Oy xa ta sien jabil chichʼ albel skʼoplal li Ajvalilal yuʼun Diose
1. ¿Kʼusi laj yichʼik albel slumal Jeova ti jutuk xa skʼan xlokʼ sien jabile?
1 «¡Kʼelavilik, ch-ajvalilaj xa li Ajvalile! Voʼoxuk yaj-abteloxuk sventa chavalbeik batel skʼoplal. Jaʼ yuʼun, albeik, albeik, albeik skʼoplal li Ajvalil xchiʼuk li ajvalilal yuʼune.» Li kʼusi toj labal sba laj yal li ermano Rutherford taje jutuk xa skʼan xlokʼ sien jabil, li kʼusi laj yale la spatbe yoʼonton li slumal Jeova sventa xalbeik skʼoplal li Ajvalilal yuʼun Dios ta spʼejel Balumile. ¡Pasem kuʼuntik! Jech kʼuchaʼal la spasik li yajtsʼaklomtak Cristo ta baʼyel sigloe, kalojbetik xa «scotol cristianoetic liʼ ta [banamil]» li lekil aʼyej sventa Ajvalilale (Col. 1:23). ¿Kʼusitik jpasojtik li echʼ xa tal sien jabil yoʼ xichʼ albel skʼoplal li Ajvalilale? ¿Kʼuxi xuʼ xkalbetik-o batel skʼoplal ti poʼot xa xlokʼ sien jabil ti kʼuxi lik ajvalilajuke?
2. ¿Kʼuxi yalojbe tal skʼoplal Ajvalilal yuʼun Dios li jvuntike?
2 Jkʼeltik li kʼusi kʼot ta pasel ta voʼnee. Li jvuntike oy xa ta epal jabil yakal chalbe skʼoplal li Ajvalilale. Leʼ xa ta 1939, li revista ti mas ta jtunestike jaʼ La Atalaya. Anunciando el Reino de Jehová. Li revista taje achʼik noʼox chalbe skʼoplal li Ajvalilale xchiʼuk li kʼusi tspase. Jech xtok li ¡Despertad! sbie chal ti jaʼ noʼox ta stojolal Ajvalilal yuʼun Dios xuʼ te sta spatobil yoʼontonik li krixchanoetike. ¡Solel xijmuyubajutik ti jaʼ mas ep chichʼ jelubtasel ta yan kʼopetik xchiʼuk ti mas chichʼ pukel ta spʼejel Balumil li revistaetik taje! (Apoc. 14:6.)
3. ¿Kʼusitik jtunesojtik sventa chkalbetik skʼoplal li Ajvalilal yuʼun Diose?
3 Li slumal Jeova ep kʼusitik stunesoj sventa chalbe skʼoplal li Ajvalilal yuʼun Diose. Ta slikebale la stunes karoetik ti oy stokadiskoal xchiʼuk svosinaile, ch-echʼ mantal ta radio xchiʼuk gramófonos portátiles (stijobil son ti xkoʼolaj kʼuchaʼal tokadiskoe). Li kʼusitik laj yichʼ tunesel taje toj ep sbalil sventa laj yichʼik albel lekil aʼyej epal krixchanoetik kʼalal muʼyuk toʼox ep jcholmantaletike (Sal. 19:4). Li ta jabiletik ti jaʼtik toe kakʼojkutik epal mantaletik ta jw.org, vaʼun jaʼ jech ta xichʼik albel ta smiyonal noʼox krixchanoetik li aʼyej sventa Ajvalilale, ti te tsakal skʼoplal li buchʼutik te nakalik ta lumetik ti mu stakʼ cholel mantale.
4. ¿Kʼusitik yichʼoj chapanel ti tsots skʼoplale?
4 Li slumal Jeovae xtoke oy kʼusi tsots skʼoplal xchapanoj sventa xichʼ pukel li aʼyej sventa Ajvalilal yuʼun Diose. Jech kʼuchaʼal liʼe, li ta oʼloltik batel sjabilal 1990 maʼuk noʼox ta naetik laj yichʼ cholel mantal, yuʼun laj yichʼ akʼel persa ti xichʼ cholel mantal ta parkeetik, ta kotleb karoetik xchiʼuk ta pʼolmajebaletik. Li achʼtik toe oy kʼusi tsots skʼoplal laj yichʼ pasel ta mukʼta lumetik ta spʼejel Balumil yoʼ xichʼ cholel mantal ta buyuk noʼox xchiʼuk li grupoe. Jech xtok, epal tsobobbailetik chcholik mantal ta buyuk noʼox xchiʼuk grupo li ta yosilal bu onoʼox chcholik mantale xchiʼuk tstunesik mexa xchiʼuk yavil vunetik ti stakʼ jochel ti bu ch-echʼ ep krixchanoetike. Akʼo mi jech, pe li bu mas chkalbetik skʼoplal li Ajvalilal yuʼun Diose jaʼ li ta naetike (Hech. 20:20).
5. ¿Kʼusitik xuʼ jpastik kʼalal mi lik li kabteltik ta septiembree?
5 Jkʼeltik li kʼusi chkʼot ta pasel ta jelavele. Li kabteltik ti chlik ta septiembree ep buchʼutik chlik tunikuk ta prekursor regular. ¿Mi te van tsakal akʼoplal ek? Mi chʼabale, ¿mi anopoj chatun ta prekursor auksiliar bakʼintik? Mi latun ta prekursor o mi moʼoj, li Jeova chakʼbot bendision mi la avakʼ persa bu kʼalal xuʼ avuʼun ta yalbel skʼoplal li Ajvalilal yuʼune (Mal. 3:10).
6. Li ta oktuvre ta 2014, ¿kʼu yuʼun jaʼ jun u ti tsots skʼoplale?
6 Li ta oktuvre ta 2014 chlokʼ sien jabil ti kʼuxi lik ajvalilajuk li Ajvalilal yuʼun Diose. Jaʼ yuʼun li revista Li Jkʼel osil ta toyole, ti jaʼ sventa skotol krixchanoetike sta-o ti chalbe mas skʼoplal li Ajvalilal yuʼun Dios li ta u taje. Kakʼtik persa yoʼ xkakʼbetik epal krixchanoetik li revista sventa oktuvree. Kʼalal yakal chjelav batel li kʼakʼaletike, kalbetik li buchʼutik oy ta yoʼontonik chchikintaik li «Lequil Aʼyej ta sventa cʼu xʼelan chventainvan stuc li Diose» (Hech. 8:12).