¿Kʼu yelan chilun li Jeovae?
1. ¿Kʼuxi ti xkoʼolaj kʼuchaʼal nen li Vivliae?
1 ¿Kʼu sjalikil chakʼel aba ta nen? Jutuk mu jkotoltikuk ta jkʼel jbatik skotol kʼakʼal, yuʼun tskoltautik yoʼ xkakʼtik venta bu skʼan jmeltsan jbatik. Li Vivlia eke xkoʼolaj kʼuchaʼal nen. Kʼalal ta jkʼeltike tskoltautik yoʼ xkakʼtik venta kʼu yelan li koʼontontike, yuʼun jaʼ tskʼel li Jeovae (1 Sam. 16:7; Sant. 1:22-24). Li Skʼop Diose «snaʼ cʼusi oy ta coʼntontic, xchiʼuc cʼusitic ta jnoptic» (Heb. 4:12). Kʼalal ta jkʼeltik xchiʼuk ta jnopbetik skʼoplal skotol kʼakʼal li Vivliae tskoltautik yoʼ xkakʼtik venta bu skʼan xijtojob batel mas li ta cholmantale. ¿Kʼu yuʼun ti jech chkaltike? (Sal. 1:1-3.)
2. ¿Kʼuxi xuʼ skoltautik li Vivlia yoʼ xkakʼtik venta kʼu kelantike?
2 Tuneso kʼuchaʼal nen li Vivliae. Li loʼiletik ta Vivlia ta sventa li tukʼil yajtuneltak Jeovae tskoltautik ta snaʼel kʼusi jtosukal talelalil lek chil li Jeovae. Jun skʼelobile jaʼ ta sventa li Davide, li stuke ta sjunul yoʼonton la spakbe skʼoplal li sbi Diose (1 Sam. 17:45, 46). Li j-alkʼop Isaiase ta sjunul yoʼonton laj yal ti chbat xchol mantal ti bu xibal sbae (Is. 6:8, 9). Ta skoj ti skʼanoj tajek Stot ta vinajel li Jesuse jaʼ koltaat-o sventa mu jaʼuk jun alal ikatsil laj yaʼi li cholmantale, yuʼun jaʼ jun abtelal ti chakʼ muyubajel xchiʼuk jun oʼontonal laj yaʼie (Juan 4:34). Li yajtsʼaklomtak Cristo ta baʼyel sigloe ta sjunul yoʼontonik la xcholik mantal, la spat yoʼontonik ta stojolal Jeova xchiʼuk muʼyuk chibaj yoʼontonik (Hech. 5:41, 42; 2 Cor. 4:1; 2 Tim. 4:17). Kʼalal ta jnopbetik skʼoplal li skʼelobiltak taje tskoltautik yoʼ xkakʼtik venta kʼu kelantik xchiʼuk ti jlekubtastik ti kʼu yelan ta jpastik li chʼul abtelale.
3. ¿Kʼu yuʼun skʼan jtukʼibtas noʼox jbatik?
3 Tukʼibtaso aba. Melel onoʼox ti mu kʼusi xtun-o kʼalal ta jkʼel jbatik ta nen mi muʼyuk la jtukʼibtastik li kʼusi chopol laj kiltike. Xuʼ jkʼanbetik koltael Jeova sventa xkakʼtik venta kʼu kelantik xchiʼuk ti jtukʼibtas jbatik ti bu skʼan chkiltike (Sal. 139:23, 24; Luc. 11:13). Ta skoj ti mu xa jaluk batel ti kʼakʼale xchiʼuk ti oy ta vokol xkuxlejal li krixchanoetike, skʼan jtukʼibtas noʼox jbatik (1 Cor. 7:29, Ch; 1 Tim. 4:16).
4. ¿Kʼusi chkʼot ta stojolal li jun krixchano ti tskʼel lek sba ta Skʼop Dios xchiʼuk ti tstukʼibtas li stalelal mi oy bu chopol laj yile?
4 Jaʼ toj tsots skʼoplal ti kʼu yelan xvinaj li koʼontontike maʼuk li jpat jxokontike, yuʼun li Jeovae jaʼ tskʼel li koʼontontike (1 Ped. 3:3, 4). ¿Kʼusi chkʼot ta stojolal li jun krixchano ti tskʼel lek sba ta Skʼop Dios xchiʼuk ti tstukʼibtas li stalelal mi oy bu chopol laj yile? Jaʼ ti «mu xchʼay ta yoʼnton [li] cʼusi chaʼye, ti jaʼ te oy o ta yoʼnton li lequil mantal ti jaʼ chacʼ colcutique, [...] xcuxet noʼox yoʼnton yuʼun li cʼusi ta spase» (Sant. 1:25). Ta melel, chijkʼotutik ta lekil jcholmantal xchiʼuk xijmuyubaj noʼox, yuʼun «ta xcacʼtic iluc yutsilal ti Cajvaltique jech cʼu chaʼal ta xacʼ xojobal ti nene» (2 Cor. 3:18, Ch).