Mikeas 6:8 | «Biqʼuit acʼo avacʼ aba ta stojol Dios avuʼun»

«Krixchano, yalojbot Dios li kʼusi lek ta pasele. ¿Kʼusi tskʼanbot ti akʼo xapas li Jeovae? ¡Jaʼ ti xapas li kʼusi tukʼe, ti tukʼuk˗o xavakʼ abae xchiʼuk ti bikʼituk xavakʼ aba kʼalal chaxanav xchiʼuk li Adiose!» (Mikeas 6:8, Xchʼul Kʼop Dios sventa Achʼ Balumil).

«Aʼyo avaʼay, cristiano, li Mucʼul Diose yalojbot xa li cʼusi lec xuʼ chapase, xchiʼuc scʼanoj xa ta atojol li cʼusi acʼo apase: jaʼ noʼox tscʼan acʼo apas li cʼusitic tuqʼue, ti oyuc yutsil slequil avoʼntone, xchiʼuc ti biqʼuit acʼo avacʼ aba ta stojol Dios avuʼun ta sventa li cʼusitic chapase» (Mikeas 6:8, Xchʼul Cʼop Jtotic Dios, ta skʼop Chenalhó).

Li kʼusi skʼan xal Mikeas 6:8

Li j-alkʼop Mikease laj yal ti krixchanoetike mu toj vokoluk chaʼiik ti spasik li kʼusi tskʼan Jeovaea (1 Juan 5:3). Li ta versikulo liʼe oy oxtos ti kʼusi tskʼan Dios akʼo jpastike. Li baʼyuk chibe, te tsakal skʼoplal ti kʼu yelan ta jtsaktik ta venta li yantike xchiʼuk li yoxtosale te tsakal skʼoplal ti kʼu yelan chkil jbatik xchiʼuk li Diose.

Spasel li kʼusi tukʼe. Li buchʼutik chichʼik ta mukʼ li Diose ch-albatik yuʼun Dios ti jaʼuk spasik li kʼusi tukʼe. Taje te smakojbe skʼoplal li kʼusi ta jnoptike, ti jechuk jtalelaltik kʼuchaʼal lek chil Diose xchiʼuk ti mu jpastik li kʼusi chopol chile (Deuteronomio 32:4). Jech kʼuchaʼal liʼe, li buchʼutik chchʼunbeik smantaltak Diose chakʼik persa sventa lekuk xakʼ ta ilel stalelalik ta stojolal li yantike, ti muuk xtʼujvanik akʼo mi jelel li stalel xkuxlejalike, ti bu likemike, mi jkʼulejik o mi povreik (Levitiko 19:15; Isaias 1:17; Ebreos 13:18).

Tukʼ xavakʼ aba. Li jpʼelchaʼpʼel kʼop liʼe xuʼ xi xichʼ jelubtasele: «Ti xakʼan li tukʼil kʼanelale» (Mikeas 6:8, tsʼib ta yok vun). Li ta ebreo kʼop ti tukʼ chkakʼ jbatik xi li ta versikulo liʼe, te smakojbe skʼoplal ti tukʼ chkakʼ jbatik ta stojolal yantike, ti lek koʼontontik ta stojolale xchiʼuk ti oy xkʼuxul koʼontontike, mu baluk noʼox ti oy kʼusi jpastik jutebuke, skʼan ti oyuk to kʼusi mas jpastike. Li Diose maʼuk noʼox tskʼan ti xkakʼtik ta ilel li talelaletik taje, yuʼun skʼan jkʼantik xchiʼuk ti epuk sbalil xkiltike. Taje jaʼ skʼan xal ti sjunuluk yoʼonton skoltaik yantik li yajtuneltak Diose, mas to li buchʼutik chtun yuʼunike. Kʼalal oy kʼusi chkakʼtike, mas xijmuyubaj yuʼun (Echos 20:35).

«Bikʼituk xabakʼ aba kʼalal chaxanav xchiʼuk li Adiose». Li ta Vivliae kʼalal chal «chaxanav» xie, ep ta velta jaʼ chalbe skʼoplal ti oyuk kʼusi xichʼ pasele. Kʼalal chkaʼitik ti oy jun krixchano ti chanav xchiʼuk li Diose, jaʼ skʼan xal ti jaʼ tspas li kʼusi lek chil li Diose. Li Noee jaʼ jun slekil kʼelobil ti «xanav xchiʼuk melel Diose». Jaʼ jun vinik ti tukʼ ile yuʼun li Diose xchiʼuk ta skotol li buchʼutik jmoj kuxiik xchiʼuke, jaʼ chʼabal spaltail li Noee (Jenesis 6:9). Li avi kʼakʼale, yakal chijxanav xchiʼuk Dios mi laj kakʼ ta jkuxlejaltik li kʼusi chal li smantale, ti jaʼ li Vivliae. Pe sventa spas kuʼuntike, skʼan bikʼit xkakʼ jbatik, jaʼ xkaltik, ti jnaʼojtik ti oy kʼusi mu spas kuʼuntike xchiʼuk ti ta jkʼantik koltael ta stojolal Dios skotol orae (Juan 17:3; Echos 17:28; Apokalipsis 4:11).

Stsʼak loʼil ta Mikeas 6:8

Li Mikease tun kʼuchaʼal j˗alkʼop ti te naki li ta voʼneal jteklum Israele, ti jaʼo kuxi li ta 777 kʼalal ta 717 kʼalal muʼyuk toʼox talem Kristoe. Li vaʼ orae, li krixchanoetik tee chichʼik ta mukʼ jecheʼ diosetik, chchon sbaik ta takʼin xchiʼuk chilbajinik li krixchanoetike (Mikeas 1:7; 3:1-3, 9-11; 6:10-12). Jutuk mu skotoluk li j˗israeletike muʼyuk chchʼunbeik smantal Jeova ti laj yakʼbe Moisese, jaʼ xkaltik, li Smantal Moisese. Jutuk mu skotolikuke tsnopik ti xuʼ lek ch-ilatik yuʼun Dios ti mi tspasik li kʼusi nopem xaʼiik li ta srelijionike o ti xakʼik noʼox chikʼbil matanale (Proverbios 21:3; Oseas 6:6; Mikeas 6:6, 7).

Kʼalal echʼ xa ox jayibuk sigloe, li Jesuse jaʼ jech laj yal kʼuchaʼal li Mikease: ti Stote jaʼ lek chil li krixchanoetik ti chakʼik ta ilel kʼanelal, tukʼilal xchiʼuk xkʼuxul oʼontonale, pe ti muʼyuk lek chil li krixchanoetik ti lek xa stalelalik yilel o ti yichʼojik xa ta mukʼ Dios yilele (Mateo 9:13; 22:37-39; 23:23). Li kʼusi laj yal Jesuse tskoltautik ta yaʼibel smelolal ti kʼu yelan skʼan stalelal li yajtuneltak Dios avi kʼakʼale.

Sventa xavaʼibe smelolal kʼusi chal li slivroal Mikease, kʼelo li video liʼe.