Toj tunel yoʼ jlikestik chanubtasel ta Vivlia xchiʼuk li buchʼu chkichʼbetik batel jujun u li revistaetike
1. ¿Kʼu yuʼun tstij koʼontontik s-organisasion Jeova ti oyuk buchʼu chkichʼbetik batel jujun u li revistaetike?
1 Ep krixchanoetik muʼyuk ta yoʼontonik xchanel Vivlia xchiʼuk voʼotik, pe tskʼupinik skʼelel li jrevistatike. Jaʼ yuʼun epal jabil yalojbutik s-organisasion Jeova ti oyuk buchʼu xkichʼbetik batel jujun u li revistaetike. Kʼalal tskʼelilanik jrevistatik li krixchanoetike, jaʼ mas ch-ayan ta yoʼontonik li Skʼop Diose (1 Ped. 2:2). Ta mas tsʼakale, xuʼ van xkʼot ta yoʼontonik bakʼin li kʼusi tskʼelike, ta skoj taje xuʼ xchʼamik junuk chanubtasel ta Vivlia.
2. ¿Kʼusi xuʼ jpastik yoʼ xchʼi kuʼuntik ta yoʼonton mantal krixchanoetik kʼalal chkiktabetik komel jujun u li revistaetike?
2 Katʼestik li sbekʼtak melele. Maʼuk noʼox xaviktabe komel revistaetik li yajval nae xchiʼuk ti xabat noʼox ta anile, akʼo persa ti lekuk xavil aba achiʼuke xchiʼuk chiʼino ta loʼil. Mi jech chapas taje chavaʼi li kʼusi yakal chkʼot ta stojolale, li kʼusi oy ta yoʼontone xchiʼuk li kʼusitik xchʼunoje, taje tskoltaot sventa chanop lek baʼyuk li kʼusi chavale (Prov. 16:23). Melel onoʼox ti skʼan jchapan jbatik leke. Jsaʼtik junuk mantal ti yichʼoj tal li revistae xchiʼuk junuk teksto ti jaʼ chalbe skʼoplale. Taje jaʼ jech ta xkatʼestik li sbekʼtak melel ti jtsʼunojbetik xa ta yoʼontonike (1 Cor. 3:6). Mu me xchʼay ta joltik jtsaktik ta vun kʼusi ora ay jvulaʼantik, kʼusi vunal laj kiktabetik komel, kʼusi laj kalbetik skʼoplal xchiʼuk kʼusi teksto ta Vivlia la jkʼelbetik.
3. ¿Kʼusi van ora xuʼ sut jkʼeltik li buchʼu chkichʼbetik batel jujun u li revistaetike?
3 ¿Kʼusi van ora xuʼ sut akʼel? Skʼan xbat akʼel jun velta ta u sventa xbat aviktabe komel li revistaetik ti mas achʼike. Pe xuʼ sut noʼox akʼel, jaʼ ti kʼu yelan oy ta yoʼonton mantal li krixchanoetike xchiʼuk mi oy kʼu xavut eke. Jech kʼuchaʼal liʼe, mi echʼ xaʼox jun o chib xemana ti ay aviktabe komel li revistaetike xuʼ sut akʼel xchiʼuk xi xavalbee: «Jaʼ noʼox tal kalbot junuk mantal ta sventa li revista ti ay kakʼbote». Spasel taje jaʼ xuʼ xtijbat-o yoʼonton sventa skʼel junuk mantal li ta revistae. Mi laj xa skʼele xuʼ xajakʼbe kʼusi tsnop ta sventa taje xchiʼuk xuʼ xaloʼiltabe jutuk. Mi tskʼupin skʼelel jvuntik li krixchanoe, xuʼ van sut akʼel sventa xbat avakʼbe jlikuk tratado, foyeto o livro ti jaʼ yakal chkakʼtik li ta u taje.
4. ¿Kʼusi van xuʼ jpastik sventa xlik kakʼbetik chanubtasel ta Vivlia li buchʼu chkichʼbetik batel jujun u li revistaetike?
4 Mu me xamala ti jaʼ akʼo skʼanbot junuk chanubtasel ta Vivlia li yajval nae. Moʼoj, jaʼ mas lek ti voʼot baʼyuk xavalbee. Akʼo mi muʼyuk la xchʼam chanubtasel ta Vivlia li ta sba veltae, xuʼ van xavakʼbe yil bakʼintik li mantaletik chlokʼ ti jaʼ sbi: «Kʼusitik chichʼ jakʼel ta sventa Vivlia» ti chlokʼ li ta Li Jkʼel osil ta toyole, vaʼun te xvinaj mi tskʼan koʼol chachanik. Xuʼ van xlik avakʼbe junuk chanubtasel ta Vivlia ta stiʼ sna li yajval nae. Pe mi mu jechuk kʼot ta pasele, xuʼ onoʼox xavichʼbe batel revistaetik sventa x-ayan mas ta yoʼonton li mantale.