¿Mi oy kʼusi laj yichʼ jelel li ta Sk’op Diose?

Junantik krixchanoetike tsjakʼbe sbaik mi oy kʼusi laj yichʼ jelel li ta Skʼop Diose. Li j-alkʼop Isaiase laj yal ti «te oy-o sbatel osil» li kʼusi yaloj Diose (Isaias 40:8). ¿Kʼu yuʼun xuʼ jchʼuntik ta melel ti muʼyuk jelbil li kʼusi yaloj tspas Dios ta jelavele?

Li Diose oy sjuʼel sventa xchabi li Skʼope xchiʼuk ti mu xichʼ jelele. Li ta voʼnee, ta skʼob toʼox tspasik kopiar li Skʼop Diose, li buchʼutik jech la spasike la xchapik jujun letra sventa mu x-epaj yuʼunik, mu sjelik xchiʼuk ti muʼyukuk kʼusi slokʼesike. Akʼo mi jech, ta skoj ti jpasmulilutike, junantik ti buchʼu la spasik kopiare, oy onoʼox kʼusi ti muʼyuk lek xbat yuʼunik ta tsʼibaele, pe li kʼusi chale jech-o kʼu chaʼal ta orijinale.

¿KʼU YUʼUN XUʼ JCHʼUNTIK TI TE LIKEM TAL TA STOJOLAL DIOS LI KʼUSI CHAL SKʼOP DIOSE?

Oy tabil epal skopiailtak li Skʼop Dios ta voʼnee. Mi oy kʼusi jelel laj yichʼ tael li ta junuk kopiae, xuʼ xichʼ koʼoltasel ta yan kopiaetik sventa xichʼ kʼelel mi ta melel muʼyuk lek li kʼusi tsʼibabile, (mi chakʼan chanabe mas skʼoplale, ochan ta jw.org xchiʼuk chano li mantal ti xi sbie: «¿Se ha cambiado o manipulado la Biblia?»).

Jnopbetik skʼoplal li balbalvun laj yichʼ tael ta nab Muerto ta sjabilal 1947. Li jbeduinoetike (j-arabeetik ti te chanavik ta takixokol balumile) te la staik ta chʼenetik ti nopol xil li nab Muertoe. Li kʼusi laj yichʼ taele jaʼ jtuchʼ li Skʼop Dios ti laj yichʼ tsʼibael leʼ xa ta chaʼmil jabile. Li buchʼutik chchanbeik skʼoplale la skoʼoltasik li balbal vun xchiʼuk li Skʼop Dios ti oy kuʼuntik avie. ¿Mi oy van kʼusi la staik?

Li buchʼutik chchanbeik skʼoplale laj yakʼik venta ti koʼol kʼuchaʼal ta orijinala li Skʼop Dios avie. Kʼalal laj yichʼ kʼelbel skʼoplal li voʼneal Tsʼibetike, te laj yakʼik venta ti jaʼ onoʼox ta melel li kʼusi yakʼoj ta naʼel Diose. Xuʼ jpat koʼontontik ti jaʼ la xchabi talel sventa mu xichʼ jelel li Skʼope.

Jech oxal, xuʼ jpat koʼontontik ti jaʼ melel li kʼusi ta jchantik ta Skʼop Diose. Jkʼeltik kʼusi chalbutik ta stojolal Dios li j-alkʼopetike.