VIVLIOTEKA TA INTERNET yuʼun Watchtower
VIVLIOTEKA TA INTERNET
yuʼun Watchtower
tsotsil
ʼ
  • ʼ
  • VIVLIA
  • VUNETIK
  • TSOBAJELETIK
  • w23 septiembre paj. 8-13
  • Kerem tseb, ¿kʼu yelan chakʼan li akuxlejale

Muʼyuk svideoal.

Paso perton, mu stij li videoe.

  • Kerem tseb, ¿kʼu yelan chakʼan li akuxlejale
  • Li Jkʼel-osil ta toyole Yakal chalbe skʼoplal li Ajvalilal yuʼun Jeovae (sventa chichʼ chanel) 2023
  • Subtituloetik
  • Yan vunetik ti xkoʼolaje
  • TʼUJO LEK AVAMIGOTAK
  • BIKʼITUK XKAKʼ JBATIK
  • JECHUK-O ME XANOPAJ TA STOJOLAL JEOVA
  • XUʼ ME XAMUYUBAJ
  • Lek yamigotak li Josiase
    Chanubtaso avalab anichʼnabik
  • ¿Kʼu yuʼun skʼan jxiʼtatik li Jeovae?
    Li Jkʼel-osil ta toyole Yakal chalbe skʼoplal li Ajvalilal yuʼun Jeovae (sventa chichʼ chanel) 2023
  • Li Josiase jaʼ la snop la spas li kʼusi leke
    Li Jkʼel osil ta toyole Yakal chalbe skʼoplal li Ajvalilal yuʼun Jeovae 2009
  • La xchʼunbe Smantal Jeova li Josiase
    Xchanobiltak ti xuʼ jtatik ta Vivliae
Kʼelo kʼusitik yan
Li Jkʼel-osil ta toyole Yakal chalbe skʼoplal li Ajvalilal yuʼun Jeovae (sventa chichʼ chanel) 2023
w23 septiembre paj. 8-13

XCHANOBIL 38

Kerem tseb, ¿kʼu yelan chakʼan li akuxlejale?

«Jaʼ chchabiot ti oy kʼusi lek xanabe skʼoplale» (PROV. 2:11).

KʼEJOJ 135 Xi chalbot Jeova: ‹Pʼijan me jnichʼon›

LI KʼUSI TA JCHANTIKEa

1. ¿Kʼusi la snuptan Jeoas, Josias xchiʼuk li Usiase?

¿KʼU VAN yelan laj avaʼi aba ti voʼotuk laj aventain li steklumal Dios kʼalal kʼoxot toʼox o chex kerem tsebot toʼoxe? Ta skoj ti tsots avabtel avichʼoje, ¿kʼusi van chapas? Li Vivliae chalbe skʼoplal junantik ajvaliletik ta Juda ti keremik toʼox tajek kʼalal ochik ta ajvalile. Jech kʼuchaʼal li Jeoas ti vukub toʼox sjabilale. Li Josiase vaxakib toʼox sjabilal xchiʼuk li Usiase 16 sjabilal. Tsots tajek li kʼusi lik sbainike. Akʼo mi mu kʼunuk laj yaʼiik, oy kʼusi koltaatik-o sventa spas yuʼunik xchiʼuk ti lekuk stunes li xkuxlejalike.

2. ¿Kʼu yuʼun skʼan jchanbetik sloʼilal li Jeoas, Usias xchiʼuk Josiase?

2 Akʼo mi maʼuk ajvalilutik mi jaʼuk meʼ ajvalilutik, pe oy kʼusi tsots skʼoplal chakʼ jchantik li oxvoʼ keremotike. Li kʼusi kʼot ta nopel yuʼunike oy kʼusi chakʼ jchantik. Mi la jchanbetik skʼoplalike, te chkiltik ti tsots skʼoplal ti xijtojobuk stʼujel li kamigotaktike, ti bikʼituk xkakʼ jbatike xchiʼuk ti jechuk-o xijnopaj ta stojolal Jeovae.

TʼUJO LEK AVAMIGOTAK

Jun ermana ti lek yij ta mantale yakal chalbe jun ermana ti kʼu yelan xvinaj li kʼuʼil ta jun tiendae. Li jlik vestidoe komkom xvinaj, li yane lek nat.

Mi te ta joltik kʼusi la spas Jeoase, ta jchikintatik li kʼusi chalbutik li kamigotaktik ti skʼanojik Jeovae. (Kʼelo parafo 3, 7).c

3. ¿Kʼusi la spas Jeoas koliyal li Jeoiadae?

3 Lekuk kʼusi xkʼot ta nopel avuʼun kʼuchaʼal li Jeoase. Kʼalal kʼox toʼox li Jeoase, jaʼo cham li stote. Vaʼun, jaʼ tsʼitesat yuʼun li mero bankilal pale Jeoiadae xchiʼuk jaʼ chanubtasat ta sventa li Jeovae. Ta skoj ti la xchʼun li kʼusi albat yuʼun Jeoiadae, pʼijub xchiʼuk la snop ti chtun ta stojolal Jeovae. Jech xtok, la skolta j-israeletik sventa jechuk spasik eke. Lokʼ ta yoʼonton xchaʼmeltsanel li stemplo Jeova xtoke (2 Kron. 24:​1, 2, 4, 13, 14).

4. ¿Kʼuxi tskoltautik kʼalal ta jchʼuntik li smantaltak Jeovae? (Proverbios 2:​1, 10-12).

4 Mi jaʼ la xchanubtasot atot ameʼ o yan ermano sventa xakʼan li Jeova xchiʼuk ti xachʼunbe li smantaltake, jaʼ me jun kʼupil sba matanal laj yakʼbot (kʼelo Proverbios 2:​1, 10-12). Li totil meʼiletike jeltos kʼu yelan chchanubtas li yalab xnichʼnabike. Jkʼeltik kʼuxi koltaat yuʼun stot Katia sventa lekuk kʼusi xkʼot ta nopel yuʼune. Kʼalal jaʼo chbat akʼatuk ta eskuela jujun kʼakʼale, jaʼ tsloʼiltaik li kʼusi chal li teksto sventa jujun kʼakʼale. Xi chal li Katiae: «Li kʼusi chkalbekutik skʼoplale jaʼ la skoltaun sventa stsal kuʼun li kʼusitik ta jnuptan jujun kʼakʼale». Jech xtok, li atot ameʼe xuʼ van oy kʼusitik chalbot ti te lokʼem ta Vivliae ti vokol chavaʼi spasele, yuʼun chanop ti oy kʼusi mu xakʼik apase. ¿Kʼusi xuʼ skoltaot sventa xachʼune? Jun ermana ti Anastasia sbie chal ti kʼalal ch-akʼbat mantaletik yuʼun stot smeʼe, ch-albat srasonaltak xtok ti kʼu yuʼun skʼan jech spase. Xi chale: «Taje jaʼ la skoltaun sventa xkaʼibe smelolal ti jaʼ sventa jlekilal li mantaletik chakʼbeikune. Yuʼun jech chakʼbeikun ta ilel ti skʼanojikune xchiʼuk ti tskʼan chchabiikune».

5. ¿Kʼu yelan xuʼ xaʼi sba avuʼun atot ameʼ xchiʼuk Jeova ta skoj li kʼusi chkʼot ta nopel avuʼune? (Proverbios 22:6; 23:​15, 24, 25).

5 Li atot ameʼe ta Vivlia tslokʼesik li mantaletik chalbote, mi la achʼune, xmuyubajik me avuʼun. Pe mas to me xmuyubaj avuʼun li Jeovae xchiʼuk xuʼ xavamigoin-o sbatel osil (kʼelo Proverbios 22:6; 23:​15, 24, 25). Taje jaʼ srasonaltak sventa xachanbe stalelal li Jeoas kʼalal kerem toʼoxe.

6. ¿Buchʼutik la xchikintabe li Jeoase, xchiʼuk kʼusi kʼot ta stojolal? (2 Kronikas 24:​17, 18).

6 Oyuk kʼusi xakʼ achan li kʼusi muʼyuk lek kʼot ta nopel yuʼun Jeoase. Kʼalal chamem xa ox li Jeoiadae lik saʼ xchopol chiʼiltak li Jeoase (kʼelo 2 Kronikas 24:​17, 18). Jaʼ la stsʼet chikinta kʼusi chalik li bankilaletik ta Juda ti muʼyuk skʼanojik Jeovae. Muʼyuk lek ti jaʼ la xchʼunanbee (Prov. 1:10). Chopol kʼusi la spas ta skoj ti jaʼ la xchiʼin li chopol amigoiletike. Kʼalal tukʼibtasat yuʼun Sakarias ti jaʼ sprimoe, li Jeoase laj yal mantal ti akʼo xichʼ milele (2 Kron. 24:​20, 21; Mat. 23:35). ¡Toj chopol xchiʼuk toj bol li kʼusi la spase! Lek toʼox tun ta stojolal Jeova, pe laje la svalopatin komel li mantale xchiʼuk milvan. Ta tsʼakale, milat yuʼun li yajtuneltake (2 Kron. 24:​22-25). Ti lajuk xchʼunbe smantal Jeova xchiʼuk li yajtuneltak Diose, lek bat xkuxlejal ti jechuke. ¿Kʼusi chakʼ jchantik li kʼusi la spase?

7. ¿Buchʼutik skʼan xavamigoin? (Kʼelo xtok li lokʼole).

7 Oy kʼusi lek chakʼ jchantik li kʼusi muʼyuk lek kʼot ta nopel yuʼun li Jeoase. Skʼan jaʼ xkamigointik li buchʼutik skʼanojik Jeova xchiʼuk ti xmuyubaj yuʼunike. Jech xtok, mu ventauk li sjabilalike. Teuk ta ajol ti mas to kerem li Jeoas kʼuchaʼal li Jeoiadae. Xiuk xajakʼbe aba ta sventa li avamigotake: «¿Mi tskoltaikun sventa masuk to tsots xchʼunel koʼonton ta stojolal Jeova? ¿Mi tstijbeikun koʼonton sventa jchʼunbe li smantaltake? ¿Mi tskʼupinik yalbel skʼoplal Jeova xchiʼuk li kʼusi chchanik ta Vivliae? ¿Mi tstsakbeik ta venta li smantaltake? ¿Mi tstukʼibtasikun kʼalal oy kʼusi mu lekuk chbat ta pasel kuʼune o mi jaʼ noʼox chalbeikun li kʼusi lek chkaʼie?» (Prov. 27:​5, 6, 17). Mi muʼyuk skʼanojik Jeova li avamigotake, mu xachiʼinan. Pe mi skʼanojik Jeovae, mu me xaviktaan, yuʼun xuʼ skoltaoxuk (Prov. 13:20).

8. ¿Kʼusi skʼan xatsak ta venta mi la atunes li redes socialese?

8 Li redes socialese xuʼ me xtun sventa jkʼopon kutsʼ kalaltik xchiʼuk kamigotaktik. Pe ep buchʼutik tsmuyesik slokʼol xchiʼuk svideoal li kʼusitik tsmanike o li kʼusitik spasojik sventa labal sba xilik li yantike. Mi chatunes li redes socialese, xiuk xajakʼbe abae: «¿Mi ta jkʼan labal sba chil yantik li kʼusi ta jmuyese? Kʼalal oy kʼusi ta jmuyes ta redes socialese, ¿mi jaʼ sventa jpatbe yoʼonton yantik o mi jaʼ sventa xkichʼ kʼupil kʼoptael? Li kʼusitik tsmuyesik ta redes socialese, ¿mi chkakʼ ti sokes li kʼusi ta jnope, ti kʼu yelan chikʼopoje xchiʼuk li jtalelale?». Li ermano Nathan Knorr ti tun ta Jtsop Jbeiltasvaneje xi tojobtasvane: «Mu me jaʼuk tsots skʼoplal xavilik ti xmuyubaj avuʼunik li krixchanoetike, yuʼun jaʼ mas tsots skʼoplal ti xmuyubaj avuʼunik li Jeovae. Vaʼun, xmuyubaj me avuʼun ek li buchʼutik skʼanojik Jeovae».

BIKʼITUK XKAKʼ JBATIK

9. ¿Kʼusi la spas Usias ta skoj ti koltaat yuʼun Jeovae? (2 Kronikas 26:​1-5).

9 Lekuk kʼusi xkʼot ta nopel avuʼun kʼuchaʼal li Usiase. Kʼalal kerem toʼox li ajvalil Usiase, bikʼit toʼox laj yakʼ sba xchiʼuk la xiʼta li melel Diose. Ti kʼu sjalil kuxie jaʼ 68 jabil xchiʼuk akʼbat bendision yuʼun Jeova ti kʼu sjalil tun ta stojolale (kʼelo 2 Kronikas 26:​1-5). Li Usiase la stsal epal jteklumetik ti jaʼ yajkontratake xchiʼuk la xchabi li Jerusalene (2 Kron. 26:​6-15). Muyubaj van tajek li kʼusitik pas yuʼun ta skoj ti koltaat yuʼun li Jeovae (Ekl. 3:​12, 13).

10. ¿Kʼusi kʼot ta stojolal li Usiase?

10 Oyuk kʼusi xakʼ achan li kʼusi muʼyuk lek kʼot ta nopel yuʼun li Usiase. Li ajvalil Usiase nopem xaʼi tspasvan ta mantal. Jaʼ yuʼun, laj van snop ti xuʼ spas li kʼusi tskʼan yoʼontone. Jun veltae och ta stemplo Jeova, vaʼun la xchikʼ pom li ta skajleb matanale. Taje mu xuʼ spasik li ajvaliletike (2 Kron. 26:​16-18). Tukʼibtasat yuʼun li mero bankilal pale Asariase, pe ilin li Usiase. Ta skoj taje, muʼyuk xa tukʼ laj yakʼ sba ta stojolal Jeova xchiʼuk akʼbat kastigo, yuʼun tsakat ta lepra (2 Kron. 26:​19-21). Ti bikʼituk laj yakʼ sbae, lek bat li xkuxlejal jechuke.

Lokʼoletik: 1. Jun ermana tspas orasion kʼalal skʼan toʼox xal sloʼil ta asamblea. 2. Jun ermano tsjakʼbe sloʼil chaʼvoʼ ermanaetik. 3. Kʼalal tsuts li asambleae, li ermanae bat kʼupil kʼoptaatuk. Pe jaʼ laj yakʼ ta ichʼel ta mukʼ li Jeovae.

Mu me lekuk ti jtoy jbatik ta skoj li kʼusi pasem xa tal kuʼuntike, jaʼ mas lek ti jtojbetik ta vokol li Jeovae. (Kʼelo parafo 11).d

11. ¿Kʼu yelan stalelal li buchʼu bikʼit chakʼ sbae? (Kʼelo xtok li lokʼoletike).

11 Kʼalal ajvalil xa ox li Usiase, chʼay ta sjol ti jaʼ koliyal Jeova ti lek kʼusi pasem tal yuʼune. ¿Kʼusi chakʼ jchantik? Jaʼ ti skʼan teuk ta joltik ti jaʼ koliyal Jeova li kʼusi lekik ta jkʼupintike xchiʼuk li kʼusitik ta jkʼupintik ta skoj ti chijtun ta stojolale. Mu me lekuk ti jtoy-o jbatik ta sventa li kʼusi pasem xa tal kuʼuntike, jaʼ mas lek jtojbetik ta vokol li Jeovae (1 Kor. 4:7).b Skʼan bikʼit xkakʼ jbatik xchiʼuk xkakʼtik venta ti jpas mulilutike xchiʼuk ta jkʼantik ti oyuk buchʼu stukʼibtasutike. Xi chal jun ermano ti mas xa ta 60 sjabilale: «Muʼyuk chi-ilin-o o muʼyuk chichibaj-o kʼalal oy buchʼu tstukʼibtasun ta skoj ti muʼyuk lek kʼusi bat ta pasel kuʼune, yuʼun chkakʼ kipal sventa xlekub jtalelal». Mi bikʼit chkakʼ jbatike xchiʼuk mi jxiʼtaojtik li Jeovae, lek chbat jkuxlejaltik (Prov. 22:4).

JECHUK-O ME XANOPAJ TA STOJOLAL JEOVA

12. Kʼalal kerem toʼox li Josiase, ¿kʼusi la spas sventa xnopaj ta stojolal li Jeovae? (2 Kronikas 34:​1-3).

12 Lekuk kʼusi xkʼot ta nopel avuʼun kʼuchaʼal li Josiase. Kʼalal chex kerem toʼox li Josiase, lik nopajuk ta stojolal li Jeovae. Yuʼun oy ta yoʼonton chojtikin mas li Sdiose xchiʼuk ti spasbe li kʼusi oy ta yoʼontone. Pe mu kʼunuk laj yaʼi ch-ajvalilaj li Josiase, yuʼun jutuk mu skotoluk li krixchanoetik vaʼ kʼakʼale chichʼik ta mukʼ jecheʼ diosetik. Jaʼ yuʼun, skʼan tsotsuk yoʼonton sventa spakbe skʼoplal li melel yichʼel ta mukʼ Diose. ¡Toj lek li kʼusi la spase! Yuʼun la slajesbe skʼoplal li yichʼel ta mukʼ jecheʼ diosetik ta sjunul li jteklume akʼo mi mu toʼox sta 20 sjabilal (kʼelo 2 Kronikas 34:​1-3).

13. ¿Kʼusi sbalil chatabe mi laj avakʼ akuxlejal ta stojolal Jeovae?

13 ¿Kʼuxi xuʼ xachanbe Josias akʼo mi naka to chata tal avaʼlej? Jaʼ ti xanopaj ta stojolal Jeovae xchiʼuk ti masuk to xachanbe skʼoplal li skʼupil talelaltake. Taje tstij avoʼonton sventa xavakʼbe akuxlejal. ¿Kʼu yelan akuxlejal mi jech la apase? Xi chal Luke ti laj yichʼ voʼ kʼalal 14 toʼox sjabilale: «Jaʼ xa chkakʼ ta koʼonton ti xitun mas ta stojolal Jeovae xchiʼuk ti xmuyubajuk kuʼune» (Mar. 12:30). Ta me xata epal bendision mi jech chapas eke.

14. ¿Kʼuxi chchanbeik stalelal Josias junantik kerem tsebetik?

14 ¿Kʼusitik xuʼ snuptan li kerem tsebetik kʼalal chtunik ta stojolal Jeovae? Li Joan ti laj yichʼ voʼ kʼalal 12 toʼox sjabilale chal ti tsujat yuʼun xchiʼiltak ta chanun ta sbutsʼel li cigarro electricoe. ¿Kʼusi spasoj talel sventa stsal yuʼun li sujele? Jaʼ tsnopbe skʼoplal ti xuʼ x-ipaj-oe xchiʼuk ti mu xa lekuk xil-o sba xchiʼuk Jeovae. Li Rachel ti 14 sjabilal kʼalal laj yichʼ voʼe, xi chalbutik li kʼusi tspas sventa stsal yuʼun li kʼusi tsnuptan ta s-eskuelae: «Kʼalal oy kʼusi ta jkʼelbekutik skʼoplale, chkakʼ persa ta jnopbe skʼoplal li kʼusitik sventa mantale. Mi jaʼo ta jchanbekutik skʼoplal sloʼil xkuxlejal krixchanoetik li ta chanune, chtal ta jol junuk loʼil ta Vivlia o junuk albil kʼop. Kʼalal chiloʼilajkutike, chtal ta jol junuk teksto ta Vivlia ti xuʼ xkalbe jchiʼiltake». Yikʼaluk van mu xkoʼolaj li kʼusi yakal chanuptan kʼuchaʼal li ajvalil Josiase, pe xuʼ me xavakʼ ta ilel ti pʼijot xchiʼuk ti tukʼ chavakʼ aba ta stojolal Jeova jech kʼuchaʼal la spase. Mi tsal avuʼun li kʼusitik yakal chanuptane, mas me chapalot sventa stsal avuʼun li kʼusi chanuptan ta tsʼakale.

15. ¿Kʼusi koltaat-o Josias sventa tukʼuk xtun ta stojolal li Jeovae? (2 Kronikas 34:​14, 18-21).

15 Kʼalal 26 toʼox sjabilal li ajvalil Josiase, lik xchaʼmeltsan li temploe. Vaʼun, te la stabeik «li slivroal Smantal Jeova ti akʼbat li Moisese». Kʼalal laj yaʼi kʼusi chal Smantal Jeova li ajvalile, ta anil lik spas (kʼelo 2 Kronikas 34:​14, 18-21). ¿Mi oy ta avoʼonton chakʼelilan jujun kʼakʼal li Vivliae? Mi jech xa yakal chapase, ¿mi chakʼupin? ¿Kʼusi yakal chapas sventa mu xchʼay ta ajol li tekstoetik ti chtun avuʼune? Li Luke ti laj kalbetik skʼoplal ta parafo 13 nopem xaʼi tstsak ta vun li kʼusi lek chaʼie. ¿Mi ta van skoltaot xanaʼ ti jech xapas eke? Kʼalal mas chavaʼibe smelolal li kʼusi chal Vivliae, mas to chakʼan. Vaʼun, mas to ch-ayan ta avoʼonton chatun ta stojolal Jeova. Li Josiase tijbat yoʼonton yuʼun Skʼop Dios ta spasel li kʼusi leke, taje xuʼ me jech xkʼot ta atojolal ek.

16. ¿Kʼusi muʼyuk lek la spas li Josiase, xchiʼuk kʼusi chakʼ jchantik?

16 Oyuk kʼusi xakʼ achan li kʼusi muʼyuk lek kʼot ta nopel yuʼun li Josiase. Kʼalal 39 xa ox sjabilal li Josiase, oy kʼusi muʼyuk lek la spas ti laj yichʼ-o milele. Muʼyuk la skʼanbe Jeova ti xbeiltasate, yuʼun la spat yoʼonton ta stojolal stuk (2 Kron. 35:​20-25). ¿Kʼusi chakʼ jchantik? Jaʼ ti mu ventauk li jabilaltike o ti kʼu xa sjalil kocheltik ta mantale, skʼan jech-o xijnopaj ta stojolal Jeova. Sventa spas kuʼuntike, skʼan jkʼanbetik ti sbeiltasutike, ti jchanbetik li Skʼope xchiʼuk ti jchikintatik li tojobtaseletik chakʼik li ermanoetik ti yijik ta mantale. Mi jech ta jpastike, xuʼ me mu masuk kʼusi chopol xbat ta pasel kuʼuntik xchiʼuk xuʼ xijmuyubaj noʼox (Sant. 1:25).

XUʼ ME XAMUYUBAJ

17. ¿Kʼusi chakʼ jchantik li oxvoʼ ajvaliletik ta Judae?

17 Li kerem tsebetike ep kʼusitik xuʼ spasik. Li kʼusitik la spasik li Jeoas, Usias xchiʼuk Josiase chakʼ ta ilel ti xuʼ lek kʼusi xkʼot ta nopel yuʼun li kʼoxetike xchiʼuk li chex kerem tsebetike. Vaʼun, xuʼ xmuyubaj yuʼunik li Jeovae. Melel onoʼox ti oy kʼusi muʼyuk lek bat ta pasel yuʼunike, jaʼ yuʼun laj yil-o svokolik. Pe mi jaʼ la achanbe li kʼusi lek la spasike xchiʼuk mi chavakʼ avipal sventa jaʼuk xapas li kʼusitik leke, lek me chbat akuxlejal.

Li Davide ta sjimulan jpʼej ton ta sjimichʼ sventa sjipbe batel li Goliate.

Kʼalal kerem toʼox li Davide nopaj ta stojolal Jeova, lek ilat. Vaʼun, lek bat xkuxlejal. (Kʼelo parafo 18).

18. ¿Kʼuxi chakʼ kiltik ti xuʼ lek xbat jkuxlejaltik li loʼiletik ta Vivliae? (Kʼelo xtok li lokʼoletike).

18 Li Vivliae chalbe skʼoplal yan kerem tsebetik ti nopajik ta stojolal Jeovae. Vaʼun, lek ilatik xchiʼuk lek bat xkuxlejalik jech kʼuchaʼal li Davide. Kʼalal kerem toʼoxe, laj yamigoin li Jeovae. Ta tsʼakale, kʼot ta lekil ajvalil. Melel onoʼox ti oy kʼusi muʼyuk lek la spase, pe li Diose tukʼil yajtunel laj yil (1 Rey. 3:6; 9:​4, 5; 14:8). Mi la achanbe skʼoplal xkuxlejal li Davide, ta me skoltaot sventa tukʼ xatun ta stojolal Jeova. Yan xtoke jaʼ ti xuʼ xachanbe skʼoplal li Markos o Timoteoe. Yuʼun ta skeremalik noʼox lik tunikuk ta stojolal Jeova xchiʼuk tukʼ laj yakʼ sbaik. Jaʼ yuʼun, muyubaj yuʼunik li Jeovae xchiʼuk lek bat xkuxlejalik.   

19. ¿Kʼu yelan chakʼan akuxlejal?

19 Mi chakʼan lek chbat akuxlejal ta tsʼakale, voʼot me chanop atuk kʼusi skʼan xapas li avie. Mi chapat avoʼonton ta stojolal Jeova xchiʼuk chatsak ta venta ta skotol orae, ta me skoltaot sventa lek kʼusi xkʼot ta nopel avuʼun (Prov. 20:24). Xuʼ me xakʼupin akuxlejal xchiʼuk xamuyubaj. Teuk ta ajol ti ep sbalil chil Jeova li kʼusi chapas ta stojolale. Chatabe sbalil kʼalal chatun ta stojolal li Atot ta vinajele, yuʼun skʼanojutik tajek. ¡Muʼyuk yan kʼusi chakʼ jmuyubajeltik!

¿KʼUSI CHAKʼ JCHANTIK LI AJVALILETIK LIʼE?

  • Jeoas

  • Usias

  • Josias

KʼEJOJ 144 ¡Mu jchʼay ta jsatik jmotontik!

a Kerem tseb, li Jeovae snaʼoj ti mu kʼunuk chavaʼi spasel li kʼusi leke xchiʼuk ti jaʼuk-o avamigoe. ¿Kʼusi xuʼ skoltaot sventa xmuyubaj avuʼun Jeova kʼalal lek kʼusi chkʼot ta nopel avuʼune? Li ta xchanobil liʼe, chkalbetik skʼoplal chaʼvoʼ kʼox keremotik xchiʼuk jun chex kerem ti kʼotik ta ajvalil ta Judae. Kʼelo kʼusi xuʼ xachan ta sventa li kʼusi kʼot ta nopel yuʼunike.

b Kʼelo ta jw.org li rekuadro: «Pʼijan me mu me naka uk xakuy ti bikʼit avakʼoj abae» ti te talem li ta mantal: «¿Mi ta melel tsots skʼoplal ti lekuk ojtikinbilutik li ta redes sosialese?».

c LI KʼUSI XVINAJ TA LOKʼOLE: Jun ermana yakal tstojobtas yan ermana ti mas to tsebe.

d LI KʼUSI XVINAJ TA LOKʼOLETIKE: Jun ermana ti chjelav ta asambleae chakʼ ta ilel ti spatoj yoʼonton ta stojolal Jeova xchiʼuk jaʼ chakʼ ta ichʼel ta mukʼ.

    Vunetik ta tsotsil (2001-2025)
    Lokʼan
    Ochan
    • tsotsil
    • Tako batel
    • Ti kʼu yelan chak'ane
    • Copyright © 2025 Watch Tower Bible and Tract Society of Pennsylvania
    • Ti kʼutik yelan xuʼ xichʼ tunesele
    • Política de privacidad
    • Configuración de privacidad
    • JW.ORG
    • Ochan
    Tako batel