tstsob sba xchiʼuk li s-organisasion Jeovae xchiʼuk ti nopajtik noʼox chlokʼilan ta cholmantale. Li moletike xuʼ xakʼik venta xtok ti skʼan to van xchʼi ta mantale xchiʼuk ti mu to jechuk xtojob lek jech kʼuchaʼal jun jcholmantal ti yichʼoj xa voʼ xchiʼuk ti lek xtojobe. Mi mu to sta-o xichʼ voʼ laj yilike, skʼan me ta slekil yoʼonton xalbeik ta Vivlia ti kʼu yuʼun mu to xuʼ xichʼ voʼe xchiʼuk tskʼelik ti xichʼ koltael ta mantale.