Jchanbetik stalelal li j-alkʼop Sofoniase
1. ¿Kʼusi yakal chkʼot ta pasel kʼalal kʼot ta j-alkʼop li Sofoniase, xchiʼuk kʼu yuʼun jaʼ jun slekil kʼelobil ta jtojolaltik?
1 Li ta oʼloltik batel svukubal siglo kʼalal maʼuk toʼox jkʼakʼaliltike, solel pukem skʼoplal li yichʼel ta mukʼ Baal ta Judae. Li chopol ajvalil Amone jaʼtik toʼox laj yichʼ milel, vaʼun jaʼ laj yichʼ tʼujel sventa x-och ta ajvalil li kerem Josiase (2 Crón. 33:21–34:1). Li vaʼ kʼakʼal taje jaʼo tʼujat yuʼun Jeova li Sofonías sventa chal li chapanel chichʼ talel li Diose. Akʼo mi jaʼ van te likem talel ta snitilulal ajvaliletik ta Judá li Sofoniase, pe jamal lek laj yalbe bankilaletik ta jteklum li chapanel chichʼ talel Jeova ta stojolalike (Sof. 1:1; 3:1-4). Li voʼotik eke, chkakʼtik persa xchanbel stalelal li j-alkʼop ti muʼyuk xiʼe xchiʼuk muʼyuk chkakʼtik smakutik ta yichʼel ta mukʼ Jeova li kutsʼ kalaltike (Mat. 10:34-37). ¿Kʼusi jtosukal aʼyej laj yal li Sofoniase, xchiʼuk kʼusi kʼot ta pasel?
2. ¿Kʼusitik skʼan jpastik yoʼ ‹kolem xijkom kʼalal tsta skʼakʼalil ch-ilin li Mukʼul Diose›?
2 «Saʼic li Mucʼul Diose.» Jaʼ noʼox stuk Jeova xuʼ spoj li krixchanoetik kʼalal mi sta skʼakʼalil ch-iline. Jaʼ yuʼun li Sofoniase laj yalbe li krixchanoetik ta Judá ti akʼo saʼik li Mukʼul Diose, ti spasik li kʼusitik tukʼe xchiʼuk ti bikʼituk xakʼ sbaik yoʼ to oy yoraile (Sof. 2:2, 3). Li avi eke jaʼ jech yakal chkʼot ta pasel. Li voʼotike jaʼ jechutik kʼuchaʼal li Sofoniase, ta jtijbetik yoʼontonik sventa saʼik Dios li krixchanoetike, pe skʼan jsatik Dios li voʼotik eke xchiʼuk skʼan jpʼel koʼontontik mu xijnamaj ta stojolal li Jeovae (Sof. 1:6). Ta jsatik Jeova kʼalal sjunul koʼontontik ta jchantik li Vivliae xchiʼuk kʼalal ta jkʼanbetik ti akʼo sbeiltasutike. Ta jpastik kʼusitik tukʼ kʼalal sak li jkuxlejaltike. Bikʼit chkakʼ jbatik kʼalal chkakʼtik persa ti lekuk jtalelaltike xchiʼuk kʼalal sjunul koʼontontik ta jchʼuntik li beiltasel chakʼ li s-organisasion Jeovae.
3. ¿Kʼu yuʼun skʼan junuk koʼontontik jcholtik mantal?
3 Lek kʼusi kʼot ta pasel. Li aʼyej laj yal Sofoniase la stabeik sbalil jlom jnaklejetik ta Judá, pe jaʼ mas la stabe sbalil li Josiase, yuʼun lik saʼ Jeova kʼalal kʼox toʼoxe. Ta mas tsʼakale, li Josiase la spas jun kampanya sventa tslajesbe skʼoplal li yichʼel ta mukʼ jecheʼ diosetik ta yosilal Judae (2 Crón. 34:2-5). Li avie, akʼo mi oy chkʼot ta be, ta tontik xchiʼuk ta chʼixtik li aʼyej sventa Ajvalilal yuʼun Diose, pe oy jlom ti chkʼot ta lekil balumile xchiʼuk chakʼ lek sat (Mat. 13:18-23). Jpatoj lek koʼontontik ti chakʼbutik-o sbendision Jeova ta skoj ti chkakʼtik persa spukel li aʼyej sventa Ajvalilal yuʼun Diose (Sal. 126:6).
4. ¿Kʼu yuʼun skʼan chapalukutik ‹jmalatik kʼusi ora tsta skʼakʼalil chapanvan li Jeovae›?
4 Oy jlom jnaklejetik ta Judá ti la snopik ti muʼyuk chkʼot ta pasel li kʼusi laj yal Jeovae. Pe li Jeovae laj yal ta melel ti nopol xa skʼan xtal li smukʼta kʼakʼalile (Sof. 1:12, 14). Jaʼ noʼox chkolik li buchʼutik ta spat yoʼontonik ta stojolale (Sof. 3:12, 17). Kʼalal yakal ta ‹jmalatik kʼusi ora tsta skʼakʼalil chapanvan li Jeovae›, jkʼupintik me ti jmoj chijtunutik ta stojolal Jeova xchiʼuk li yan yajtuneltake (Sof. 3:8, 9).