Li kʼusitik toj jtunel sventa xijchanubtasvan-oe
1. ¿Kʼuxi ti xijkoʼolaj xchiʼuk li jun j-alvanile?
1 Li j-alvaniletike oy ep ta tos yabtejebik. Li jlom yabtejebike jaʼ noʼox tstunesik sventa junantik abtelal ti tsotsik skʼoplale, pe li junantike nopolik noʼox tstunesik. Li j-alvaniletik ti xtojobik xa lek ta abtele, chichʼik onoʼox batel li yabtejebik ti bu toj jtunelike, ti jaʼ li bu mas xtojobik stunesele. Li Skʼop Diose tstij koʼontontik sventa xkakʼbetik yipal li cholmantale xchiʼuk ti jaʼukutik «jun j-abtel ti muʼyuk kʼusi jsetʼuk [chijkʼexav-oe]» (2 Tim. 2:15). ¿Kʼusi ti mas tsots skʼoplal ta jtunestik ta cholmantale? Ta melel jaʼ li Vivliae, yuʼun jaʼ ta jtunestik sventa jpastik ta jchankʼop li krixchanoetike (Mat. 28:19, 20). Jaʼ yuʼun, skʼan me xkakʼ ta koʼontontik sventa xijtojob lek «stunesel li kʼop ti jaʼ sventa li kʼusi melele». Akʼo mi jech, jkotoltik skʼan jchantik lek stunesel li yan kʼusitik oy kuʼuntik yoʼ jchanubtastik yantik ta sventa li kʼusi melele (Prov. 22:29).
2. ¿Kʼusitik jaʼ li kabtejebtik ti chkakʼtik-o estudioe?
2 Abtejebaletik sventa xijchanubtasvan-o. Maʼuk noʼox kabtejebtik li Vivliae yuʼun oy to yan. Jech kʼuchaʼal li livro ¿Kʼusi chchanubtasvan ta melel li Vivliae? jaʼ li mas ta jtunestik sventa chkakʼtik-o estudioe. Kʼalal mi tsuts xchanel li livro taje, jaʼ ta jtunestik li livro «Tey me comanic o ta stojol ti scʼuxul yoʼnton ti Diose» sventa xchanik kʼuxi xuʼ xakʼ ta xkuxlejalik li beiltaseletik ta Vivliae. Ta skoj taje, skʼan xkojtikintik lek xchiʼuk xijtojob lek ta stunesel li chaʼlik vunetik taje. Pe oy to yan vunetik ti toj jtunelik xtoke, jech kʼuchaʼal li foyeto Lekil aʼyejetik yakʼoj Dios[e] toj jtunel sventa jlikestik-o estudio. Jech oxal skʼan me teuk kichʼojtik skotol ora. Mi oy la jtatik krixchanoetik ti mu xtojobik lek ta skʼelel vun li bu ta jcholtik mantale o chkʼopojik ta yan kʼop ti chʼabal to ta skʼopik li vunetike o jlik chaʼlik to oye, xuʼ jtunestik li foyeto Chikintao kʼusi chal Dios o Chikintao kʼusi chal Dios sventa chakuxi sbatel osil. Li yan abtejebal ti toj jtunele jaʼ li foyeto ¿Buchʼutik tspasik li kʼusi tskʼan yoʼonton Jeova avie?, ti xuʼ xkoltaatik li buchʼutik chkakʼbetik estudio sventa xojtikinik li s-organisasion Jeovae. Jech xtok li videoetike toj jtunel sventa jpastik-o ta jchankʼop li krixchanoetike, jaʼ yuʼun skʼan jchantik lek stunesel. Li jlom videoetike jaʼik liʼe: ¿Kʼu yuʼun skʼan jchantik li Vivliae?, ¿Kʼu yelan li jtsobajelkutike? xchiʼuk ¿Kʼu yelan chichʼ akʼel li chanubtasel ta Vivliae?
3. ¿Kʼusitik ta jchantik li ta Kabteltik sventa Dios ti chlokʼ ta mas tsʼakale?
3 Li ta yan Kabteltik sventa Dios chlokʼ ta tsʼakale, chichʼ talel jlom mantaletik ti tskoltautik ta stunesel lek li kabtejebtik sventa chkakʼtik-o estudioe. Mi chkakʼtik persa stunesel lek li kabtejebtike, ta me jchʼuntik li tojobtasel liʼe: «Jechuk-o me xakʼel aba atuk xchiʼuk ta sventa li kʼusi chavakʼ ta chanele. Jechuk-o me xapas batel li kʼusitik taje, yuʼun mi jech chapase ta me xakol xchiʼuk ta me xkolik ek li buchʼutik chchikintabote» (1 Tim. 4:16).