Kʼuxi xuʼ jkoltatik li buchʼutik vokol chaʼiik skʼelel vune

1. ¿Kʼusi vokolil ta jnuptantik kʼalal ta jchanubtastik krixchanoetik ta Vivlia ti mu snaʼik lek skʼelel vune?

¹ Li krixchanoetik ti vokol chaʼiik skʼelel vune xuʼ van oy ta yoʼontonik li mantale, pe xuʼ van chiʼik-o li Vivliae o yan livroetik. Jaʼ yuʼun xuʼ van mu skʼan xchʼamik chanubtasel mi jaʼ la avakʼbe li livro Chchanubtasvan ta slikebale. ¿Kʼuxi xuʼ jkoltatik ta mantal li krixchanoetik taje? Laj yichʼik jakʼbel ermanoetik mas ta jtob lum li kʼusi nopem xaʼi tspasik ta sventa taje. Kʼelavil li kʼusi laj yalike.

2. ¿Kʼusitik vunal skʼan jtunestik sventa jkoltatik li buchʼutik vokol chaʼiik skʼelel vune?

² Mi tsots chaʼi ta skʼelel vun chkiltik li krixchanoe o mi mu snaʼ skʼelele jaʼ lek jaʼ jtunestik li foyeto Chikintao kʼusi chal Dios o Chikintao kʼusi chal Dios sventa chakuxi sbatel osil. Oy jun prekursor ta Estados Unidose baʼyel chakʼbe yil xchaʼlikal foyeto li krixchanoetike, vaʼun tsjakʼbe bu mas lek chil ta chanel. Li Betel ta Keniae chal ti toj jtunel li vunetik taje, yuʼun li krixchanoetik ta Africae jaʼ la mas lek chaʼiik mi ch-albatik junuk loʼil kʼalal chichʼik chanubtasele, jaʼ la vokol chaʼiik kʼalal oy kʼusitik chjakʼbatike. Li buchʼutik chanunajemik leke xuʼ van kʼun noʼox chaʼiik skʼelel vun xchiʼuk stakʼel li kʼusi chichʼik jakʼbele, pe li buchʼutik muʼyuk lek chanunajemike xuʼ vokol chaʼiik. Pe mi snaʼ jutuk skʼelel vun chilik krixchanoetik li ermanoetike, jaʼ tslikesbeik-o chanubtasel li foyeto Lekil aʼyejetik yakʼoj Dios, Voʼote xuʼ cha vamikoin ti Diose o mi moʼoje jaʼ tstunesik li Jlivro ti chal loʼiletik ta Vivliae.

3. ¿Kʼusi skʼan jtsaktik ta venta yoʼ lek jchanubtastik li buchʼu mu snaʼik skʼelel vune?

³ Patbo yoʼontonik. Li krixchanoetik ti muʼyuk la xchanik skʼelel vune xuʼ van chkʼexavik, oy jlom xtoke muʼyuk noʼox sbalil chaʼi sbaik. Kʼalal chkalbetik ti junuk noʼox yoʼontonike, jaʼ ta xtijbat-o yoʼontonik sventa xchanik li kʼusi melele. Jutuk mu skotoluk li krixchanoetik ti mu snaʼik skʼelel vune toj pʼijik xchiʼuk xuʼ xchanik skʼelel vun. Kichʼtik me ta mukʼ xchiʼuk oyuk me sbalil xkiltik (1 Ped. 3:15, 16). Jaʼ me chtijbat-o yoʼontonik sventa xchanik batel mas mi chilik ti oy sbalil li kʼusi chchanike xchiʼuk mi yakal chchʼiik ta mantal chilike. Jaʼ yuʼun, skʼan me nopolik noʼox xapatbe yoʼontonik.

4. ¿Kʼuxi ta jtijbetik yoʼontonik sventa xchapan sbaik li buchʼutik vokol chaʼiik ta skʼelel vune?

⁴ Akʼo mi toj vokol chaʼi ta skʼelel vun li buchʼu chachanubtase albo me ti akʼo xchapan sbae. Jlom jcholmantaletik ta Sudafricae chalbeik li buchʼutik chchanubtasik ti akʼo sjakʼbeik yutsʼ yalalik o junuk yamigoik ti snaʼ lek skʼelel vun sventa xkoltaatik ta xchanele. Oy jun jcholmantal ta Gran Bretañae chakʼbe xchʼamun slivro li buchʼutik jaʼ to chchanik Vivliae sventa xakʼik venta ti mas kʼun ta aʼibel smelolal kʼalal pasbil xa subrayare. Maʼuk noʼox taje, yuʼun jaʼ jech tstijbe yoʼonton sventa xchapan sbaik ek. Jun ermano ta Indiae chalbe yajchanuntak ti akʼo skʼelik li lokʼoletik ti jaʼ to chchanbeik skʼoplal ta yan xemanae, sventa snopbeik xa noʼox batel skʼoplal li kʼusi chchanike.

5. ¿Kʼuxi xuʼ xkakʼtik ta ilel ti oy smalael kuʼuntik kʼalal chkakʼtik chanubtasel ta Vivliae?

⁵ Oyuk smalael avuʼun. Mu ventauk kʼusi vunal chakʼelik xchiʼuk li buchʼu chachanubtase, jaʼ me mas xavalbe lek skʼoplal li kʼusitik mas tsots skʼoplale xchiʼuk ti akʼo yaʼibe lek smelolale. Yikʼaluk van jaʼ mas lek ti lajunebuk o voʼlajunebuk noʼox minuto xachanik li ta slikebale. Mu me toj epuk parafo xachanik, jaʼ lek ti jayibuk noʼoxe. Oyuk me smalael avuʼun mi kʼun tskʼel vun li buchʼu chachanubtase. Mi lik skʼan mas li Jeovae jaʼ chtijbat-o yoʼonton yoʼ xchan skʼelel li vune. Sventa xkʼot lek ta yoʼontone, albo me ti xbat ta tsobajeletik kʼalal jaʼtik to chlik avakʼbe chanubtasele.

6. ¿Kʼusi skʼan jpastik sventa jchanubtastik ta skʼelel vun li krixchanoetike?

⁶ Mi la xchanik noʼox skʼelel vun li buchʼutik ta jchanubtastik ta Vivliae, mas me ta ora chchʼiik ta mantal (Sal. 1:1-3). Ep ermanoetike tstunesik li foyeto Akʼbo yipal ta skʼelel xchiʼuk ta stsʼibael vun sventa xchanik lek skʼelel vun li buchʼutik chchanubtasike xchiʼuk jaʼo chchanik jlikeluk kʼalal chlaj xa yoʼontonike. Mi oy bu chchibaj chavile patbo me yoʼonton, albo yaʼi ti oy xa kʼusitik xchanoj ti mu toʼox snaʼe. Albo yaʼi ti ch-akʼbat bendision yuʼun Jeova ta skoj ti chakʼbe yipale xchiʼuk albo me ti akʼo spas orasion sventa skʼan koltaele (Prov. 16:3; 1 Juan 5:14, 15). Jlom jcholmantaletik ta Gran Bretañae chalbeik yajchanunik ti akʼo snopik ti kʼusi tskʼan chchanik batele, jech kʼuchaʼal liʼe, chalbeik ti akʼo yakʼ ta yoʼontonik xchanel li letraetike, ti saʼik li tekstoetik ta Vivliae, ta mas tsʼakal une jaʼ ti skʼelik jlikuk vun ti lokʼem ta Vivlia ti kʼun noʼox ta aʼiele. Sventa xchanik skʼelel li vune, maʼuk noʼox me ti skʼan ta jchanubtastike, skʼan me jkoltatik sventa xlokʼ ta yoʼontonik ta xchanel.

7. ¿Kʼu yuʼun skʼan jpʼeluk koʼonton jkoltatik li krixchanoetik ti mu snaʼik lek skʼelel vun sventa xojtikinik li smantal Diose?

⁷ Manchuk mi mu snaʼik lek skʼelel vun li krixchanoetike oy me sbalil ch-ilatik yuʼun li Jeovae (Job 34:19). Jaʼ tskʼel li kʼusi oy ta koʼontontik li Jeovae (1 Crón. 28:9). Jaʼ yuʼun, jpʼeluk me ta avoʼonton xakolta li krixchanoetik ti mu snaʼik lek skʼelel vun sventa xojtikinik li smantal Diose. Oy me ep kabtejebtik sventa jkoltatik. Ta kʼunkʼun xlik avakʼbe xchan li livro Chchanubtasvane, vaʼun jaʼ jech chakolta sventa xaʼibeik smelolal li Chʼul Tsʼibetike.