Jchanbetik stalelal li j-alkʼop Miquease

1. ¿Kʼusi van la sjakʼbe sba li Miquease, xchiʼuk kʼu yuʼun mu jecheʼuk noʼox li cholmantal la spase?

¹ Ta melel oy van jakʼojbe jbatik kʼusi ora chtal slajeb li chopol balumil liʼe. Li j-alkʼop Miquease xuʼ van jech la sjakʼbe sba ek kʼalal jaʼo chalbe ajvaliletik ta Israel xchiʼuk ta Judá li chapanel chichʼ talel Jeova ta stojolalike. Ti kʼu yelan la xchol mantale mu jecheʼuk noʼox. Li ta sjabilal 740 kʼalal maʼuk toʼox jkʼakʼaliltike, ti kʼalal kuxul toʼox li Miquease, kʼot ta pasel li kʼusi laj yal Jeovae yuʼun laj yakʼbe kastigo li Samariae (Miq. 1:6, 7). Ta mas tsʼakale, laj yichʼ lajesel Jerusalén ta sjabilal 607 kʼalal maʼuk toʼox jkʼakʼaliltike (Miq. 3:12). Li voʼotik eke, ¿kʼuxi xuʼ jchanbetik stalelal Miqueas kʼalal jaʼo yakal ta jmalatik li chapanel chichʼ talel li Jeovae?

2. ¿Kʼu yuʼun skʼan oyuk smalael kuʼuntik kʼalal jaʼo ta jmalatik li skʼakʼalil Jeovae, xchiʼuk kʼusi smakoj taje?

² Oyuk smalael kuʼuntik. Xi la stsʼiba li Miquease: «Li vuʼune jaʼ noʼox te chcacʼ o [j]sat ta stojol li Mucʼul Diose; jaʼ noʼox ta jmala chiscoltaun li Diose, jaʼ li jcoltavanej cuʼune. Li Dios cuʼune ta onoʼox xiyaʼibun li jcʼope» (Miq. 7:7). Pe taje maʼuk skʼan xal ti te noʼox smeyoj skʼob la smala li Miquease. Moʼoj, yuʼun ta sjunul yoʼonton la spas li yabtel kʼuchaʼal j-alkʼope. Yoʼ to ta jmalatik li skʼakʼalil Jeova eke, skʼan jaʼuk xbat ta koʼontontik spasel ti tukʼ ta jpas jbatike xchiʼuk ti j-echʼel chkichʼtik-o ta mukʼ li Diose (2 Ped. 3:11, 12). Mu me xchʼay ta joltik ti smalael yuʼun Jeovae jaʼ sventa sutes yoʼontonik li krixchanoetike (2 Ped. 3:9). Jaʼ yuʼun, jechuk me xkakʼtik ta ilel smalael kuʼuntik kʼuchaʼal li j-alkʼopetike, jech kʼuchaʼal chalbutik Vivlia ti akʼo jpastike (Sant. 5:10).

3. ¿Kʼu yuʼun skʼan jkʼanilanbetik-o xchʼul espiritu li Jeovae?

³ Jpat koʼontontik ti chakʼbutik stsatsal li Jeovae. Li abtelal laj yichʼ akʼbel li Miquease mu kʼunuk, jaʼ yuʼun la skʼanbe koltael Jeova sventa stsatsubtasat (Miq. 3:8). Li Jeovae snaʼoj ti ta jkʼantik koltael eke, jaʼ yuʼun li Vivliae tstij koʼontontik ti akʼo jkʼanbetik ta orasion li Jeovae. Mi lijlubutike, li Jeovae chakʼbutik ep jtsatsaltik sventa spas kuʼuntik li yabtele (Sal. 84:5, 7; Is. 40:28-31). ¿Mi oy aviloj ta akuxlejal ti yakʼojbot atsatsal Jeova kʼalal chapas li chʼul abtelale? ¿Mi chakʼanilanbe xchʼul espiritu Jeova ti akʼo skoltaote? (Luc. 11:13.)

4. ¿Kʼusi slekil kʼelobil laj yakʼ kiltik li Miquease?

⁴ Li kʼusi mas tsots skʼoplal laj yaʼi li Miquease jaʼ li kʼusi tskʼan yoʼonton Jeovae. Jpʼel yoʼonton tukʼ laj yakʼ sba ta stojolal Dios akʼo mi chopol tajek stalelal krixchanoetik li ta skʼakʼalile. Li voʼotik eke ta jnuptantik prevaetik jujun kʼakʼal ta skoj ti tukʼ chkakʼ jbatike. Jaʼ yuʼun, jpʼeluk koʼontontik ti ta «sbatel osil jaʼ chquichʼtic o ta mucʼ li Mucʼul Dios cuʼuntique» (Miq. 4:5).