La xchʼunbe Smantal Jeova li Josiase

Vaxakib jabil toʼox yichʼoj Josias kʼalal och ta ajvalil ta Judae. Li vaʼ kʼakʼale, chichʼik toʼox ta mukʼ jecheʼ diosetik xchiʼuk tspasik toʼox majia. Pe kʼalal 16 xa ox sjabilal li Josiase, mas to laj yakʼ ta yoʼonton li yichʼel ta mukʼ Jeovae. Jaʼ yuʼun, kʼalal la sta 20 sjabilale, la slilin li jecheʼ diosetike xchiʼuk li skajleb matanal ti oy ta sjunul lume. Kʼalal 26 xa ox sjabilale, la xchapan skotol li kʼusitik chtun sventa xchaʼmeltsanbe li stemplo Jeovae.

Li mero bankilal pale Ilkiase te la sta ta yut templo li balbalvun ti bu chal li Smantaltak Diose. Xuʼ van jaʼ la stsʼiba li Moisese. Li Safan ti jaʼ li jtsʼibajom yuʼun li ajvalil Josiase laj yichʼ batel li balbalvune xchiʼuk tsots laj yaptabe li Josiase. Kʼalal laj yaʼi Josias li kʼusi chal li balbalvune, laj yakʼ venta ti oy xa ta epal jabil mu jechuk chichʼik ta mukʼ Jeova li judaetike. Jaʼ yuʼun, li Josiase xi laj yalbe li Ilkiase: «Li Jeovae ilinem tajek ta jtojolaltik. Kʼopono sventa jnaʼtik li kʼusi xuʼ jpastike». Vaʼun, li Jeovae xi laj yalbe tal ta stojolal li meʼ j-alkʼop Uldae: «Li jteklum Judae laj xa skomtsanikun. Pe jaʼ to ta xkakʼbe stoj smulik kʼalal mi cham li ajvalil Josiase, yuʼun li stuke bikʼit yakʼoj sba».

Kʼalal laj yaʼi ajvalil Josias li kʼusi laj yal Jeovae, bat li ta temploe xchiʼuk la stsob skotol li judaetike. Kʼalal te xa ox oy skotolike, tsots lik yapta Smantal Jeova li Josiase. Vaʼun, li Josias xchiʼuk skotol li judaetike laj yalik ta jamal ti chchʼunbeik li smantaltak Jeovae.

Oy xa jayibuk jabil ti muʼyuk spasojik-o kʼin Koltael li ta jteklum Judae. Kʼalal la xchan Smantaltak Jeova li Josiase, te laj yakʼ venta ti persa skʼan spasik jujun jabil li kʼin Koltaele. Jaʼ yuʼun, xi laj yalbe li jteklume: «Ta jpastik li Kʼin Koltael sventa Jeovae». Vaʼun, ta tsʼakale laj yal mantal ti akʼo xchapanik epal matanaletik sventa Jeova xchiʼuk laj yal ti oyuk buchʼutik xkʼejinik li ta temploe. Vaʼun, la spasik li Kʼin Koltaele, ta tsʼakale la spasik li Skʼinal Pan ti Muʼyuk yichʼoj Slevaduraile, jech la spasik vukub kʼakʼal. Taje voʼne xa tajek ti jech koʼoltik la spasike, yuʼun jaʼ toʼox jech la spasik kʼalal kuxul toʼox li Samuele. Ta melel, skʼanoj Jeova li Josiase, jaʼ yuʼun la xchʼunbe li Smantaltake. ¿Mi chakʼan chavojtikin lek li Jeova eke?