Kʼuxi xuʼ lek jchapantik li slikeb jloʼiltike

1. ¿Kʼu yuʼun toj tsots skʼoplal ti skʼan lek jchapantik li slikeb jloʼiltike?

¹ Jech kʼuchaʼal kʼalal ta jpastik preva baʼyuk jtosuk uni veʼlile mas xa ta jkʼan ta jlajestik, kʼalal lek ta jchapantik slikeb jloʼiltike jaʼ tskoltautik yoʼ lekuk xkalbetik skʼoplal Vivlia kʼalal ta jcholtik mantale. Kʼalal lek ta jchapan jbatik ta sventa li slikeb jloʼiltike xuʼ xjelilan ti kʼusi chkaltike xchiʼuk ti kʼu sjalile, yoʼ xkʼot kʼuchaʼal jtosuk veʼlil ti lek mue, skʼan chʼakbel lek yorail sventa xichʼ nopel lek xchiʼuk sventa xichʼ chapanel (Prov. 15:28). ¿Kʼusi van skʼan jpastik sventa lekuk li slikeb jloʼiltike?

2. ¿Kʼuxi xuʼ jchapantik lek slikeb jloʼiltik sventa xkʼot ta yoʼontonik li krixchanoetike?

² Tʼujo kʼusi chakʼan chaloʼilaj-o ti xuʼ xkʼot ta oʼontonale. Skʼan xkʼot ta oʼontonal li slikeb jloʼiltike, yuʼun mi muʼyuke xuʼ me xtuchʼ tabe jloʼiltik xchiʼuk li yajval nae. Jaʼ yuʼun, kʼalal jaʼo chachapan abae, jaʼ nopo li kʼusi mas chkʼot ta yoʼonton li krixchanoetik ti bu chachol mantale. ¿Mi jaʼ van oy ta yoʼontonik ti oyuk lek ajvalile, ti xmuyubajuk yutsʼ yalalike o ti xlaj skʼoplal li paskʼopetike? Li krixchanoetike lek xaʼiik yalel li kʼusi tsnopike, jaʼ yuʼun jakʼbo kʼusitik sventa xalik li kʼusi tsnopike xchiʼuk sventa snopbeik lek skʼoplal. ¿Kʼu yuʼun mu xatunes li skʼelobiltak talemik ta Kabteltik sventa Dios ti te chal kʼutik yelan ta cholel li mantale? ¿Kʼu yuʼun mu baʼyuk xa chanik skʼelobiltak cholmantal bakʼintik li ta Akʼobal sventa Yichʼel ta Mukʼ Jeova ta Kutsʼ Kalaltike?

3. ¿Kʼuxi xuʼ jeltik slikeb jloʼiltik kʼalal ta jtsaktik ta venta kʼu yelan stalel xkuxlejalik xchiʼuk kʼuxi chʼiik tal ta sbikʼtalik li krixchanoetike?

³ Tsako ta venta kʼu yelan stalel xkuxlejalik xchiʼuk kʼuxi chʼiik tal li krixchanoetike. Oy lumetik ti skʼan xichʼ alel ta anil noʼox ti kʼu yuʼun ta jvulaʼantik li krixchanoetike. Ta yan lumetik xtoke, chopol chilik kʼalal muʼyuk chkʼot jakʼbetik yajval na ti kʼu yelan oy li yutsʼ yalale xchiʼuk ti skʼan xkalbetik kʼusitik ta sventa li voʼotike. Ta yan lumetike chakʼik akʼo jkʼelbetik junuk teksto ta Vivlia kʼalal ta jcholbetik mantal li krixchanoetike, yuʼun jaʼ ta skoj ti tskʼelik onoʼox Vivlia li ta srelijionike (Hech. 2:14-17). Pe mi chʼabal srelijion li jun krixchanoe o ti muʼyuk tstunesik Vivlia ti bu chkʼotike, jaʼ van mas lek ti jaʼ to jkʼelbetik Vivlia kʼalal chbat jchaʼvulaʼantike, maʼuk kʼalal ta jcholbetik mantal ta sba veltae (Hech. 17:22-31).

4. ¿Kʼusi skʼan jtsaktik ta venta kʼalal ta jnoptik li kʼusi chkʼot kaltike?

⁴ Ti kʼusi chkʼot kaltike. Chapano lek li kʼusi chkʼot avalbe li yajval nae. Jaʼ mas lek mi jlikel noʼox xchiʼuk mi kʼunik noʼox ta aʼiel li kʼusi chavale. Tsots me skʼoplal xtok ti kʼu yelan chkʼot loʼilajkutike. Skʼan me baxbolukot ti kʼu yelan chakʼopoje. Tseʼetuk me ta melel xvinaj li asate xchiʼuk kʼalal mi lek koʼontontik chkakʼtik ta ilele, jaʼ te chvinaj ta melel ti oy ta koʼontontik li yajval nae. Mi ta jchʼuntik li tojobtaseletik taje jaʼ tskoltautik yoʼ jchapantik lek li slikeb jloʼiltike, spasel taje jaʼ chtijbat-o yoʼontonik xchiʼuk sventa smakʼlin-o sbaik «ta xmexa Cajvaltic» li krixchanoetik bu ta jcholtik mantale (1 Cor. 10:21).