Tojobkutik lek ta yakʼel chanubtasel ta Vivlia
1. ¿Kʼusi oy ta jbatik spasel li jcholmantalutik ti chijchanubtasvan ta Vivliae?
1 «Muʼyuc bochʼo xuʼ yuʼun ta xtal ta [stojolal Jeova] me muc icʼbiluc tal yuʼun[e].» (Juan 6:44.) Akʼo mi jech, jaʼ oy ta jbatik skoltael li krixchanoetik sventa xnopajik ta stojolal li Jtotik ta vinajele (Sant. 4:8). Pe sventa spas kuʼuntik taje, skʼan me jchapan jbatik. Sventa xkoltaat yoʼ xaʼibe smelolal li kʼusi chchan li jun jchanune xchiʼuk xchʼi ta mantale, skʼan mu jaʼuk noʼox ta jkʼelbetik li parafoetik xchiʼuk jakʼbetik li sjakʼobiltak yichʼoj tale.
2. ¿Kʼusi skʼan jpastik sventa xijtojob lek yakʼel chanubtasel ta Vivliae?
2 Sventa xijtojobutik lek ta yakʼel chanubtasel ta Vivliae, skʼan jkoltatik ta oxtos kʼusitik li kajchanuntike: 1) ti xaʼibe smelolal li kʼusi chchanubtasvan Vivliae, 2) ti xchʼam li kʼusi chale xchiʼuk 3) ti xakʼ ta xkuxlejale (Juan 3:16; 17:3; Sant. 2:26). Taje xuʼ me xjelav jayibuk u sventa jech xkʼot ta spasel yuʼun li jun krixchanoe. Pe, kʼalal jech tspas batel jujutose jtunel sventa xnopaj batel ta stojolal li Jeovae xchiʼuk jaʼ chkoltaat sventa xakʼ xkuxlejal ta stojolal.
3. ¿Kʼusitik skʼan jakʼbe jbatik mi ta jkʼan lek chijchanubtasvane xchiʼuk kʼu yuʼun?
3 ¿Kʼusi tsnop li jchanune? Sventa xanaʼ mi chaʼibe smelolal xchiʼuk mi chchʼam li kʼusi yakal chchan li avajchanune, mu me voʼotuk noʼox xakʼopoj, jaʼ lek tijbo yoʼonton sventa xal li kʼusi tsnope (Sant. 1:19). ¿Mi xaʼibe smelolal li kʼusi ta jchankutike? ¿Mi x-al xa yuʼun stuk li kʼusi yakal ta jkʼelkutike? ¿Kʼu yelan chaʼi sba ta sventa li kʼusitik xa xchanoje? ¿Mi stakʼ chʼunel chaʼi li kʼusitik chal Vivliae? (1 Tes. 2:13.) ¿Mi xaʼibe smelolal ti skʼan xvinaj ta xkuxlejal li kʼusitik yakal chchane? (Col. 3:10.) Sventa xanaʼ kʼusi tsnop li avajchanune, skʼan xanopbe lek smelolal li kʼusi chajakʼbee xchiʼuk oyuk noʼox smelolal, vaʼun chikintabo lek (Mat. 16:13-16).
4. ¿Kʼusi xuʼ jpastik mi vokol chaʼi xchʼamel o yakʼel ta xkuxlejal jtosuk chanubtasel ta Vivlia li jchanune?
4 Xuʼ me solel meʼinem ta yoʼontonik li kʼusitik nopem xaʼiik spasel xchiʼuk li kʼusitik tsnopik li jchanunetike, jaʼ yuʼun vokol chaʼiik yiktael (2 Cor. 10:5). ¿Kʼusi xuʼ jpastik mi vokol chaʼi xchʼamel o yakʼel ta xkuxlejal li kʼusitik xchanoje? Skʼan oyuk smalael kuʼuntik sventa xjelav kʼuk sjalik yoʼ xtijbat yoʼonton yuʼun li Skʼop Diose xchiʼuk li chʼul espiritue (1 Cor. 3:6, 7; Heb. 4:12). Mi vokol chaʼibe smelolal jtosuk chanubtasel ta Vivlia xchiʼuk tsots chaʼi ta yakʼel ta xkuxlejale, jaʼ van mas lek ti xijelavutik batel ta yan xchanobile. Mi oy-o slekil koʼontontik xchiʼuk smalael kuʼuntik kʼalal ta jchanubtastike, xuʼ jaʼ xtijbat yoʼontonik ta mas jelavel sventa sjel li xkuxlejalike.