XCHANOBIL 8
Lek yamigotak li Josiase
¿Mi tsots van ta pasel xanaʼ li kʼusi tskʼan Jeovae?... Jutuk mu skotoluk li krixchanoetike tsnopik ti tsotse. Li Vivliae chalbe skʼoplal jun uni kerem ti tsots laj yaʼi ta spasel li kʼusi leke, jaʼ sbi Josias. Pe oy lek yamigotak ti koltaat ta spasel li kʼusi leke. Kalbetik mas skʼoplal li Josias xchiʼuk li yamigotake.
Li stot Josiase jaʼ sbi Amón, ti ajvalilaj ta Judae. Toj echʼ noʼox chopol li Amone xchiʼuk jaʼ chichʼ ta mukʼ li santoetike. Kʼalal cham stot li Josiase, jaʼ och ta ajvalil ta Juda. ¿Mi xanaʼ jayib sjabilal kʼalal och ta ajvalile? ¡Vaxakib yuni jabilal! ¿Mi jech van chopol xanaʼ kʼuchaʼal li stote?... Moʼoj, ¡toj lek maʼ stuke!
Li Sofoniase laj yalbe krixchanoetik ti chopol mi jaʼ chichʼik ta mukʼ li santoetike
Akʼo mi bikʼit toʼox li Josiase tskʼan chchʼunbe smantal li Jeovae. Jaʼ yuʼun, jaʼ noʼox la stʼuj ta yamigotak li buchʼutik skʼanojik Jeovae. Vaʼun jaʼ koltavanik sventa jaʼ spas kʼusitik lek li Josiase. ¿Buchʼu li yamigotake?
June jaʼ li Sofoniase, jaʼ jun j-alkʼop ta Juda. Xi skʼan xalbe li krixchanoetik tee: ‹Chopol me kʼusi chanuptanik mi jaʼ chavichʼik-o ta mukʼ li santoetike›. La xchʼun li Josiase. Jaʼ yuʼun muʼyuk laj yichʼ ta mukʼ li santoetike, jaʼ laj yichʼ ta mukʼ li Jeovae.
Oy yan yamigo li Josiase, jaʼ sbi Jeremias. Jutuk mu jmojuk sjabilalik xchiʼuk nopol xil sba snaik kʼalal chʼiik tale. Toj lek xil sbaik, jaʼ yuʼun kʼalal cham li Josiase la stsʼiba jun kʼejoj li Jeremiase. Taje jaʼ chalbe skʼoplal ti toj echʼ noʼox ta snaʼe. La skolta sbaik ta spasel li kʼusi leke xchiʼuk ta xchʼunbel smantal li Jeovae.
La skolta sbaik ta spasel kʼusi lek li Josias xchiʼuk Jeremiase
¿Kʼusi chakʼ achan li kʼusi la spas Josiase?... Ta sbikʼtal onoʼox chchʼunbe yaʼi smantal li Jeovae. Snaʼoj ti jaʼ skʼan xamigoin li buchʼutik skʼanojik Jeovae. ¿Mi mu jechuk ti chakʼan chatun ta stojolal Jeova eke? Jaʼ yuʼun, jaʼ me skʼan xatʼuj ta avamigotak li buchʼutik skʼanojik Jeova eke.