Lekubuk batel mas ti kʼu yelan xijtojob ta cholmantale: jchʼiesbetik ta yoʼonton mantal li buchʼu tskʼel jrevistatike

Kʼu yuʼun tsots skʼoplal. Oy ep krixchanoetik ti tskʼupinik skʼelel li jrevistatike, pe jaʼ noʼoxe mu skʼan xchʼamik junuk chanubtasel ta Vivlia. Taje jaʼ van ta skoj ti lek noʼox chaʼiik li ta srelijionike o ti mu noʼox xokobike. Akʼo mi jech, ta skoj ti nopolik noʼox tskʼelik li jrevistatike xuʼ x-ayan mas ta yoʼontonik li Skʼop Diose (1 Ped. 2:2). Yikʼaluk van oy junuk mantal ti xtijbat-o yoʼontone, o xuʼ oy kʼusi xjel ta xkuxlejal. Kʼalal nopolik noʼox chkʼot jvulaʼantik jlikeluke te chkakʼtik venta li kʼusi oy ta yoʼontonike xchiʼuk li kʼusi tsvul-o yoʼontonike, vaʼun xuʼ me mas xlik spat yoʼontonik ta jtojolaltik. Ta mas jelavele, xuʼ van xlik kakʼbetik junuk chanubtasel ta Vivlia.

Kʼuxi ta pasel:

Kʼalal mi lokʼ li revista Li Jkʼel osil ta toyole ichʼbo batel. Jech xtok xuʼ xbat avulaʼan ta yan kʼakʼal sventa xavalbe ti akʼo skʼel junantik mantal li ta revistaetik ay avakʼbee o sventa xbat avakʼbe li vun ti yakal chichʼ akʼel li ta u taje. Tsako lek ta vun. (Kʼelo li Kabteltik sventa Dios yuʼun enero ta 2014, paj. 3.)
Kʼalal chbat avulaʼan ta jujukoje chapano aba lek. Mu nakauk noʼox xbat aviktabe li revistaetike, akʼo persa xchiʼinel ta loʼil xchiʼuk paso ta avamigo sventa xachʼiesbe ta yoʼonton li mantale.
Teuk asat o kʼelo kʼusi ora xuʼ xalikesbe junuk chanubtasel ta Vivlia. Mi oy kʼusi la sjakʼbot ta sventa Vivlia li buchʼu chavichʼbe batel revistaetike, ichʼbo batel li vun ti chkakʼtik-o chanubtasel ti chalbe smelolal li kʼusi la sjakʼe xchiʼuk jmoj xachanik. Kʼalal te to oyot ta snae, oyuk kʼusi yan xajakʼbe ti te stsakojbe sba skʼoplal xchiʼuk li kʼusi la sjakʼbot ta baʼyele, vaʼun albo ti chatakʼbe mi bat akʼel ta yan veltae. Mi nopolik noʼox chaloʼilajik ta sventa mantal xchiʼuk li krixchanoe xchiʼuk mi chatunes Vivlia o yan vunetik ti chkakʼtik-o chanubtasele, yakal xa me chavakʼ jun chanubtasel ta Vivlia. ¿Mi avakʼojbe xa li foyeto Lekil aʼyejetik yakʼoj Dios xchiʼuk mi avalojbe xa kʼuxi xuʼ xachanik jlikeluk li Vivliae? Yan li kʼusi stakʼ xapase jaʼ ti xavakʼbe yil li videoetik ¿Kʼu yuʼun skʼan jchantik li Vivliae? xchiʼuk ¿Kʼu yelan li jtsobajelkutike? Akʼo mi mu toʼox xchʼam junuk chanubtasel ta Vivlia li krixchanoe, pe xuʼ me xjel li xkuxlejale. ¿Kʼu yuʼun mu xavalbe yan velta mi tskʼan junuk chanubtasel?

Paso jech sjunul u liʼe:

Pasbo junuk slistail ti buchʼutik xuʼ xavichʼbe batel jujun u li revistaetike. Akʼbo li revistaetik ti mas achʼike xchiʼuk albo ti chbat avakʼbe mi lokʼ tal li yane.