Akʼo jlikuk revista ti mu xa toj achʼuk slokʼele o jlikuk foyeto
Kʼalal jaʼo yuilal chkakʼtik li livro Chchanubtasvan sventa jlikestik junuk chanubtasel ta Vivlia ta sba velta vulaʼale, chkichʼtik albel ti akʼo xkakʼbetik jlikuk revista ti mu xa toj achʼuk slokʼele o junuk foyeto li krixchanoetik ti oy xa yuʼunik li livroe, pe ti mu skʼanik chanubtasele. ¿Kʼu yuʼun?
Li foyetoetik xchiʼuk li revistaetik ti mu xa toj achʼuk slokʼele ep kʼusitik chalbe sloʼilal ti jtunel kuʼuntik sventa xkʼot ta yoʼonton mantal li krixchanoetik bu ta jcholtik mantale. Jaʼ yuʼun mu me xchʼay xavaʼi xatikʼ batel jaylikuk ta avolsa o ta aportafolio kʼalal mi laj achapan aba sventa cholmantale. Mi muʼyuk avuʼun li vunetik taje, kʼanbo li buchʼu sbainoj vunetike. Mi la achiʼin ta loʼil junuk krixchano ti oy xa yuʼun li livro Chchanubtasvan pe ti mu skʼan xichʼ chanubtasel ta Vivliae, akʼbo yil jlikuk revista ti mu xa toj achʼuk slokʼele o jlikuk foyeto, vaʼun akʼbo stʼuj bu jlikukal tskʼan. Vaʼun albo ti chasut yan veltae. Mi jech chkʼot akʼelilan-oe, yikʼaluk van xlik xchʼam junuk chanubtasel ta Vivlia ta mas tsʼakal.