Jchanbetik stalelal li Amose
1. ¿Kʼu yuʼun xuʼ stsatsubtas koʼontontik li skʼelobil laj yakʼ ta ilel Amose?
1 ¿Mi oy van junuk velta mu xchol mantal avuʼun laj avaʼi ta skoj ti abol noʼox abae? Mi jech chavaʼi abae, xuʼ xata spatobil avoʼonton li skʼelobil laj yakʼ ta ilel Amose. Yuʼun jaʼ toʼox jun jchabiej chij xchiʼuk mu skotoluk ora oy yabtel; akʼo mi jech, albat yuʼun Jeova sventa xal jun mantal ti tsots skʼoplale (Amós 1:1; 7:14, 15). Li avi eke, jaʼ tstunes Jeova li buchʼutik bikʼit yakʼoj sbaike (1 Cor. 1:27-29). ¿Kʼusi yan xuʼ jchantik yuʼun j-alkʼop Amós ti xuʼ jtunestik ta cholmantale?
2. ¿Kʼu yuʼun skʼan tukʼ xkakʼ-o jbatik akʼo mi chkichʼtik kontrainel li ta cholmantale?
2 Tukʼ xavakʼ aba akʼo mi xavichʼ kontrainel. Li Amasiase jaʼ jun pale ti chichʼ ta mukʼ chʼiom tot vakax ti pasbil ta oro li ta lajunvokʼ snitilulal Israel ta nortee, kʼalal laj yaʼi kʼusi yakal chal Amós li palee xkoʼolaj xi laj yal yaʼeluke: «¡Batan ta alumal! ¡Iktaunkutik! ¡Oy xa jrelijionkutik ek!» (Amós 7:12, 13). Sventa spajesbat yabtel yuʼun ajvalil Jeroboam li Amose, oy kʼusitik laj yal Amasías ti mu jechuke (Amós 7:7-11). Pe muʼyuk bu xiʼ li Amose. Li avie, oy jlom jnitvanejetik ta relijione tsaʼik koltael ta politika sventa tskontrainik li steklumal Jeovae. Pe li Jeovae jpʼel yalojbutik ti muʼyuk spasojik jchopuk abtejebal ti xuʼ tspajesutike (Is. 54:17).
3. ¿Kʼusi chaʼtos aʼyej chkalbetik skʼoplal li ta jkʼakʼaliltike?
3 Alo li chapanel chakʼ Diose xchiʼuk li bendisionetik chichʼ talele. Akʼo mi laj yal Amós ti chichʼ chapanel li lajunvokʼ snitilulal Israele, kʼalal la stsutses stsʼibael li slivroal Vivlia ti jaʼ yichʼojbe sbi li j-alkʼope, te laj yal ti tspas li kʼusi laj yal Diose, ti tstsob sbaik yan veltae xchiʼuk ti tstaik epal bendisione (Amós 9:13-15). Li voʼotik eke chkaltik ti chtal «yorail chapanele», pe taje jaʼ noʼox jlomuk li «Lequil Aʼyej» ta sventa li Ajvalilal yuʼun Dios ti skʼan xkaltik batele (2 Ped. 3:7; Mat. 24:14). Mi laj xaʼox yichʼik lajesel ta Armagedón yuʼun Jeova li chopol krixchanoetike, chkʼataj ta paraiso li Balumile (Sal. 37:34).
4. ¿Kʼuxi jnaʼojtik ta melel ti tspas kuʼuntik li kʼusi tskʼan yoʼonton Jeovae?
4 Li epal kontrainel ta jtatik ta skoj ti ta jcholtik mantal sventa Ajvalilale chakʼ ta preva ti jpʼel ta koʼontontik ti jech chijkuxi kʼuchaʼal kakʼoj jbatik ta stojolal Jeovae xchiʼuk ti oy ta koʼontontik spasel li kʼusi tskʼan yoʼontone (Juan 15:19). Akʼo mi jech, jpatoj koʼontontik ta melel ti chakʼbutik kʼusi chtun kuʼuntik sventa jpastik-o batel li kʼusi tskʼan yoʼonton Jeovae, jech kʼuchaʼal la spas ta stojolal li Amose (2 Cor. 3:5).